ဂျူရဳဆာဲ
တွဵုရးဍုၚ်မန် ပ္ဍဲပွိုၚ်ဍုၚ်လ္ၚဵုတံ အလဵုအသဳတံ ပတေၚ်လဝ်ဂီုကၠီုနွံဒၟံၚ်ရောၚ်ဂှ် ဂွံတီကေတ်ရ။
ဗွဲတၟေၚ် အပ္ဍဲပွိုၚ်ဍုၚ်မတ်မလီု၊ ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗုတံဂှ် ဖျေံစွံလဝ် ပရေၚ်ဂီုကၠီုတေၚ်ဂြတ်မံၚ်တုဲ ပ္ဍဲမွဲဒမြိပ်ဂၠံၚ်ကွဳစက်ဂှ်လေဝ် ပၞာန်တံကေတ်လဝ်ဂီုကၠီုနွံဒၟံၚ်ရ။
“ပ္ဍဲသတ္တဏံဂှ် ဂီုကၠီုတေၚ်တိုန်ကွေံကွေံဏောၚ်၊ လ္တူဍုၚ်ပၠန်လေဝ် ဇၟာပ်ဒၞာဲ ဇၟာပ်ပ္ၚံက်ဂၠံၚ်ဂှ် ဍေံတံမၚ်မံၚ်ဖအိုတ်ဏောၚ်၊ ကၠာတေံဂှ်တှေ် ဒၞာဲဂၠံၚ်ဇၞော်ကွေံကွေံမှ ဍေံတံမၚ်နွံ လဆောဝ်အကာဲအရာဟွံခိုဟ်ကွေံကွေံမှ မၚ်မံၚ်နွံ” ဂှ် ရဲလ္တူဍုၚ်မတ်မလီုမွဲတၠ ဟီုရ။
ရဲမကေတ်လဝ်ဂီုကၠီုတံဂှ်ဝွံ ကောန်ပၞာန်၊ ပၞာန်မၚ်ကွာန်ကေုာံ ဂကောံပၠိုတ်ပၟတ်တံပံၚ်ကောံလဝ်တုဲ မွဲဒၞာဲတှေ် မၞိဟ်ဍေံ ၜိုတ်ပန် မသုန်တၠမၚ်မံၚ်ရ။ ပ္ဍဲသၞေဟ်ကွဳစက်ပၠန်လေဝ် ပွမစၟဳစၟတ်တေၚ်တိုန်ဒၟံၚ်ရောၚ် ညးဆက်ဟီုရ။
ဆဂှ်သၟးဟွံက လ္ပာ်ကွာန်ရးတံလေဝ် ပ္ဍဲကဵုကွာန်ဂမၠိုၚ်တံလေဝ် နူကဵုဒပ်ပၞာန်ဖျေံလဝ်သဇိုၚ်ဒၞာဲဒေသတံဂှ် ဖျေံလဝ်ပရေၚ်ဂီုကၠီုကီုရ။
“ပ္ဍဲကွာန်ပိုဲဂှ်တှေ် ပၞာန်ဍေံ ၜိုတ် ၄-၅ တၠ နွံမံၚ်၊ ဍေံမၚ်မံၚ် ပ္ဍဲပါၚ်ဂၠံၚ်လုပ်ကွာန် ကွာန်လ္ၚဵုဂှ်တှေ် ကၠာဟွံစိုပ်ပါၚ်ဂၠံၚ်ကွာန် အပ္ဍဲကၠအ်ထၜိုတ်တံဂှ် ဍေံမၚ်မံၚ် မုဟိုတ်ဂှ် ညးမွဲလေဝ် ဟွံတီပုဟ်” ဂှ် ရဲဍုၚ်မုဟ်ဍုၚ်မွဲတၠ ဟီုရ။
အကြာအလဵုအသဳကဵု ဗော်ဍုၚ်မန်တၟိ ပရေၚ်ဆက်ဆောံကြံၚ်မ္ၚိုဟ်မံၚ်ကီု၊ မွဲပၠန်ဂှ် ဍေံတံမၚ် ရဲကၠောန်ဂၠံၚ်ဒှ်မာန်ဂှ် ညးဒေသတံဟီုမံၚ်ရ။
“ဟီုမံၚ်ဂှ်နာနာသာ်ရလေဝ်၊ လ္ၚဵုဂှ် ဆဂး ပၞာန်တံမၚ်မံၚ်ဗီုဏံဂှ် မွဲလှေ်လေဝ် ဟွံကေၚ်ဆဵုဏီပုဟ်ဂှ်” ကောန်ကွာန်မွဲတၠ ဟီုရ။
