မိစၠန်ထဝ်။   ။ဗော်ဒဳမဝ်ကရေဇြဳ အလုံရးမန်တံ စှေ်ပရေၚ်စန္ဒက်မ္ဂး သွက်ဂွံဒုၚ်တၠုၚ်ဂှ် ကောန်ကွာန်မန်တံ ပံက်မံၚ်ဂကောံ သွက်ဂွံဒုၚ်တၠုၚ်ရောၚ် ဂွံတီကေတ်ရ။

လောန်ကၠုၚ် သတ္တဟတုဲကၠုၚ်တေံဂှ် ပ္ဍဲတွဵုရးဍုၚ်မန် ပွိုၚ်ဍုၚ်ရေဝ်၊ ပွိုၚ်ဍုၚ်ပါ်လၟိုၚ် ကေုာံ ပွိုၚ်ဇြပ်ဗုတံဂှ် ဥက္ကဌကွာန်တံ က္ဍိုက်ပ်တုဲ ကော်ကောံဓရီု သွက်ဂွံ ပံက်ဂကောံကွာန် သ္ဂောံဒုၚ်တၠုၚ် အခိၚ်ဗော်မန်တံ စှေ်ပရေၚ်စန္ဒက်ရောၚ် ဂွံတီကေတ်ရ။

“အခိၚ်ဗော်မန် စှေ်ပရေၚ်စန်ဒက် သွက်ဂွံဒုၚ်တၠုၚ်ကီု၊ သွက်ဂွံအာကၠုၚ်ကီုဂှ် သ္ဂောံရၚ်တၠုၚ်ကဵုမာန်ဂှ် ဥက္ကဌကွာန် ကော်ဟီုလဝ် ပ္ဍဲကောံဓရီုကွာန်၊ ဂွံပံက်ဂကောံဂှ် ရဲကွာန်ဗွဲမဂၠိုၚ် စိတ်လုပ်စမံၚ်ကီုရ” သာ်ဝွံ ကောန်ကွာန် မၞံုပ္ဍဲပွိုၚ်ဍုၚ်ပါ်လၟိုၚ်မွဲတၠ ဟီုရ။

ခရိတ် သွက်သ္ဂောံဒုၚ်တၠုၚ်ဗော် ကေုာံ သွက်ဂွံပံက်ဂကောံသီုဖအိုတ်ဂှ် နူကဵုဥက္ကဌကွာန်တံ ကေတ်ကဵုတာလျိုၚ်ရောၚ်ဂှ် ရဲကွာန်ဂှ် ဆက်ဟီုရ။

မၞိဟ်လ္ၚဵုတံဂှ်ဝွံ ဂွံလုပ်ဂကောံကွာန်လၟုဟ်ဂှ် ဖေက်ဒၟံၚ်လေဝ် နွံမံၚ်ရောၚ် အ္စာၝောံဗ္တောန်လိက် နူကွာန်ဂှ် ဟီုရ။

“အခိၚ်ဥက္ကဌ ကဵုတာလျိုၚ်ဂှ် ညးလ္ၚဵုတံဂှ် ဖေက်မံၚ်အိုတ်လေဝ်၊ ကိစ္စဗီုဗီုဏံဂှ် သွက်ဒးဖေက် ဟွံမွဲပုဟ်၊ ဒးပါလုပ် ထေက်မံၚ်ဏောဝ်” သာ်ဝွံ အ္စာၝောံဂှ် ဟီုရ။

ဗော်ဒဳမဝ်ကရေဇြဳ အလုံရးမန် စှေ်ပရေၚ်စန္ဒက် အလန်ကၠာအိုတ် ပ္ဍဲဂိတုဂျောန် တတိယသတ္တဟဂှ်ဝွံ ဆအယာံမာတ် စှေ်ပရေၚ်စန္ဒက် အကြာဂကောံနာနာ မၞံုလတူဍုၚ်ကေုာံ အကြာခမဳသၚ်တံဟေၚ်ရတုဲ အကြာညးဍုၚ်ကွာန်တံဂှ် ဟွံဂွံစှေ်ပရေၚ်စန္ဒက်ဏီရ။

ပ္ဍဲတရဴစှေ်ပရေၚ်စန္ဒက်အလန်ကၠာဂှ်ဝွံ သောၚ်ကလး လးထ္ၜးကဵု ဂၠံၚ်တရဴဗော်၊ မူဝါဒဗော်ညးတံ ကုညးမတိုန်စိုပ် ကောန်ဂကောံနာနာ၊ ခမဳသၚ်တံရ။

“ပ္ဍဲဍုၚ်ပိုဲလေဝ် သွက်ဂွံဒုၚ်တၠုၚ် ဗော်စှေ်စန္ဒက်ဂှ် ဍေံတံပံက်မံၚ်ဂကောံကီုရ” သာ်ဝွံ ရဲလတူဍုၚ်ဇြပ်ဗု မွဲတၠ ဟီုရ။

ပွိုၚ်ဍုၚ်ရေဝ်ကေုာံ ပွိုၚ်ဍုၚ်ဇြပ်ဗုတံဂှ် ၜိုန်ရပံက်ဒၟံၚ်ဂကောံ သ္ဂောံဒုၚ်တၠုၚ်ဗော်မန်ကီုလေဝ် ပွိုၚ်ဍုၚ်မုဟ်ဍုၚ်ကေုာံ ပွိုၚ်ဍုၚ်လ္ၚဵုတံဂှ်ဝွံ မုအစဳအဇန်လေဝ် ဟွံမွဲဏီရောၚ် ဂွံတီကေတ်ရ။

ဗော်ဒဳမဝ်ကရေဇြဳ အလုံရးမန်ဝွံ စဒက်ပတန်လဝ် ပ္ဍဲဂိတု အေဗရာ (၇) သၞာံ ၂၀၁၀ တုဲ  နာဲၚိုဲသိၚ် (နာဲဇၞူမန်) က္ဍိုက်ပ်လဝ်ဗော်ဝွံရ။

ပ္ဍဲဂိတုမေ ၂၄ ဂှ် နူကဝ်မရှေန် ပေဲါရုဲမာဲ အလဵုအသဳပၞာန် ကဵုအခေါၚ်ပတိုန်စရၚ်ဗော် ကုဗော်ဒဳမဝ်ကရေဇြဳ အလုံးရးမန် နကဵုလၟေၚ်ပတိုန်စရၚ်ဗော် (၁၃) ရ။

ရုၚ်ဂအုပ်ဗော်ဂှ်ဝွံ ပံက်လဝ် ပ္ဍဲအရာပ်မျာၚ်သာယာ၊ ဍုၚ်မတ်မလီုတုဲ လုပ်ပြိုၚ်ပကာန် ဒုၚ်ရုဲမာဲ ပ္ဍဲတွဵုရးဍုၚ်မန်၊ တွဵုရးကရေၚ်၊ ရးဗဂေါ ကေုာံ ရးတၞၚ်သဳတံရောၚ်ဂှ် ရန်လဝ်နွံရ။