ဗီုဖျာဇၞော်မတ်မလီုတူကၠုၚ်ဂှ် ဘာတိုက်ဇၞော် ကွာန်ထုၚ်အာၚ်လေဝ် တူအာကီု
မိလျးထဝ် ၊၊ ၊၊တွဵုရးဍုၚ်ကရေၚ် ဘာတိုက်ဇၞော်နွံဒၟံၚ် ပ္ဍဲကွာန်ထုၚ်အာၚ်ဂှ် ဟိုတ်နူပၟတ်ပၞာၚ်ကၠောံထၞာန်တုဲ တူအာအတိုၚ်ဘာမွဲမရ။
ဘာဂှ်ဝွံ ပ္ဍဲစၟတ်တ္ၚဲ ဂိတုဂျူလာၚ် ၁၇ အခိၚ်ဗ္တံ အကြာ ၉ နာဍဳကဵု ၁၀ နာဍဳဂှ် တူအာရ။ ဘာဝွံ မဒှ်ဘာတြေံတြဟ်မွဲတုဲ လောန်ကၠုၚ်ၜိုတ် ၁၅၀ သၞာံတေံ သိုၚ်လဝ်ရောၚ်ဂှ် ဒါယကာဘာဂှ် မွဲတၠဟီုရ။
အခိၚ်ပၟတ်တူဂှ် ကေတ်အဆက်ကဵု ဌာနပလိုတ်ပၟတ် လ္တူဍုၚ်ဘာအၚ်တေံရ။ ပၟတ်တူဂွံ ၜိုတ်ပွိုၚ် ၂ နာဍဳတုဲမှ ကွဳစက်ဂစိုတ်ပၟတ်စိုပ်ကၠုၚ်တုဲ ဂစိုတ်ပၟတ်ဂှ် မာန်အာရ။ နူဍုၚ်ဘာအၚ် ဂွံစိုပ်ကွာန်ထုၚ်အာၚ်ဂှ် ဒးအာပွိုၚ်ၜိုတ် ဘာ်နာဍဳဒှ်ရ။
ဟိုတ်နူပၟတ်တူတုဲ သၚ်တံကီု ကောန်ထပိုဲတံကီု မၞုံဒၟံၚ်ပ္ဍဲဘာတံဂှ် ဘဲဝပ်မွဲသာ်ဟွံဒးဂှ်လေဝ် ဒကာဘာဂှ် ဆက်ဟီုရ။
အပ္ဍဲကဵုပၟတ်တူအာဂှ် ရုပ်ပုတ်တြေံတြဟ် နူခေတ်ကၠာတေံကီု၊ လိက်ပတ်မန်တြေံတြဟ် မပ္တံလိက်သၠပတ် ကပေါတ်အာဲကၟာဲမန် ဗွဲမဂၠိုၚ် ဒးဒုၚ်ဆောံလေၚ်အာအိုတ်ရ။
ၚုဟ်မးဆောံလေၚ်အာဂှ် ချိုတ်တ်ပၠိုတ်တ် တော်ဆကေတ်ဟွံမာန်ကီုလေဝ် ၚုဟ်မး ၜိုတ် (၂၀၀၀) ကိုဋ် ဆောံလေၚ်ဒှ်မာန်ရောၚ် ဒကာဘာတံ ဆိၚ်ဆကေတ်အိုတ်ရ။
ကွာန်ထုၚ်အာၚ်ဝွံ မၞုံဒၟံၚ် ပ္ဍဲတွဵုရးဍုၚ်ကရေၚ်တုဲ မဒှ်ကွာန်မန်ဇၞော်ဇၞော်မွဲကွာန်ရ။ လၟိုဟ်သ္ၚိၜိုတ် (၄၀၀၀) ပြၚ်ၚ်နွံဒၟံၚ်တုဲ ဒှ်ကွာန်ကဆံၚ်ပွိုၚ်တိုက်မွဲကွာန်ရ။ အပ္ဍဲကွာန်ဂှ် ဘာတန်သၠုၚ် နွံမံၚ်မွဲမ၊ ဘာတန်မူလနွံ (၇) ဘာ၊ မပ္တံ ရုၚ်ဂဥုဲပွိုၚ်တိုက်၊ ရုၚ်ဗၠာဲသၟိၚ်၊ ဖုၚ် (အိတ်သ်ချိန်း) လေဝ်နွံရ။
အပ္ဍဲကွာန်ဂှ်ဝွံ ဘာလကျာ်မၞုံ (၉) မ မဒှ်တုဲ ဘာတူအာလၟုဟ်ဏံဂှ် မဒှ်ဘာတိုက်လိက်ဇၞော်အိုတ်အပ္ဍဲကွာန်ဂှ်ရ။
0 Comments