ဌာန်ပရိုၚ်ဗၠးၜးမန် – ကဵုၚုဟ်ခိုဟ်တုဲ ရာန်ကေတ်မံၚ် ကာပ်ကေဝ် ပ္ဍဲပယျဵုကျာ်ပိဂှ်ရ မၞိဟ်ဗက်ရပ်ကာပ်ကေဝ်တံလေဝ် ဂၠိုၚ်ကၠုၚ်မံၚ်ရောၚ် ကောန်ဍုၚ်ကျာ်ပိတံ ဟီုအိုတ်ရ။
ကာပ်ကေဝ်သ္ၚိ ကာပ်ကေဝ်ဂြိုပ် ဟွံရုဲ ရာန်ကေတ်မံၚ်ဖအိုတ်တုဲ ဍောတ်အိုတ် ကာပ်ကေဝ် မၞုံလျိုၚ် (၃) ခေတ် (ၜိုတ်လျိုၚ် ၂၀ ဒကေဝ်) ပေၚ်ဟေၚ် ရာန်ကေတ်မံၚ်ရောၚ်၊ ကာပ်ကေဝ်ဂျိုၚ်ဂျိုၚ် ဟွံမွဲကဵု ပၞေတ်တံဂှ်ဟေၚ် ရာန်ကေတ်မံၚ်ရောၚ်ဂှ် ညးရာန်ကာပ်ကေဝ် ပ္ဍဲကျာ်ပိမွဲတၠ ဟီုရ။
“မၞိဟ်ကၠုၚ်သွံဂှ် ဂၠိုၚ်ကွေံ၊ ဆဂး ကာပ်ကေဝ် ပေၚ်လျိုၚ် ပိခေတ်ဂှ် ဂွံမွဲဓဝ်” သာ်ဝွံ ညးဟီုရ။
ကာပ်ကေဝ် မၞုံလျိုၚ် (၃) ခေတ်ဂှ် နကဵုသြန်သေံ (၅၀၀၀) ၝာတ်၊ ပေၚ်လျိုၚ် ဘာ်ကဳလဵု (ၜိုတ်လျိုၚ် ၃၀ ဒကေဝ်ပြၚ်) မ္ဂး (၇၀၀၀) ၝာတ် ရာန်ကေတ်မံၚ်ရ။
ကာပ်ကေဝ် ရာန်ဂွံလဝ် နူကဵုကျာ်ပိဂှ် ဂကူသေံတံ ကဵုၚုဟ်ၜါဆတုဲ ကၠုၚ်ရာန်ကေဝ်မံၚ်ရောၚ်ဂှ် ညးမကြပ်ကဵု ရဲရာန်ကာပ်ကေဝ်မွဲတၠ ဟီုရ။
ဂအအ်ကာပ်ကေဝ်ဂှ် လုပ်ဂြန်ဂဥုဲ ပ္ဍဲအရာလွဳယဲ HIV/AIDS ရောၚ် ဂကူသေံ ကၠုၚ်ရာန်ကာပ်ကေဝ်တံ ပတှေ်ကေတ်အိုတ်ရ။
“သေံ ကၠုၚ်ရာန်ကာပ်ကေဝ် ပ္ဍဲပိုဲဂှ် ဍေံတံဟီု ကာပ်ကေဝ်ရာန်ဏာလဝ်ဏံဂှ် ဍေံတံကလေၚ်ဝဳမွဲသၞာံ၊ ဂအအ်ကာပ်ကေဝ်ဂှ် ဍေံကၠောန်ဂဥုဲ” သာ်ဝွံ ညးဗြဴရာန်ကာပ်ကေဝ်မွဲတၠ ဟီုရ။
နကဵုပညာဂဥုဲ ဍုၚ်ပလိုတ်မ္ဂး ကာပ်ကေဝ်ဏံ ဂွံလုပ်ဂြန်ဂဥုဲ ဝဳယဲ HIV/AIDS ဂှ် သက်သဳသာဓက ဟွံမွဲဏီရောၚ်၊ ဂကူသေံတံဂှ် သုၚ်စောဲ ပ္ဍဲအရာစၞစ ဒှ်လေပ်ရောၚ် အာစာဂဥုဲ နူကဵုဍုၚ်ကျာ်ပိမွဲတၠ ဟီုရ။
သ္ပပတံ နူလဒေါဝ်ဂိတုဂျူလာၚ်ဏံဂှ် ပ္ဍဲကျာ်ပိ စရာန်မံၚ်ကေတ်မံၚ်ကာပ်ကေဝ်တုဲ သွက်သ္ဂောံဂွံကာပ်ကေဝ် ဟွံမွဲကဵုပၞေတ်ဂှ် ဒးရပ်ကဵုဒၞက်ပးဇုက်ပသဲက္ဍာၚ်ရောၚ်၊ ဟိုတ်နူညးရပ်ဂၠိုၚ်တုဲ သ္ပပတံနူဂိတုအဝ်ဂါတ်မံက်ဏံ နူကဵုရုၚ်ဗၠာဲသၟိၚ် ကၟာတ်လဒဵုထောံ ပွမရာန်ကာပ်ကေဝ်၊ ပွမရပ်ကာပ်ကေဝ်ရောၚ်ဂှ် ညးမရပ်ကာပ်ကေဝ်တံ ဟီုအိုတ်ရ။
“ကၠာတေံ ဍေံတံ (ဗၠာဲသၟိၚ်) လေဝ် ရပ်သွံမံၚ်ကာပ်ကေဝ်ကီုရ။ ဆဂး သ္ဂောံဂွံကာပ်ကေဝ်ဇၞော်ဇၞော်ဂှ် ဟွံလောဲပုဟ်၊ ဍေံတံဂှ် ဂွံဗက်ဂၠာဲရပ် အတေံအဏံ ဗီုပိုဲဗက်ရပ်ဂှ်လေဝ် ရပ်ဟွံဂွံ၊ ဟိုတ်နူဟွံဂွံအကံက်တုဲ ကၟာတ်ထောံရ ဒှ်မာန်” သာ်ဝွံ ညးမရပ်ကာပ်ကေဝ်မွဲတၠ ဟီုရ။
ကာပ်ကေဝ်ဂှ် မဒှ်သတ်ဆီဂံက်မွဲဂကူတုဲ ရပ်ဂၠာဲစစၞ မပတံကဵု ကၞိ၊ ဗကောတ်တိ၊ စၟစၟန်တံရ။ မံၚ်အကြာဒရော်သ္ၚိ၊ ဂွေၚ်ဆုတံရ။
သၠာဲသၞော် ညံၚ်ရဴဇြံုမာန်တုဲ ခၟာဲဍေံလေဝ် ဍေံကလေၚ်စလေပ်ရ။ ဆဵုဂဗကဵု အန္တရာယ်မ္ဂး ကလေၚ်ကိတ်လေပ်တုဲ ပရဟ်ထောံဗတ ညံၚ်ရဴဂစက်တံမာန်ရ။ ကာပ်ကေဝ်နွံမ္ဂး သတ်ဂမျိဂမ္တာန် မပတံကဵု ဇြံုတံ ဟွံကၠုၚ်ရောၚ် ညးဂမၠိုၚ် ပတှေ်ကေတ်လဝ်အိုတ်ရ။
ကြုက်၊ အေန်ဒဵု၊ ဂျပါန်တံ ပတှေ်ကေတ် သတ်မၞုံကဵုလာဘ်ပရဲမွဲတုဲ လွဳစွံပ္ဍဲသ္ၚိအိုတ်ရ။ ပ္ဍဲနဲဂြန်ဂဥုဲကြုက်တံမ္ဂး ကောပ်ကေဝ်ဝွံ လုပ်အသုၚ် ပ္ဍဲအရာလွဳယဲခၞော်စော်တံရ။
