ခတ္တာနန် – ဟိုတ်နူအလဵုအသဳပၞာန်တအ် ဟွံကဵုအခေါၚ်ဖ္ဋိုက်သ္ၚုတုဲ ကွာန်ဗဒိုပ်ဟံၚ်ပြာ်ကေုာံ ကွာန်ဗဒါဲဗဒါဲ ဗဒိုပ်ဟံၚ်ပြာ် မၞံုဒေသခရိုၚ်ထဝဲါ ရးတနၚ်သဳတေံ ဒှ်အခက်အခုဲကဵုသ္ၚုသြောံအိုတ်ရ။
ဟိုတ်နူကဵု ညးတာလျိုၚ်အလဵုအသဳပၞာန် မဖျေံသဇိုၚ် ဒေသခရိုၚ်ထဝါဲတအ်ကၟတ်လဝ် အခေါၚ်ဖ္ဋိုက်သ္ၚု စနူဂိတုပသာ် စဵုကဵုလၟုဟ်ဂှ်တုဲ ယဝ်ဖ္ဋိုက် ပဵုနူ ၜါ ပိရိုက်မ္ဂး ညးတာလျိုၚ်သၞေဟ်ကၚ်ဒဵုဒလဲတအ် ဟွံကဵုအခေါၚ်ဖ္ဋိုက်သ္ၚု၊ သၟာန်သၟုက်ဂၠိုၚ်တုဲ ညးကုသာန်သွံရာန်သ္ၚုတံ သ္ၚု ကေုာံ ကပေါတ်စသုၚ်တအ် ဟွံဂံၚ်ဖ္ဋိုက်အိုတ်ရ။
လၟုဟ်ဝွံ ပ္ဋဲဒေသခရိုၚ်ထဝါဲ ဟွံဂွံအခေါၚ် ပတိတ်သ္ၚုတုဲ ညးဍုၚ်ကွာန်တအ် “ဒးစဒၟံၚ် ပုၚ်ၜိုဟ်အိုတ်ရ’’ ဂှ် ညးအုပ်ကာ ဂကောံဟံၚ်ပြာ်ဖောအ်ဗြေဝ်မန်မွဲတၠ ဟီုရ။
“ယဝ်ရပၞာန်ဗၟာတအ် ဆဵုဒး ဖ္ဋိုက်လဝ်သ္ၚုပဵုအာနူ မွဲရိုက်တှေ် ဍေံတအ်သၟာန်သၟုက်ဂၠိုၚ်၊ ရဲသွံရာန်တအ်လေဝ် ဟွံမိက်ပတိုန်သ္ၚု။ ရဲတၠဂၠုၚ်၊ ရဲတၠကာတအ်လေဝ် ဟွံမိက်ဖ္ဋိုက်၊ ဟိုတ်ဂှ်ရ သွက်ညးတအ်ဂှ် သ္ၚုသွက်ဂွံစဟွံမွဲ ဒှ်အာ” သာ်ဝွံ ညးအုပ်ကာဟံၚ်ပြာ် ဟီုရ။
သွက်ရဲဗဒိုပ်တအ်မ္ဂး ကပေါတ်ကီု၊ သ္ၚုသြောံတအ်ကီု ဒးရာန်ယိုက်ပတိတ် နူကွာန်ဍာ်တဴ (ရာဖူး) တုဲ နူကွာန်ဂှ်မွဲကဆံၚ် ဒးဖ္ဋိုက်ကဵုဂၠုၚ်ရ။
အခိၚ်ဖ္ဋိုက်ဂၠုၚ်ဂှ် ယဝ်ရ ပၞာန်ဖျေံလဝ်သဇိုၚ် ပ္ဋဲကွာန်ဍာ်တဴ (ရာဖူး) ခလရ ၁၀၃ တအ် ဆဵုဒးမ္ဂး ဍေံတအ်သ္ပအခက်တုဲ ဟွံကဵုအခေါၚ်ဖ္ဋိုက်ပတိုန်ဏာ ဒေသခရိုၚ်ထဝါဲတေံရ။ ဒပ်ပၞာန် ခလရ (၁၀၃) ဝွံ ဂိတုဘတ်ကၠာဟွံပေၚ်က္ဋၚ်ဂှ် စပြံၚ်စိုပ်ကၠုၚ် ဖျေံလဝ်သဇိုၚ် ပ္ဍဲကွာန်ဍာ်တဴ (ရာဖူး) ဂှ်ရ။
ကွာန်မၞုံအပ္ဍဲဒေသခရိုၚ်ထဝါဲဗွဲမဂၠိုၚ်တံဝွံ မဒှ်ကွာန် ဗဒိုဟ်ဟံၚ်ပြာ်တုဲ လ္ၚဵုဂှ် ညးဍုၚ်ကွာန် ဂြိပ်ဒဴပၞာန်တံ ပတန်လဝ်ကွာန်လေဝ်နွံဒၟံၚ်တုဲ သွက်ညးတံဂွံတန်တဴဒၟံၚ်တံဂှ် နူကဵုရုၚ်ဟံၚ်ပြာ် ဖော်ဗြေဝ် ကဵုမံၚ်အထံက်အပၚ်လေဝ်နွံမံၚ်ကီုရ။
ကွဳစက် (မှန်လုံ) ဂြိပ်ဒၟံၚ် ထဝါဲကဵုလဂုၚ်၊ ထဝါဲကဵု မတ်မလီုတံလေဝ် ယဝ်ဖ္ဋိုက်ကပေါတ်တံမ္ဂး ဒးပတိုန်လိက် ဒးထ္ၜးလိက်တၞးတုဲမှ ဂွံအခေါၚ်ပတိုန် ယဝ်ထ္ၜးလိက်တၞးစရၚ်ကပေါတ်မ္ဂး ဖ္ဋိုက်ဟွံဂွံပုဟ်ရောၚ် ကောၚ်ကွာန်ဍာ်တဴမွဲတၠ ဟီုရ။
ဗဒဲါကွာန်ဍာ်တဴဂှ်မ္ဂး ကွာန်ရဲဒဴပၞာန်နွံ ၅ ကွာန်တုဲ ကွာန်ဗဒိုပ်ဟံၚ်ပြာ်ဟွံသေၚ်လေဝ်နွံဒၟံၚ်ရ။ ကောန်ကွာန်တံဝွံ ကမၠောန်တဵုဂူဟေၚ် ဒှ်ကမၠောန်ဟယျိုၚ်လမျီုညးတံရ။ ညးတံဝွံ သွက်ဂွံစသုၚ်အာဂှ် ဒးဗဒဗဒါဲဒၟံၚ်ကဵု သြောံဂူညးတံကဵု အရီုဗၚ်ဟံၚ်ပြာ်ရ ၜိုန်ဂှ်လေဝ် သွက်ညးတံဂှ် စသုၚ်ဟွံရုပ်ဂပ်ရ။
