အသး၊ ခတ္တာနန်-မယကနူကဵု ပွိုၚ်ဍုၚ်ပါ် ကလိၚ်အံၚ်၊ ပွိုၚ်ဍုၚ်ဍာ်ဗု၊ ဒေသရးတနၚ်သဳတံ ဆဵုဂဗကဵု ညးတာလျိုၚ်ဗော်ဍုၚ်မန်တၟိ ခရိုၚ်ထဝါဲတုဲ သဳကၠဳသွက်ဂွံ စုတ်မာဲကျဝ်ဒုၚ်ရောၚ် ကောန်ဗော်ဍုၚ်မန်တၟိမွဲတၠ ဟီုရ။
“ယဝ်ရ နူဗော်ဍုၚ်မန်တၟိပိုဲ ဒုၚ်တုဲမ္ဂးတှေ် ဒေသခရိုၚ်ထဝဲါဂှ် သိုၚ်ကဵုရုၚ်မာဲ ၜါဒၞာဲတုဲ မၞိဟ်အယုက်လတူ ၁၈ သၞာံဂှ် ၜိုန်ရ လိက်စၟတ်သမ္တီကောန်ဍုၚ်ဟွံမွဲလေဝ် ကဵုအခေါၚ်စုတ်မာဲရောၚ် မယကတံ ဟီုရ” သာ်ဏံ ညးဆက်ဟီုရ။
ယဝ်နူဗော်ဍုၚ်မန်တၟိဒုၚ်တုဲမ္ဂး သွက်ဂွံစုတ်မဲကျဝ်ဒုၚ်ဂှ် ကၠောန်ပ္ဋဲသ္ပကဵု ပ္ဍဲဂိတု နိုဝၚ်ဘာ ၃ ဂှ်ရောၚ် နူမယကဂှ် ဟီုရ။
ၜိုန်ရ မယက ပွိုၚ်ဍုၚ်ပါ် ကလိၚ်အံၚ် ဟီုသောၚ်ပတိုန်လဝ်ကီုလေဝ် နူကဵုဗော်ဍုၚ်မန်တၟိတံ ဟွံကလေၚ်ပရိုၚ်မွဲသာ်ဏီရ။
ကွာန်မၞုံသၟဝ်တိဍာ် ဗော်ဍုၚ်မန်တၟိ အပ္ဍဲဒေသခရိုၚ်ထဝဲါတေံဂှ် မၞုံ ၁၀ ကွာန်တုဲ ပ္ဍဲကဵုကွာန်ဂှ်ဝွံ လၟိဟ်မၞိဟ် နွံဗၞေတ် ၃၀၀၀ ရောၚ်ဂွံတီကေတ် နူလိက်ဒုၚ်စဳရေၚ် လၟေၚ်ဂိတု နူဂကောံဟံၚ်ပြာ်ဖောအ်ဗြေဝ်ရ။
ဗော်ပရေၚ်ဍုၚ်ကွာန် လုပ်ဒုၚ်ရုဲမာဲ ပ္ဋဲဒေသဍာ်ဗုဂှ်မ္ဂး ဗော် (တစည)၊ ဗော်ခိုၚ်ကၠိုက်၊၊ ဗော်ဒဳမဝ်ကရေဇြဳ အလုံရးမန်၊ ဗော်ဒဳမဝ်ကရေပ်တေတ် (ဗၟာ)၊ ဗော်ဇြဟတ်ဒဳမဝ်ကရေးဇြဳကောန်ဂကူ အပံၚ်ဖအိုတ် ၅ ဗော်မဒှ်ရ။
ကွာန်ဗွဲမဂၠိုၚ် မၞုံဒၟံၚ်ပ္ဍဲဒေသခရိုၚ်ထဝဲါဝွံ နွံသၟဝ်တဲဗော်ဍုၚ်မန်တၟိတုဲ ကွာန်ဟံၚ်ပြာ်ဒဒိုက် (၅) ကွာန်ကု ကွာန်ညးဂြိပ်ဒဴပၞာန် နွံ (၅) ကွာန်ရ။ ကွာန်ဟံၚ်ပြာ်မသုန်ကွာန်ဝွံ ကွာန်မိပ်ဇြိပ်၊ ကွာန်ဝၚ်နာ်၊ ကွာန်တဵုလွဳ၊ ကွာန်စဴဍုၚ်၊ ကွာန်ကြုၚ်ဗိုၚ်တံမဒှ်တုဲ ကွာန်ဂြိပ်ဒဴပၞာန်ဝွံ ကွာန်ပၞၚ်ဗုၚ်ဒကှ်၊ ရွာတၟိ မြဟ်ဆာဲ၊ သၞေဟ်ကွဳ၊ ကြုၚ်ဗတဳ၊ ကွာန်ကြုၚ်ဗၚ် မသုန်ကွာန်မဒှ်ရ။
ညးဍုၚ်ကွာန်တံဝွံ ဗွဲမဂၠိုၚ်ဟယျိုလမျီုကဵု ကၠောန်စဒၟံၚ်ကမၠောန်ကၠအ်၊ တဵုသြောံဂူတုဲ ပေါဲရုဲမာဲ ၂၀၁၀ ဂှ် ညးတံ စိုတ်လုပ်စအောန်မံၚ်ရောၚ် ဂွံတီကေတ်ရ။
0 Comments