ခတ္တာနန်၊ သူရိန် – သကိုပ်ရုၚ်မာဲ၊ ဂကောံကဝ်မယှေန် ပေဲါရုဲမာဲ ကေုာံ သၞာဲဒါအလဵုအသဳ မၞုံပ္ဍဲပွိုၚ်ဍုၚ်ကျာ်ပိအိုတ်သီု နူတနေံ ပ္ဍဲဂိတုနဝ်ဝေမ်ပါ (၃) စနူအခိၚ်နူဂယး (၁၀) နာဍဳ ဒဵုကဵုစိုပ် တ္ၚဲသဝ် (၂) နာဍဳ ဒးစုတ်မာဲဒစးဒုၚ်ရ။
ပွိုၚ်ဍုၚ်ကျာ်ပိဝွံ ဟိုတ်နူဒှ်ဒၟံၚ် ဒေသပယျဵုကီု ဟိုတ်နူဂၠံၚ်ဍာန် ဟွံကလိက်ကဠောတ်ကီုတုဲ ဒးစုတ်မာဲ ဒစးဒုၚ် ပြဟ်နူကဵု ဒေသတၞဟ်တၞဟ် (၂) တ္ၚဲရ။
ပေါဲစုတ်မာဲ ဒစးဒုၚ်ဝွံ ကၠောန်သ္ပ ပ္ဍဲရုၚ်မယကတုဲ နူကဵုကဝ်မယှေန် ပေါဲရုဲမာဲ တွဵုရးကရေၚ် ပွိုၚ်ဍုၚ်လှာဒကှ် နာဲမျေအ်သဵု (သကိုပ်ပရေၚ်ပညာတွဵုရး)၊ နာဲစဝ်သၚ်ဝေန် (သၞာဲဒါရီုဗၚ်သၞောဝ်) ကေုာံ မယက ဍုၚ်ကျာ်ပိတအ် က္ဍိုက်ပ်ကၠောန်ဗဒှ်တုဲ ညးဒုၚ်ကာအလဵုအသဳ (၁၀၀) တၠပြၚ် ကၠုၚ်ကဵုမာဲအိုတ်ရ။
“ ညးကဵုမာဲ ဗွဲမဂၠိုၚ်ဂှ်တှေ် စုတ်မာဲကဵု ဂကောံကျဖောအ်” သာ်ဝွံ ညးဒုၚ်ကာ အလဵုအသဳ စုတ်လဝ်မာဲမွဲတၠ ဟီုရ။
ပ္ဍဲပွိုၚ်ဍုၚ်ပါ်ကျာ်ပိ၊ ပွိုၚ်ဍုၚ်လှာဒကှ်၊ တွဵုရးကရေၚ်ဝွံ ဗော်ကျဖောအ်၊ ဗော်တစည၊ ဗော်ဖလုၚ်သဝဝ် ဒဳမဝ်ကရက်တေတ်၊ ဗော်တဴတက် ညးဍုၚ်ကွာန်ကရေၚ် ကေုာံ ဗော်ဒဳမဝ်ကရေဇြဳ အလုံရးမန် တအ် လုပ်ဒုၚ်ရုဲမာဲအိုတ်ရ။
စပ်ကဵုပရေၚ်စုတ်မာဲ ဒစးဒုၚ်ဏံတုဲ ၜိုန်ရကေတ်အဆက်ကဵု သကိုပ်ရုၚ်မာဲ၊ ကမ္မယှေန်ရုၚ်မာဲတံကီုလေဝ် အခေါၚ်သှ်ဟွံမွဲ ဂးတုဲ ဖျေံထောံဖုၚ်ရ။
ညးမတၞီလုပ်လၟိဟ် ပ္ဍဲစရၚ် ကဵုမာဲဒစးဒုၚ်တံ ဂွံကဵုမာဲ ဒစးဒုၚ်မာန်ဂှ် သ္ပပတံ နူဂိတုနဝ်ဝေမ်ပါ (၅) တုဲ ဂကောံကဝ်မရှေန် ကွာန်/အရာပ်တံ ဒးစၟဳစၟတ်ကၠောန်ဗဒှ်ကဵုရောၚ်ဂှ် ဓမံက်ထ္ၜးလဝ် ပ္ဍဲလိက်အုပ်သၞောဝ်ပေဲါရုဲမာဲ စၠတ်ထဝ်ညးဍုၚ်ကွာန်ရ။
ပ္ဍဲညးမကဵုမာဲ ဒစးဒုၚ်မာန်တံဂှ် ကောန်ပၞာန် ကေုာံ ကောန်သမ္ဘာညးတံကီု၊ ကွးဘာ စိုပ်မံၚ် မ္ၚးဒေသကဵုမာဲတံကီု၊ ကွးဘာတန်ဗ္တောန် စိုပ်မံၚ် မ္ၚးဒေသကဵုမာဲတံကီု၊ ညးမဒးဒုၚ်ချုက်လဝ်တံကီု၊ ညးမဒးတိုန်မံၚ်ရုၚ်ဂဥုဲတံကီု၊ ညးမစိုပ်မံၚ်ဍုၚ်သအာၚ် ဂွံလဝ်အခေါၚ် နူအလဵုအသဳတံကီု ပါလုပ်ရောၚ် ဓမံက်ထ္ၜးလဝ် ပ္ဍဲလိက်အုပ်ဂှ်ရ။
0 Comments