မိလျးထဝ် – ပ္ဍဲတွဵုရးဍုၚ်မန် ကညၚ်တုဲကၠုၚ်ဏံ ဟိုတ်နူဂမ္တဴ ဍာ်ကှ်တုဲ လ္ပာ်ဒေသတဵုတၞံသတ် ဟိုတ်နူတၞံသတ်ကှ်ကေဲ ချိုတ်ဂၠိုၚ်တုဲ အခိၚ်သတ်တိတ်ဏံဂှ် သတ်တိတ်အောန်တုဲ ၚုဟ်မးသတ်ဍၚ်တိုန်ရ။
ၚုဟ်မးသတ် မွဲမ ၈၊ ၅ ဒကေဝ်ဂှ် ဒှ်အာမွဲမ ၁၀၊ ၁၂ ဒကေဝ်ရ။ ဒၞာဲဒေသလ္ၚဵုတံဂှ် တိုန်အာ ဒဵုဒှ် မွဲမ ၁၂ ဒကေဝ်လေဝ်နွံရဂှ် တၠကၠအ်သတ် လ္ပာ်ကၞောတ်ၜဳရေဝ်မွဲတၠ ဟီုရ။ သတ်ကှ်ကှ်လေဝ် မွဲပိဿာ တိုန်အာ ၂၀၀၀ ဒကေဝ်ရ။
“သၞာံဏံဂှ် ဟိုတ်နူကဵု ကညၚ်ဂၠိုၚ် ဍာ်ကှ်တုဲတှေ် တၞံသတ်ချိုတ်ကှ်ဂၠိုၚ်ဂှ်ရ သတ်ၚုဟ်တိုန်၊ ဟိုတ်ဂှ်ရ သွက်ရဲကၠအ်တံဂှ်တှေ်ခိုဟ်ရ ဆဂး သွက်ရဲကူသွံစမွဲအဆက်ဗီုပိုဲဂှ်တှေ် သွံစခက်ရ” သာ်ဝွံ ရဲကူသွံရာန်သတ် ကွာန်ကလအ် ပွိုၚ်ဍုၚ်ရေဝ်မွဲတၠ ဟီုရ။
သၞာံဏံဝွံ ဟိုတ်နူကဵု ဥတုရာသဳ ဟွံညိၚ်ဝတ် ဂမ္တဴၜက်လာန်အာနူသၞောတ်တုဲ တၞံဆုဂမၠိုၚ် ကှ်ကေဲအေဲချိုတ်အာ ဗွဲမဂၠိုၚ်ရောၚ် တၠထၜိုတ်ပွိုၚ်ဍုၚ်ရေဝ်မွဲတၠ ဟီုရ။
ကွာန်ဒေသကၞောတ်ၜဳရေဝ်ဝွံ မဒှ်ဒေသ ကၠောန်ပရေၚ်ပိုၚ်ဂြပ် ဟယျိုၚ်လမျီုကဵု ပရေၚ်တဵုကၠအ် ဗွဲတၟေၚ်ကၠအ်သတ်ရ။ မဗ္တံ ကွာန်ဖလာန်၊ ကွာန်ဟနဳ၊ ကွာန်ပသာတံဂှ် ဒှ်ဒေသတဵု တၞံသတ်ဂၠိုၚ်တုဲ ဒးဆောံလေၚ် တၞံသတ်ဗွဲမဂၠိုၚ်ရ။
သၞာံတုဲကၠုၚ် ၂၀၀၉ ဂှ်ဝွံ သတ်မွဲမမ္ဂး ၚုဟ်မးဍေံ နွံအကြာ ၄၊ ၅ ဒကေဝ်ဓဝ်တုဲ ၚုဟ်သတ်ဟွံခိုဟ် သွက်ရဲဒးပဓာန်စကဵုကၠအ်သတ်တံ ဆဵုဂဗအခက်အခုဲအိုတ်ရ။
ကွာန်မၞံုမွဲဒမြိပ် ပွိုၚ်ဍုၚ်ရေဝ် မဗ္တံ ကွာန်အၚ်ဒၚ်၊ အစေန်၊ ဒူရာ၊ နှေဟ်နှောဝ်တံကီု ကွာန်ကြပ်ပ်ဗဒါဲတံ ၜိုတ် (၈) ကွာန် သၞာံတုဲကၠုၚ်ဂှ် ဟိုတ်နူသတ်ၚုဟ်ဟွံခိုဟ်တုဲ ညးတံ ဒးဆဵုဂဗအခက်အခုဲ အပ္ဍဲအရာ ပရေၚ်ပိုန်ဂြပ်ရ။
ရဲကွာန်ဖလာန်မွဲတၠ ဟီုဂှ်မ္ဂး “ပ္ဍဲကၠအ်ဂှ် တၞံသတ် နွံဒၟံၚ် ၃၀၀၀ တၞံဂှ် ဟိုတ်နူဂမ္တဴလောန်တုဲ ကှ်အာ ၜိုတ် ၈၀၀ တၞံပြၚ်မံၚ်” သာ်ဝွံ ညး ဟီုရ။
0 Comments