မိလျးထဝ် – ပ္ဍဲပေါဲရုဲမာဲတုဲကၠုၚ်ဂှ် ဗော်ဒဳမဝ်ကရေဇြဳအလုံရးမန် မဇၞးလဝ်မာဲ ၁၆ ဒၞာဲဝွံ ပ္ဍဲကဵုတန်ဗတောန်ဘာအလဵုအသဳ နကဵုဘာသာမန် ညံၚ်ဂွံပါလုပ်မွဲဘာသာကီုဂှ် သွက်ဂွံအာတ်မိက် အပ္ဍဲကဵုအလဵုအသဳတၟိဂှ် ချပ်လဝ်ရ။
“ပိုဲတံ အာတ်မိက် အပ္ဍဲကဵုအလဵုအသဳတၟိ သွက်ဂွံကဵုအခေါၚ်ဗတောန်လိက်ပတ်မန် အပ္ဍဲကဵု ဘာအလဵုအသဳ တၚ်ဏံဂှ် ဒှ်တၚ်အဓိက ဗော်ပိုဲရ” သာ်ဝွံ ဥက္ကဌ ဗော်ဒဳမဝ်ကရေဇြဳအလုံရးမန် နာဲၚှိုဲတိၚ် ဟီုရ။
ဍုၚ်မန်ဝွံ လၟိုဟ်မၞိဟ်ၜိုတ် ၃ ပြကာတိကိုဋ်နွံမံၚ်ရ။ အပ္ဍဲကဵုကောန်ဂကူမန်တံဂှ် အခေါၚ်ဗတောန်လိက်မန် အပ္ဍဲဘာအလဵုအသဳတံဂှ် ဟွံမွဲကၠုၚ်ရ။ ကောန်ဂကူမန်တံ အခေါၚ်ဗတောန်လိက်ဗၟာဟေၚ်နွံကၠုၚ်တုဲ သွက်ဂွံဂွံအခေါၚ်ဗတောန်လိက်မန် ပ္ဍဲဘာအလဵုအသဳဂှ် နွံကၠုၚ်ပၟိက်အိုတ်ရ။
“လိက်ပတ်၊ ယေန်သၞာၚ်ဂှ် ဒှ်အဓိက သွက်ဂကူမန်ပိုဲရ၊ ပိုဲနွံပၟိက် ဂကူမန်ပိုဲ ညံၚ်ဂွံဗတောန်လိက်မန်ရ၊ အလဵုအသဳတိုန်တၟိလေဝ် ထေက်ကဵု ဒးသ္ပသမ္တီ လ္တူဏံကီုဏောၚ်ဂှ်” ဥက္ကဌ နာဲၚှိုဲသိၚ် ဟီုရ။
က္ဍိုပ်သကိုပ်ဗော်ဒဳမဝ်ကရေဇြဳအလုံမန်တံ ချပ်စ သွက်ဂွံကဵုအခေါၚ်ဗတောန် လိက်မန် စနူကဵုတန်ကောန်ၚာ်ရ။ ကောန်ၚာ်မန်တံလေဝ် ဘာသာမန် နဒဒှ်ဘာသာမိမဂှ် ဒးဗတောန်ကၠာထေက်ရောၚ်ဂှ်လေဝ် က္ဍိုပ်သကိုပ်ဗော်မန်တံ ချပ်လဝ် သွက်ဂွံထမံက်အာရုပ်ရဴရ။
“ဗွဲကိုပ်ကၠာ အပ္ဍဲဘာတန်ကောန်ၚာ် ညံၚ်ဂွံဗတောန်လိက်မန်၊ တုဲမှ ဘာသာတၞဟ်ဟ် ဗီုကဵုဘာသာဗၟာတံ ဆက်ဗတောန်” သာ်ဏံ နာဲၚှိုဲတိၚ်ဟီုရ။
ပ္ဍဲဘာတန်ဗတောန်အလဵုအသဳဂှ် နကဵုဘာသာမန်ဗတောန်မံၚ်ဖိုဟ်ရ ဆဂး နကဵုဘာသာအပဵုမွဲ ဒးဗတောန်မံၚ် အခိၚ်အပဵုဂှ် ပိုဲတံ ဒုၚ်တဲဟွံမာန်ပုဟ်၊ နဒဒှ် ဘာသာမွဲ ညံၚ်ဂွံဒှ်ကၠုၚ်မာန်ဂှ် သွက်ကောန်ဂကူပိုဲ ဆက်ဂစာန်အာဏောၚ်ဂှ် ညးဆက်ဟီုရ။
နကဵု ဗော်ဒဳမဝ်ကရေဇြဳအလုံရးမန်တံ ပ္ဍဲတန်ဗတောန်အလဵုအသဳ လိက်မန် ညံၚ်ဂွံပါလုပ် နဒဒှ် ဘာသာစၟတ်သမ္တီမွဲဂှ် ဗွဲကိုပ်ကၠာ အာတ်မိက်အာရောၚ်။ ယဝ်ခါရ အခေါၚ်ဗတောန်လိက်ပတ်မန် ချိုတ်တ်ပၠိုတ်တ်ဂွံကၠုၚ်မ္ဂး သွက်ကောန်ဂကူမန် ဂွံဒှ်ဂုန်ဖဵုဂှ် ၜိုတ်သ္ပမာန် ကၠောန်အာရရောၚ် က္ဍိုပ်သကိုပ်ဗော်မန်တံ ဟီုရ။
နူကဵုအလဵုအသဳတံ ကၟာတ်လဒဵုထောံ အခေါၚ်ဗတောန်လိက်မန် အပ္ဍဲဘာအလဵုအသဳတုဲ သွက်ကောန်ဂကူမန်တံ ဒးဗတောန်ဒၟံၚ်လိက်မန် အပ္ဍဲဘာလကျာ်ရ။
နူကဵု ဗော်ဍုၚ်မန်တၟိ ဒေါံကၠုၚ်ပန်ပှော်ကဵု အလဵုအသဳပၞာန်တုဲ ဗော်ဍုၚ်မန်တၟိ ကေတ်တၚ်တုပ်စိုတ်ကဵုအလဵုအသဳတုဲ အပ္ဍဲဘာတန်အလဵုအသဳဂှ် ဂွံကၠုၚ်အခေါၚ်ဗတောန်လိက်မန် နကဵုအခိၚ်အပိုၚ်အခြာရ။ ဒေသနွံသၟဝ်တဲတိဍာ်ဗော်ဍုၚ်မန်တၟိတံဂှ် နူဌာနပရေၚ်ပညာဗဟိုတံ က္ဍိုက်ပ်တုဲ ဗတောန်မံၚ်ရ။
အတိုၚ်နူဌာနပရေၚ်ပညာဗဟို ပတိတ်လဝ်စာရၚ် ၂၀၀၈ ဂှ် ကောန်ကွးဘာ အပ္ဍဲဘာကောန်ဂကူဂှ် နွံလၟိဟ် ၁၅၇ တၠတုဲ အပ္ဍဲကဵုဘာပံၚ်ကောံဂှ် လၟိဟ်ကွးဘာနွံ ၁၁၄ တၠရ။
