နာဲမာန် – ပ္ဍဲကဵုအခိၚ်တၞးထၜိုတ်လေဝ် ကြပ်ဍုဟ်ဏံ ၚုဟ်ဟၜိုတ်လေဝ်ခိုဟ်ဗွဲမလောန်တုဲ ၚုဟ်ကၠအ်ထၜိုတ်လေဝ် သၠုၚ်လောန် ညးရာန်နွံကီုလေဝ် ရဲသွံဒဵုကဵုဟွံမွဲဒှ်ဒၟံၚ်ရ။
ၚုဟ်ဟၜိုတ်ဂှ် တုဲကၠုၚ်ဂိတုဒဳဇြေန်ဗါကၠာဟွံအိုတ်က္ဋၚ်ဂှ် ကြဳကြဳကှ်ကှ်ဂှ် ၚုဟ်နွံမံၚ်အကြာ (၁၅၀၀) ဒကေဝ်တုဲ လၟုဟ်မ္ဂး ဒှ်အာမွဲပံၚ် (၁၆၀၀) ဒကေဝ်ပြၚ်မံၚ်ရ။ ကြဳကြဳဍုက်က် ဗုတ်ဂွံမွဲတ္ၚဲတုဲဂှ် ၚုဟ်နွံမံၚ်အကြာ (၁၃၀၀) ဒကေဝ်ရ။
ဟၜိုတ်ဍုက်က်တီုတီုဂှ် ဗုတ်ဂွံမွဲတ္ၚဲတုဲ နွံမံၚ်ၚုဟ်အကြာ (၁၀၀၀) ဒကေဝ်တုဲ ဟၜိုတ်တီုတီုကှ်ကှ်ဂှ် ၚုဟ်နွံမံၚ် အကြာ (၁၂၀၀) ဒကေဝ်ဒှ်ရ။
ဟိုတ်နူၚုဟ်ဟၜိုတ်ခိုဟ်လောန်တုဲ တၠကၠအ်လ္ၚဵု လောဘတိတ် လံက်ဂဥုဲဟၜိုတ်တိတ် သွက်ဟၜိုတ်ဂွံပဵုတိတ်ဂၠိုၚ်လေဝ် နွံရ။
“ၚုဟ်ဟၜိုတ်ခိုဟ်ဗီုသၞာံဏံ မွဲလှေ်ဟွံကေၚ်ဆဵုဏီပုဟ်၊ ၚုဟ်ဟၜိုတ်ခိုဟ်တုဲ ကၠအ်ဟၜိုတ်ဂှ်လေဝ် ၚုဟ်သၠုၚ်ကွေံကွေံ ညးဗက်ဂၠာဲရာန်နွံ ဆဂး ညးသွံဂှ် နွံအောန်ကွေံကွေံ” သာ်ဏံ ညးစလိၚ်သွံရာန်ကၠအ်ထၜိုတ် ဍုၚ်ဇြပ်ဗုမွဲတၠ ဂးရ။
ဆက်တုဲ ညးဟီုပၠန်ဂှ် ရဲသွံမံၚ်ကၠအ်ဟၜိုတ် ကၠာတေံကေၚ်ကော်လဝ် ၜါကၠံကိုဋ်တအ်ဂှ် ဒှ်အာပိကၠံကိုဋ်၊ ကၠအ်ခိုဟ်ခိုဟ်ဂှ် တၠကၠအ်တအ် ထပ်ကော်ဟပဵုပ္တိုန် ဒဵုကဵုကၠံကိုဋ်၊ ကော်ပထောံ ဒဵုကဵု ရဲရာန်တအ် ဟွံဂံၚ်ရာန်ဒှ်အာ သာ်ဏံ ညး ကၠောန်စပရေၚ်သွံရာန်ကၠအ်ထၜိုတ်ဂှ် ထပ်လဴပၠန်ရ။
တွဵုရးဍုၚ်မန်ဝွံ ကၠာသၞာံ ၁၉၈၈ စတဵုကၠုၚ်ထၜိုတ်တုဲ လၟုဟ် လၟိဟ်တဵုထၜိုတ် ဧက ၄၂၃၆၉၂ တဵုကၠုၚ်မာန်ရ။ လၟိဟ်တွဵုရးဍုၚ်မန်တဵုထၜိုတ်ဝွံ အလုံဍုၚ်ဗမာမဂး ၃၇ ဒသမ ၀၆ က္ဋိုပ်ကၠံနွံရ။
အပ္ဋဲဒေသတဵုထၜိုတ်ဗွဲမဂၠိုၚ်ဂှ် ဍုၚ်မန်ဝွံ ဒဒှ်တွဵုရးထၜိုတ် (ရော်ဘာပြည်နယ် ဖြစ်ရမည်) ရောၚ် ရန်တၟံသာ်ဝွံတုဲ ဇၟာပ်ပ်ပွိုၚ်ဍုၚ်အပ္ဋဲဍုၚ်မန်ဂှ် တဵုကၠုၚ်မံၚ်တၞံထၜိုတ်ရ။ ဍုၚ်မန်ဝွံ မဒှ်တွဵုရး တိဍာ်ဥတုရာသဳခိုဟ် သွက်ဂွံတဵုထၜိုတ်ရောၚ် သာ်ဝွံ လိက်ပရိုၚ်အလဵုအသဳပၞာန်ဗၟာ ဂးလဝ်ရ။
