ဌာန်ပရိုၚ်ဗၠးၜးမန် – ပ္ဍဲဂိတုအေဗရာ အလဵုအသဳတွဵုရး မံက်တုဲမ္ဂး သွက်သ္ဂောံခါန်ကၞက်တာလျိုၚ် ဥက္ကဌကွာန်တၟိ နွံမံၚ်တုဲ လၟုဟ် ဗော်ကျဖောအ် ကေုာံ ဗော်ဒဳမဝ်ကရေဇြဳ အလုံရးမန်တံ ရုန်ဂစာန်ချဳဒရာၚ်ဒၟံၚ် သွက်ကောန်ဂကောံညးတံ ညံၚ်သ္ဂောံဒှ် ဒၞာဲဥက္ကဌကွာန်ရောၚ် ဂွံတီကေတ် နူကောန်ကွာန်တံရ။
အတိုၚ်ညးတာလျိုၚ် ဗော်ဒဳမဝ်ကရေဇြဳ အလုံရးမန် လ္တူဍုၚ်မုဟ်ဍုၚ်မွဲတၠ ဟီုမ္ဂး သီုဗော်ကျဖောအ် သီုဗော်ဒဳမဝ်ကရေဇြဳ အလုံရးမန် ကတိုၚ်ကတိုၚ်ကၟဟ်ကၟဟ် ကဵုမံၚ်ဇြဟတ်ကဵု ကောန်ဂကောံညးတံ သွက်သ္ဂောံရုဲစှ် ဒၞာဲဥက္ကဌကွာန်တၟိဂှ်ရ။
တဆိပ်ဗော်ဒဳမဝ်ကရေဇြဳ အလုံရးမန် ကေုာံ တဆိပ်ဗော်ကျဖောအ် (ဗီု-ဌာန်ပရိုၚ် ဗၠးၜးမန်)
“ယဝ်ခါရ ဥက္ကဌကွာန်တံ ဒှ်မၞိဟ်ပိုဲဏောၚ်ဟီုတှေ် ဗော်ပိုဲ ချဳဒရာၚ် ပ္ဍဲပွဳပွူမန်ပိုဲ လောဲသွာဏောၚ်” သာ်ဝွံ ညးဟီုရ။
သွက်ဂွံကဵုပညာ ကုမှာဇန် ညးဍုၚ်ကွာန် ကောန်ဂကူမန် ကေုာံ သွက်သ္ဂောံထံက်ဂလာန်ကဵု ဗော်ညးတံ ပ္ဍဲပေဲါရုဲမာဲ ၂၀၁၅ အဓာန်ဂတတေံဂှ် လၟုဟ်ဗော်ဒဳမဝ်ကရေဇြဳ အလုံရးမန် စန်ဒက် ပလေဝ်ပလေတ်စဒၟံၚ်ရောၚ်။
“ပရေၚ်ချဳဒရာၚ်ဗော်ပိုဲ နွံမံၚ်တၟာဂလိုၚ် ပ္ဍဲပွဳပွူညးဍုၚ်ကွာန်မန်၊ သွက်ဂွံဆက်ချဳဒရာၚ်ဂှ်လေဝ် ဗော်ပိုဲ မၚ်စၟဳဒၟံၚ် အလဵုအသဳ မံက်တိုန်တၟိဂှ်ရ” သာ်ဝွံ ဥက္ကဌ ဗော်ဒဳမဝ်ကရေဇြဳ အလုံရးမန် နာဲဇၞူမန် ကော် နာဲၚိုဲတိၚ် ဟီုရ။
ဇၟာပ်ပ် ဗော်ကျဖောအ်တံ ကၠောန်သ္ပကောံဓရီု ပ္ဍဲလ္တူဍုၚ်မုဟ်ဍုၚ်မ္ဂး မၞိဟ်တာလျိုၚ် ဂကောံကျဖောအ်တံ ကဵုမံၚ်ဒြဟတ်ကဵု ကောန်ဂကောံညးတံ သွက်ဂွံဒုၚ်ရုဲစှ် ဒၞာဲဥက္ကဌကွာန် ပ္ဍဲတွဵုရးဍုၚ်မန်ရောၚ် သာ်ဝွံ ညးမကြပ်ကဵု ဗော်ဒဳမဝ်ကရေဇြဳ အလုံရးမန်မွဲတၠ ဟီုလဴထ္ၜးရ။
ပ္ဍဲသၞာံ ၂၀၀၈ ဂှ် ပ္ဍဲတွဵုရးမန် ရုဲစှ်ဥက္ကဌကွာန်တၟိ အလန်လက္ကရဴအိုတ်ရ။ ပ္ဍဲအခိၚ်ဂှ်ဝွံ မိမညးဍုၚ်ကွာန်တံ ပတိုန်စရၚ်မၞိဟ်ဇကု ဒးဂၞပ် သွက်ဒၞာဲဥက္ကဌကွာန်တုဲ စရၚ်ပတိုန်လဝ်တံဂှ် ဒးပလံၚ်ဗစိုပ်ကဵု ဌာန်ဂအုပ်ပၞာန်ရးဒိုဟ်အဂၞဲရ။
နူဌာန်ဂအုပ်ပၞာန် ရးဒိုဟ်အဂၞဲ ကလေၚ်ဖျေံနၚ်ကဵု စရၚ်ဥက္ကဌကွာန်တုဲ အပ္ဍဲဂှ်မ္ဂး ညးမလုပ်လဝ် ဗော်ကျဖောအ်တံဟေၚ် ကလိဂွံဒၞာဲဥက္ကဌကွာန်အိုတ်ရ။
လၟုဟ် ဥက္ကဌကွာန် မၞံုပ္ဍဲပွိုၚ်ဍုၚ်မုဟ်ဍုၚ် မပ္တံကဵု ကွာန်ကၟာဝက်၊ ကွာန်လှာ၊ ဒဵုမာဲ ကေုာံ ကွာန်ကၠအ်သတ်တံဂှ် ဟွံမိက်နုက်တိတ် နူကဆံၚ်ဥက္ကဌတံဂှ်တုဲ လ္ၚဵုတံဂှ် ထပက်မံၚ်သြန်ကဵု ညးတာလျိုၚ် အလဵုအသဳပၞာန်ဗၟာတံလေဝ် နွံမံၚ်ရောၚ် ဂွံတီကေတ် နူညးမစုက်လုက်ကဵု ဗော်ဒဳမဝ်ကရေဇြဳ အလုံရးမန်မွဲတၠရ။
