စၠန်ထဝ် – နူတနေံအခိၚ်နူဂယးဂှ် ဟိုတ်နူဗြဲဇၞော် ကျာထတ်တုဲ ပ္ဍဲပွိုၚ်ဍုၚ်ၜါသွာၚ် (တကအ်ခၟိုၚ်)တေံကီု ပ္ဍဲဍုၚ်မတ်မလီုကီု ဘာဗ္တောန်လိက်၊ သ္ၚိလ္ၚဵု ကေုာံ တိုၚ်ပၟတ်ဓါတ်၊ တၞံဆုဗွဲမဂၠိုၚ် လီုလာ်အာရောၚ် ညးဒေသတံ ဟီုအိုတ်ရ။
သၞေဟ်ဂၠုၚ် ကွာန်ကအ်မု ဟ်ပန်၊ တကအ်ခၟိုၚ် ( ဗီု - ဌာန်ပရိုၚ်ဗၠးၜးမန် )
“အခိၚ်နူဂယးၜိုတ် ၈ နာဍဳဂှ် သီုဗြဲ သီုကျာ ထတ်ကွေံကွေံ။ ဘာတန်ဒေါဝ် ကွာန်ပိုဲဂှ် ကၟဳသောတ်သွဝ်အာ ၜိုတ် ၂၀ တၞး ဒှ်မံၚ်။ သ္ၚိလ္ၚဵုဂှ် တၞံဆုဍိုက်တုဲ သရိုဟ်အာလေဝ် နွံ” သာ်ဝွံကောန်ကွာန်ဒဵုကြေဝ် ပွိုၚ်ဍုၚ်ၜါသွာၚ်မွဲတၠ ဟီုလဴရ။
ကွာန်ကြပ်ကဵုပြၚ်ၜဳ ကၠောန်မံၚ်တမ္ၚာလ္ၚဵုတံဂှ်လေဝ် ဂၠုၚ်ဖျေံဇာကတံ ကၠေံဗက်အာကဵု အသိၚ်ကျာ နွံကီုရောၚ်ဂှ်ကောန်ကွာန်ကအ်မုဟ်ပန်မွဲတၠ ဟီုရ။
“အပါကဵုကောန် ကဵုဂၠုၚ်မွဲမအာဖျေံဇာ ကၠေံအာမံၚ် ဒဵုတ္ၚဲဏံ ဟွံကလေၚ်မံက်ဏီဖိုဟ်” သာ်ဝွံ ညးဗြဴကောန်ကွာန်ကအ်မုဟ်ပန်ဂှ် ဟီုရ။
လတူဍုၚ်မတ်မလီုလေဝ်သ္ၚိလ္ၚဵု၊ တိုၚ်ပၟတ်ဓါတ်လ္ၚဵု ကေုာံ တၞံဆုဗွဲမဂၠိုၚ်တံ လီုလာ် ဒေံါကၟိုၚ်မံၚ်နွံကီုရောၚ်ဂှ် ကောန်ဍုၚ်မတ်မလီုမွဲတၠ ဟီုရ။
“တိုၚ်ပၟတ်တံဒေံါကၟိုၚ်တုဲ နူတနေံဏံ အတိုၚ်မွဲတ္ၚဲ ပၟတ်ဟွံကၠုၚ်ပုဟ်။ ပ္ဍဲအရာပ်ဇြေဂျဵုဂှ်တှေ်တဵုလဝ်တၞံဆုပယျေဝ်တံ ကဝ်ပိုတ်အာဖအိုတ်။ လတူဂၠံၚ်လေဝ် တၞံဆုကဝ်မံၚ် ဟွံသာပုဟ်။ကျာထတ်လောန်တုဲ ပံက်က္ဍိုၚ်လေဝ် ဟွံဂွံပုဟ်” သာ်ဝွံ ညးဗြဴ လတူဍုၚ်မတ်မလီုဂှ် ဟီုရ။
“မွဲဒမြိပ်ပြၚ်ၜဳတွဵုရးမန်၊ ရးတၞၚ်သဳဂှ် မွဲနာဍဳ အကြာ ၃၀ တိုၚ်ကဵု ၄၅ တိုၚ် ကျာကပိုက်မာန်မံၚ်တုဲ ဍာ်ဇၞော်မာန်၊လပှ်ဇၞော်မာန်ရောၚ်” ဂှ် ပ္ဍဲဝိပ်သာ် တၠပညာ လ္ၚတ်ဗြဲကျာ ဥူထောန်လွေန် ချူလလောၚ် ကဵုလဝ်သတိပ္ဍဲဂိတုမေ ၉ ဂှ်ရ။
0 Comments