ဌာန်ပရိုၚ်ဗၠးၜးမန် – အဃောရဲဂကောံအုပ်ဓုပ်အလဵုအသဳတံ ဆဝ်ဗ္ၚုဟ်လဝ်ပရေၚ်ဂွံအာပအပ်လွဟ်ဏံဂှ် ကွဳစက်ဖ္ဍိုက်ကၠုၚ်မၞိဟ်ၜါမ ဒးဒုၚ်စံၚ်ပလီုထောံ အပ္ဍဲပွိုၚ်ဍုၚ်ဇြပ်ဗု မွဲဒၞာဲရောၚ် သာ်ဝွံ ဌာန်ပလံၚ်ပစိုပ် “ရေႊလီရတနာ” ဟီုလဴရ။
ကွဳစက်ဇၞော် ဂြိပ်ဒၟံၚ်အကြာဍုၚ်လ္ဂုၚ်ကဵု ဍုၚ်ထဝဲါ ( ဗီု - ဌာန်ပရိုၚ်ဗၠးၜးမန် )
ကွဳစက်တံဏံဂှ် ဂြိပ်ဒၟံၚ်အကြာဍုၚ်လ္ဂုၚ်ကဵု ဍုၚ်ထဝါဲရောၚ်ဒှ်တုဲ ဂကောံရပ်လွဟ်ကရေၚ်မွဲဂကောံ ရပ်ဗဒေါအ်ဂွံလဝ် အကြာဂၠံၚ်ဇၞော် ဍုၚ်ဇြပ်ဗုကဵု ဍုၚ်ရေဝ် ပ္ဍဲဂိတုဂျောန် ၂၉၊ အခိၚ်နူဂယး ၉ နာဍဳဂှ် စံၚ်ပလီုထောံ ကွဳစက်ၜါမဂှ်ရ။
“ကွဳစက်ယှိုဲဠဳကဵု ယျာသာမေန် (ရေႊလီရတနာ၊ရာဇာမၚ်း) ဒးဒုၚ်စံၚ်ဏာရ၊ ဍေံတံ အာတ်မိက် လဝ်သြန်ထံက်ပၚ်ဂှ် ဟိုတ်နူဟွံကဵုတုဲ စံၚ်ထောံတွဵုလေဝ်၊ ရဲအာတ်သြန်ထံက်ပၚ်တံဂှ်တှေ် အာတ်မံၚ်ဗီုဏံလၟိုန်ရ၊ ၜိုတ်ဏံက္တဵုဒှ်ဟွံမာန်ခယျလဝ်၊ ကွဳစက်မွဲမ အာတ်လဝ်သြန် ၁၀ ကိုဋ်” သာ်ဝွံ ညးတာလျိုၚ် ဌာန်ပလံၚ်ဗစိုပ်ကွဳစက် ယှိုဲဠဳယျတဏာမွဲတၠ ဟီုရ။
ကွဳစက်ယှိုဲဠဳယျတဏာဝွံ စှေ်ကၠုၚ်နူဍုၚ်လ္ဂုၚ်ဒှ်တုဲ ကွဳစက်ယျာသာမေန်ဂှ် တိုန်ကၠုၚ်နူဍုၚ်ရေဝ် စိုပ်ကၠုၚ်အကြာ ကွာန်အနေၚ်ကဵု ကွာန်ကၠအ်လဳမဴဂှ် ရဲဂကောံအာတ်မိက်သြန်ထံက်ပၚ်တံ ဗဒေါံတုဲ စံၚ်ထောံရ။
အခိၚ်စံၚ်ကွဳစက်တံဏံဂှ် ရဲအာတရဴပါကၠုၚ်လ္တူကွဳစက်တံ ဒးစှေ်ထောံနူကွဳစက်တုဲ ရဲဂကောံရပ်လွဟ်တံ ကော်ဏာရဲဒဳကွဳစက် ၂ တၠကဵု ကောန်ပၞာန်ပါကၠုၚ်ပ္ဍဲကွဳစက်ဂှ် မွဲတၠ၊ သၠာဲဒါ ၂ တၠ သီုဖအိုတ်ဂှ်မ္ဂး မၞိဟ် ၁၀ တၠ ကော်ဏာလဝ်ရ။
“ဂကောံအာတ်မိက်သြန်ဏံဂှ် ညးလဵုရောပိုဲဟွံဂွံတီဏီပုဟ်၊ ဆဂးအကြာဂၠံၚ်ဇြပ်ဗု-ရေဝ်တှေ် ဂကောံကရေၚ်ရနွံ၊ ရဲဒဳကွဳစက်ပိုဲ မာံညိၚ်လေဝ်ပါအာကီုရ၊ ပြဟ်ဟ်ဏံ ဗီုလဵုဂွံဆက်ဖန် ဟွံတီဏီ” သာ်ဝွံ ညးနွံတာလျိုၚ် ယှိုဲဠဳယျတဏာဂှ် ဆက်ဟီုရ။
ကွဳစက်သီုၜါမ တူပၟတ်လီုလာ်အာအိုတ်မှ ကွဳစက်ဗၠာဲသၟိၚ်နူဍုၚ်ဇြပ်ဗု ကၠုၚ်စိုပ်စၟဳစၟတ်ဒၟံၚ်ကီုရောၚ် သာဝွံ ညးဆဵုနမတ်မွဲတၠ ဟီုရ။
“လပိုဲစှေ်အာရေဝ်ဂှ် မွဲသာ်ဟွံဆဵုပုဟ်၊ လစဴမှ ကွဳစက်ၜါမ တူလဝ်ပၟတ်တုဲ ဗၠာဲသၟိၚ်တံ စၟဳစၟတ်မံၚ်ဂှ် ဂွံဆဵု၊ ရံၚ်ကေတ်တှေ် ဗီုကဵုမၞိဟ်စံၚ်လဝ်ရ၊ ဆဂးပရေၚ် ဟိုတ်ဖဵု ဗီုလဵုကတဵုဒှ်ဂှ် အဲဟွံတီပုဟ်” သာ်ဝွံ ရဲဍုၚ်ဇြပ်ဗု ညးဆဵုလဝ်မွဲတၠဂှ် ဟီုရ။
ဂိတုမေ ၂၂ လောန်ကၠုၚ်ဏံဂှ်လေဝ် ကွဳစက်ဂြိပ်ဒၟံၚ် အကြာဍုၚ်လ္ဂုၚ်-ဍုၚ်ထဝါဲ မပ္တံကွဳစက် ယှိုဲမျေန်ပျာန်၊ ယှိုဲဝါယျတဏာ၊ ယှိုဲဝါဖူ၊ ကျေဝ်ဇေန်ဟုၚ် ကေုာံ ယျာသာမေန် ၅ မတံ ပ္ဍဲဂၠံၚ်ဇၞော် ဍုၚ်ရေဝ်-ဇြပ်ဗု၊ အကြာကွာန်ကၞေၚ်တၟံကဵု ကွာန်ကၠအ်လဳမဴဂှ် ရဲရပ်လွဟ်မွဲဂကောံ ဗဒေါံကွဳစက်အာတ်မိက်ကေတ်သြန်ထံက်ပၚ်တုဲ ကော်ထိၚ်ဏာ ရဲဂကောံကွဳစက် ၆ တၠကီုရ။
အကြာကွဳစက်ဂြိပ်ဒၟံၚ် ဍုၚ်ထဝါဲ-ဍုၚ်လ္ဂုၚ်၊ ဍုၚ်ထဝါဲ-ဍုၚ်မတ်မလီုတံဂှ် ရဲဂကောံရပ်လွဟ်မန်၊ ကရေၚ်တံ ချဳဒရာၚ်ဒၟံၚ်ဒှ်တုဲ ဗီုဒးရးအာတ်မိက်ကၠုၚ်လဝ် သြန်ထံက်ပၚ်လၟေၚ်ၚ်သၞာံ နွံကၠုၚ်ဒၟံၚ်ရ။
ဂိတုတုဲကၠုၚ်တေံပၠန် ဂကောံရပ်လွဟ်မန်မွဲဂကောံ ကာလဖံက်ဖတိုဟ်ထောံ တိုၚ်စက်ဆက်စၠောံဖုၚ် ပ္ဍဲဍုၚ်မုဟ်ဍုၚ်ဒှ်ကၠုၚ်တုဲ လၟုဟ်ပၠန် ကွဳစက်ဖ္ဍိုက်မၞိဟ်တံ ဒးဒုၚ်စံၚ်ဏာရ။ အပ္ဍဲပရေၚ်သီုၜါဏံဂှ် ရဲဂကောံဂီုကၠီုအလဵုအသဳဗၟာတံ ဗွဲမဂတာပ်အခိၚ် စဵုဒၞာကဵုဟွံမာန်ကၠုၚ်ရ။
