နာဲမာန် – ဂကောံသာသနာ ဒါယကာကျာ်ကေလာသ ဍုၚ်လၟိုၚ်ဂမၠိုၚ်၊ ဂကောံကွာန်ပွဳပွိုၚ်ကွာန်ဒေသဍုၚ်လၟိုၚ်ဂမၠိုၚ် ဒုၚ်တၠုၚ်ဖျေံနၚ် ခၞိၚ်ဇၞော် မဟာဇိနမၚ်္ဂလ ကျာ်ကေလာသ နူဍုၚ်မန္တလေဝ် စိုပ်ကၠုၚ်ဍုၚ်လၟိုၚ်ရ။
အဃောကဝါ်မံၚ်ခၞိၚ်ဇၞော် မဟာဇိနမၚ်္ဂလ ( ဗီု-ဌာန်ပရိုၚ်ဗၠးၜးမန်)
ခၞိၚ်ဇၞော်ဝွံ မၞုံလျိုၚ် (၃၃၃၉) ပိဿာတုဲ သီုရိသီုဂွေန်ကွက်ခၞိၚ်ဂှ်မ္ဂး ဖအိုတ်မၞုံလျိုၚ် (၃၉၇၅) ပိဿာရ။ ခၞိၚ်ဇၞော်ဂှ် ကာလၚုဟ်မး ဒြိုတ်ဝွံ (၇၉၅၀၀၀၀၀) (ထပှ်ကၠံဒစိတ်ဣသိုန်ကိုဋ်) ဒကေဝ်ရ။
ဂကောံသာသနာ ဒါယကာကျာ် ဍုၚ်လၟိုၚ်ဂမၠိုၚ်တံ ပ္ဍဲစၟတ်တ္ၚဲစှေ် ၄ မံက် ဒဵုစိုပ် စှေ် ၈ မံက် အာတိုန်ဒုၚ်ကေတ်ခၞိၚ်ဇၞော် လ္တူဍုၚ်ဇၞော် မန္တလေဝ်တေံရ။
သၞောတ်ဗ္ၜတ်ခၞိၚ်ဂှ် ပါၚ်ခၞိၚ် (၆) ပေ၊ ဗွိုၚ် (၂၀) ပေ၊ စံက်လျိုဟ်ခၞိၚ်(၅) ပေ (၄)ၝောံတဲ၊ သတီု (၇) ၝောံတဲ၊ သၠုၚ် (၈) ပေကဵု (၈) ၝောံတဲရ။ ဂွေန်သွက်ဂွံကွက်ခၞိၚ်ပၠန်ဂှ် သၠုၚ် (၅) ပေ၊ သၠဲအနာံ (၃) ပေ (၃) ၝောံတဲ၊ ရိခၞိၚ် (၂) ပေ (၉) ၝောံတဲ၊ ဗွိုက် (၄) ၝောံတဲဘာ်၊ ဝါယှာ (၈) ၝောံတဲပြၚ် ဖအိုတ်လျိုၚ် (၆၃၆) ပသာတုဲ အပံၚ်ဖအိုတ် (၃၉၇၅) ပိဿာရ။
ခၞိၚ်ဂှ် နူကဵုဍုၚ်မန္တလေဝ် တၠဓမာတ် မဒှ်ကောန် ဥူဗသိုက်+ဒဝ်ကျဳကျဳ – ဥူမျသိုက် ဂကောံသောန်ခၞံ ဒြိုတ်ဂှ် ခၞံသောန်လဝ်ရ။
ကာလဒါယိကာကျာ်တံဂမၠိုၚ် တိုန်ဒုၚ်ဖျေံခၞိၚ်ဂှ် အဃောဒုၚ်ဖျဴဂှ် ပဝါ်ဒုၚ်တၠုၚ်ဏာခၞိၚ်ဇၞော်ဂှ် နူဍုၚ်မန္တလေဝ်ဂှ် ပဝါ်ဂေတ်အာဍုၚ်တၟိနေပျဳဒဝ်၊ လ္ဂုၚ်၊ ဗ္ဂော၊ သဓီု၊ ဇိုၚ်ကျာ်၊ ပံၚ်၊ မတ်မလီု၊ မုဟ်ဍုၚ်၊ နူဇြပ်ဗုညးဍုၚ်ကွာန်ဂမၠိုၚ် ပွိုၚ်(၄) တ္ၚဲတုဲ ဖျဴဏာဍုၚ်လၟိန်ရ။
