စၠန်ထဝ် – ပ္ဍဲကဵုဒက်ပ္တန်ဂကောံအခေါၚ်အရာမၞိဟ်ဂှ် ဂကောံအလဵုအသဳတံ ပါလုပ်ဟွံထေက်ပုဟ်ရောၚ် နူဌာနကဵုပညာ ပရေၚ်အခေါၚ်အရာမၞိဟ် မဖျေံလဝ်သဇိုၚ်မ္ၚးဍုၚ် ဒါရိုက်တာ အံၚ်မျဵုမေန် ဟီုရ။

အပ္ဍဲကဵု ကလေၚ်ဒက်ပ္တန် ထပ်ပံက်လဝ် ဂကောံအခေါၚ်အရာမၞိဟ် ဍုၚ်ဗၟာဂှ် ညးမပါလုပ်ဒၟံၚ်ပ္ဍဲအလဵုအသဳတၟိ ဝန်ဇၞော်ကၟိန်ဍုၚ်တံဟေၚ် ကေတ်တာလျိုၚ်ရေၚ်တၠုၚ်အာရောၚ် နကဵုလိခ်လလောၚ်အမိၚ်သမ္မတ လၟိဟ်လိခ် ၃၄/ ၂၀၁၁ ပ္ဍဲလိခ်ပရိုၚ် Myanmar Time ချူထမံက်လဝ် ပ္ဍဲဂိတုဂျောန် ၂၄ တေံနွံရ။

“ပ္ဍဲပရေၚ်ကဝ်မယှေန်အခေါၚ်အရာမၞိဟ်ဟီုဂှ် အလဵုအသဳလုလောန်လဝ်တှေ် အတိုၚ်လုလောန်လဝ်၊ ပ္ဍဲလၟေၚ်သၞောဝ်ဥပဒေပၠန် ဖံက်ပကဝ်လဝ်အခေါၚ်အရာမၞိ်ဟ်နွံမ္ဂး ဒးထမံက်ပတိတ်ကဵု ကၠးကၠးမးမးကီုရောၚ်။ အတိုၚ်လၟုဟ်ဏံ ရဲထမံက်ပတိတ်ပရေၚ်အခေါၚ်အရာမၞိဟ်ဂှ် ဒှ်ဒၟံၚ်အလဵုအသဳပၠန်ရတှေ် ဟွံထေက်ကြိုက်ကွေံပုဟ်၊ ဒးဒှ်တၠပညာစီုသကီုပရေၚ်ဏံတုဲ ဒးသၠးပွးကီုရောၚ် အတိုၚ်သၞောတ် ဍုၚ်ဂၠးကဝ်ဂမၠိုၚ်ခုတ်လဝ်ဂှ် စာန်စးမံၚ်အိုတ်အစောန်” သာ်ဝွံ ဒါရိုက်တာ အံၚ်မျဵုမေန် ဟီုရ။

အပ္ဍဲဍုၚ်နိဂီုမွဲမွဲ ယဝ်ရဒက်ခၞံပ္တန် ကဝ်မယှေန်ဆေၚ်စပ်ကဵုအခေါၚ်အရာမၞိဟ်ဟီုမ္ဂး တၚ်တုပ်စိုတ်မူဝါဒ သ္ဒးသ္ပအစာံ Principle နာနာဂှ် ဒးဒဂေတ်ဗက်ကီုရောၚ်၊ အပ္ဍဲမူဝါဒဏံဝွံ ညးမ္ဒးမၚ်မွဲရံၚ်စံၚ် ကိစ္စအခေါၚ်အရာမၞိဟ် ဆေၚ်စပ်ကဵုနိဂီုဍုၚ်ဟီုမ္ဂး ပူဂဵုပါလုပ်တံဂှ် ဒးစ္ဍးမံၚ်ကဵုအလဵုအသဳတံတုဲ ဍာံဍာံပြပြညးဒးဟီုဂးမာန် ကေုာံ တၠပညာသၟးသၟးဇ္ၚးဇ္ၚး သၠးသၠးပွးပွးတံဟေၚ် ဒးပါလုပ်ရောၚ်။ ပူဂဵုထမံက်ပတိတ်ပရေၚ်အခေါၚ်အရာမၞိဟ်တံပါလုပ်မှ ကိတ်ညဳကဵု သိက္ခာဂကောံအခေါၚ်အရာမၞိဟ်မာန်ရောၚ် ဒါရိုက်တာ အံၚ်မျဵုမေန် ဆက်ဟီုရ။

နကဵုရဲဂကောံအလဵုအသဳတံသၟးပါလုပ်တုဲ ဂကောံမှာဇန်နာနာ၊ က္ဍိုပ်သ္ကိုပ်ဂကောံနာနာတံဟွံပါလုပ်ဂှ် ဒှ်ဟွံထေက်၊ သ္ပပၞညံၚ်ရဴဒဂေတ်မံၚ်အခေါၚ်အရာမၞိဟ်ဂးတုဲ ဒက်ပ္တန်လဝ်ရောၚ် သာ်ဝွံ နာဲအဲမန် ညးတာလျိုၚ် ကံက်တၚ်နၚ် ဂကောံအခေါၚ်အရာမၞိဟ်အပ္ဍဲဍုၚ်မန် ဟီုရ။

“ဂကောံဏံဂှ် ထ္ၜးလဝ်ကၞုဲတုဲ အာတ်သ္ၚုရ၊ ဗီုပြၚ်ဂကောံမၞိဟ်ဗြဴ၊ ဂကောံမၚ်မွဲရံၚ်စံၚ်မိကေုာံ ကောန်ၚာ်တံကီုရ။ နကဵုဍုၚ်ဗၟာဂှ် ဟိုတ်နူထပက်လဝ်စၟတ်တဲ ပ္ဍဲ“သဳဒဝ်” ကီုတုဲ သၟဝ်တဲအလဵုအသဳမွဲမွဲ ဂကောံအခေါၚ်အရာမၞိဟ်တံ ဒးနွံကီုရောၚ်၊ ဆၜိုတ်ဂွံထ္ၜးစရုပ်ရဴဟေၚ် သ္ပလဝ်အယောၚ်အလာ ဗီုပြၚ်ဏံရ” သာ်ဝွံ နာဲအဲမန် ဟီုရ။

လၟုဟ်အလဵုအသဳတံဝေၚ်ဒၟံၚ်ပၞာန်ပ္ဍဲဒေသကောန်ဍုၚ်အရၚ်တံတုဲ ပရေၚ်ဖံက်ပကဝ်အခေါၚ်အရာမၞိဟ် ကတဵုဒှ်မံၚ်နာနာသာ်ဏံဂှ် အလဵုအသဳတၟိဏံ ပံက်ခၞံပ္တန်ဂကောံအခေါၚ်အရာမၞိဟ်တံဟီုဂှ် ဍာံဍာံပြပြဒှ်ဟွံမာန် သွက်သ္ဂောံဒမၠုမတ်အမာတ်ကလုတ်တံ ဒှ်မာန်ရောၚ် သာ်ဝွံ ညးစိုပ်ဒၟံၚ်ဍုၚ်သေံ နူဂကောံအခေါၚ်အရာညးဗြဴကချေန် ယှေဝ်ဠဳသိုၚ် ဟီုရ။

“ပံက်ဂကောံဍာံဍာံပြပြဂှ် ညိလေဝ်ဒှ်ဟွံမာန်၊ လၟုဟ်ဒပ်ပၞာန်ဗၟာတံ ထပက်ဒၟံၚ်ပၞာန်ဒေသကချေန်၊ ဂစိုတ်ဂမျိုၚ်က္တဵုဒှ်ဒၟံၚ်၊ ပလီုပလာ်ကောန်သမ္ဘာတံ ကၠောန်သ္ပဒၟံၚ်ဖိုအ်တုဲ ပံက်ဂကောံဏံဟီုဂှ် သွက်ဂွံထ္ၜးစကဵု ဍုၚ်သအာၚ်သက်သက်ရ” သာ်ဝွံ ယှေဝ်ဠဳသိုၚ် ဟီုရ။

အခါလၟုဟ်ပ္ဍဲဒေသကချေန်တံက္တဵုဒှ်ဒၟံၚ် ပရေၚ်ပလီုပလာ်ကောန်သမ္ဘာ လ္တူကောန်ၚာ်ညးဗြဴကောန်ဂကူ ကချေန်တံဂှ် ဂၠိုက်ဂၠာဲထမံက်ပတိတ်တုဲ ပရေၚ်ကေတ်အရေဝ်ကဵုဒုဟ်ဒဏ်တံ ကၠောန်ထ္ၜးကဵုမာန်မှ ဒှ်ဂၠံၚ်တရဴအခေါၚ်အရာမၞိဟ်ဍာံပြရောၚ် ဒါရိုက်တာ အံၚ်မျဵုမေန် ဆက်ဟီုရ။

လိခ်အမိၚ် နအဖ (၅၃/၂၀၀၇) ဂိတုနဝ်ဗေန်ပါ ၁၄၊ ၂၀၀၇ ဂှ်တးပါဲကၠေံတုဲ နကဵုသမ္မတအလဵုအသဳတၟိလၟုဟ် ကလေၚ်ပတိတ်အမိၚ် နကဵုလၟိဟ်လိခ်လလောၚ် (၃၄/၂၀၁၁) တၟိရ။