မာံသုတ – ညးအုပ်ကာတြေံ ဂကောံလိခ်ပတ်ယေန်သၞာၚ်မန် နာဲတေန်ထောန် အာယုက် (၅၅) သၞာံဝွံ ဂိတုဂျူလာၚ် (၁၈) ဏံ အခိၚ်သဝ်တ္ၚဲၜိုတ် (၈) နာဍဳဂှ် စုတိကလိလောန်အာ ပ္ဍဲရုၚ်ဂဥုဲဇၞော်ဍုၚ်လ္ဂုၚ် နကဵုယဲတၟအ် (ကျောက်ကပ်) ဂှ် ရဲကၟိန်အိန်ထံၚ်ညးတံ ဟီုလဴနၚ်ရ။
ပ္ဍဲဂိတုဂျူလာၚ် (၂၀) အခိၚ်ဒေါဝ်တ္ၚဲၜိုတ် (၁၂) နာဍဳဂှ် စံၚ်ဇွဂြဇုက်ရုပ်ခန္ဓနာဲတေန်ထောန် ဒၞာဲသုဿာန်ယေဝ်ဝေတုဲဒှ်အာ ဂွံတီရ။
နာဲတေန်ထောန်ဝွံ နကဵုှယၟုဟ်ကၞေဟ် “တၟိအး” ဂှ် ချူကၠုၚ်ပါန်ခဳကသူ၊ ရုပ်ကာတောန်နာနာ၊ ကဗျ၊ ဒွက်တံနွံရ။
တုဲပၠန် အပ္ဍဲဌာနဝန်ဇၞော်ပရေၚ်ပိုန်ဒြပ်ကဵု ကူသာန်သွံရာန်ဂှ် ကေတ်ဒၟံၚ်တာလျိုၚ် နကဵုညးသ္ကိုပ်ဌာနမွဲတုဲ ပ္ဍဲလိခ် “စီးပွားရေးသတၚ်းဂျာနယ် Commerce Journal” ဂှ်လေဝ် နဒဒှ် ဒုညးဒါန်လိခ်မွဲ ကေတ်ဒၟံၚ်တာလျိုၚ်ရ။
“ညးတေံဂှ် ပရေၚ်ဍုက်ကေဝ်သ္ကံရဲလေဝ်ဂၠိုၚ်၊ ပ္ဍဲပရေၚ်ပတိတ်လိခ်ပတ်တံဂှ်လေဝ် စီုသကီုကွေံကွေံ၊ ဟိုတ်နူဒှ်ရဲ သၞာဲဒဴအလဵုအသီတုဲ အခေါၚ်လုပ်ဂကောံပရေၚ်ဍုၚ်ကွာန်ဟၟဲကီုလေဝ် သွက်ဗော်ပရေၚ်ဍုၚ်ကွာန်ပိုဲဂှ် ဍိုက်က်ပေၚ်ၚ် ညးတေံရေၚ်တၠုၚ်ကဵုလဝ်ရ၊ ညးတေံမွဲစုတိအာဂှ် သွက်ဂကူမန်ပိုဲ ဒးဂဟောံကွေံကွေံရ” သာ်ဝွံ ဒုဥက္ကဌဗော်ဒဳမိုကရေဇြဳကောန်ဂကူမန် နာဲၚိုဲတိၚ် ဟီုရ။
နာဲတေန်ထောန်ဝွံ နကဵုကမ္မတဳဗဟဵုမွဲတၠပါလုပ်ကၠုၚ် ပ္ဍဲကဵုကမ္မတဳကၠောန်ဗျ္ဒ်တ္ၚဲကောန်ဂကူမန် လၟေၚ်သၞာံအဆက်က်တုဲ ပဝ်သတာရုပ်ဗါန်ကေုာံ ပလောအ်တဆိပ်မန်တံဂွံတိတ်မာန်ဂှ် ညးဖန်ဇန်ကၠုၚ်ရ။
နာဲတေန်ထောန်ဂှ် ဒှ်ဇာတိကွာန်ဝါဍောတ်၊ တ္ကအ်ခၟိုၚ်တုဲ ကတ်ကၠုၚ်ပညာပ္ဍဲဘာတက္ကသဵုမတ်မလီု အံၚ်ကၠုၚ်ဘာသာ BS,c (Phy)ရ။ ကာလညးတေံစုတိအာဂှ် သမ္ဘာမိဨဨမန် ကေုာံ ကောန်ဗၠာဲမွဲ၊ ကောန်ဝုတ်မွဲတၠသှေ်ဒၟံၚ်ရ။
