ဌာန်ပရိုၚ်ဗၠးၜးမန် – လ္တူဝန်ဇၞော်တွဵုရးဍုၚ်မန်ၜါတၠ (၁) ဒံက်တာမာံနဲသဵု ညးဒးဒုၚ်ရုဲစှ် နဒဒှ်ဝန်ဇၞော် ပရေၚ်မၞိဟ်ကေုာံယေန်သၞာၚ်၊ (၂) နာဲလွဳအံၚ် ဝန်ဇၞော်ဓာတ်လလဳတံ ဂွံကၠုၚ်ကဆံၚ်တာလျိုၚ် ပေၚ်စိုပ်ပွိုၚ် (၁၀၀) တ္ၚဲဂှ်မ္ဂး ညးဍုၚ်ကွာန်ကောန်ဂကူမန်တံ ပါ်ပါဲကဵုဏာလညာတ် အတိုၚ်ဗွဲသၟဝ်တေံရ။

နာဲကောတၠရတ်
သၟာပရေၚ်ဍုၚ်ကွာန်
“ဝန်ဇၞော်ၜါဏံဂှ် ဒၞာဲဂှ်ဂွံလဝ်ဖိုအ်ရ၊ ဆဂး ၜတ်ဒၟံၚ်ဏီတုဲ ပရေၚ်ချဳဒရာၚ်ညးတံဂှ် မုလေဝ်ဟွံဂွံ မံက်ဂတဝ်ကၠုၚ်ဏီရ၊ နကဵုကဆံၚ်လ္တူတေံ ဟွံကဵုလဝ်အဝဵုပေၚ်ၚ်တုဲ နာဲလွဳအံၚ်ဂှ် ၜိုန်ရဂွံ တာလျိုၚ်ဝန်ဇၞော်ဓာတ်လလဳ ဟီုကီုလေဝ် သွက်ညးဍုၚ်ကွာန်ပ္ဍဲတွဵုရးမန်တံဂှ် မုလေဝ်ဖန်ကဵုဟွံမာန်ဏီရ။ လၟုဟ်ဂှ်လေဝ် အလဵုအသဳတံ သ္ပလဝ်ကောံဓရီု သွက်ဂွံကလေၚ်ပါ်အဝဵု ကေုာံ သွက်ဂွံကလေၚ်ထိၚ်ထောံ အဝဵုဝန်ဇၞော်ၜါဏံမ္ဂး အခက်အခုဲ ပဵုတုဲဂၠိုၚ်ကၠုၚ်ရ” သာ်ဝွံ ညးဟီုရ။

မိအးသဇၚ်
အ္စာၝောံ ဌာနပညာဗော်ဍုၚ်မန်တၟိ
“စပ်ကဵုဝန်ဇၞော်ၜါဏံဂှ်တှေ် ညးတံဂှ် မဒှ်ပူဂဵုမၞံုကဵုပညာတုဲ နကဵုပိုဲမၞိဟ်ဍောတ်တ်တံဂှ် ဒးသ္ပအစာံလေဝ် ဒးသ္ပထေက်ရောၚ်၊ တုဲပၠန် အဓာန်ဂတ သွက်ဝန်ဇၞော်တံ ဂွံကၠောန်ဒတုဲဖဵု သွက်ကောန်ဂကူမန်ပိုဲဂှ်လေဝ် မၚ်စၟဳကေတ်မံၚ်တုဲ ညံၚ်ရဴကောန်ဂကူမန်ပိုဲ ဂွံဗၠးၜးကၠုၚ်မာန်ဂှ် ဝန်ဇၞော်တံကီု သီုပိုဲသၟတ်တံကီုဂှ် ညဳညဳသာသာ ရေၚ်တၠုၚ်ဂစာန်အာထေက်ကီုရ” သာ်ဝွံဟီုရ။

မာံသုတ
အ္စာကၞေဟ်
“ဒံက်တာမေန်နဲသဵုဂှ် စပ်ကဵုပရေၚ် သာသနာတုဲ ညးချဳဒရာၚ်မံၚ်ဂှ် ဂွံညာတ်ကေတ်ရ၊ ဆဂး အတိုၚ်မိမဍုၚ်ကွာန်သၟာဗ္ၚတအ် မပတံ ကွာန်ထုၚ်မၚ်တံ အာတ်မိက်ကၠုၚ်စပ်ကဵုဝါဗ္ၚဂှ် ညးတံလေဝ်ဖန်ကဵုဟွံမာန်ရ၊ ဒှ်ဒၟံၚ်ဗီုပြၚ် ၜိုတ်ဆထ္ၜးမံၚ်ရုပ်ရဴဟေၚ်ဂွံမာန်ရ” သာ်ဝွံဟီုရ။

နာဲထောန်
ညးမဒေါံဇူကၠုၚ်လဝ် မာန်နေဂျာ ဌာနပရေၚ်တဵုလွဳ
“ဝန်ဇၞော်ၜါဏံဂှ် နကဵုပရေၚ်ချဳဒရာၚ် မံက်က်ဂတဝ်ဝ်ဂှ် ဟွံဂွံဆဵုလဝ်ဏီရ၊ ၜိုန်ရအတိုၚ်ညးဍုၚ်ကွာန် ပ္ဍဲတွဵုရးဍုၚ်မန်တံ အာတ်မိက်လဝ် စပ်ကဵုပရေၚ်ပညာတံ ညးတံၜိုတ်ဆပတိုန်ထ္ၜးတုဲ မုလေဝ် ညးဍုၚ်ကွာန်တံ မုလေဝ်ဟွံကလေၚ်ဂွံသွဟ်ရ၊ ဟီုဗွဲသရောပ်မ္ဂး ပ္ဍဲပွိုၚ် (၁၀၀) တ္ၚဲဏံဂှ် မုလေဝ် ဟွံတၟေဟ်တၟဟ်ကၠုၚ်ဂှ် ဂွံညာတ်ကေတ်ရ” သာ်ဝွံ ညးဟီုရ။

မိချဵဨ
ကွးဘာတက္ကသဵု
“ဝန်ဇၞော်ၜါဏံဂှ် ကလိကၠုၚ်လဝ် ကဆံၚ်တာလျိုၚ် ပ္ဍဲပွိုၚ်ပိဂိတုပြၚ်ဓဝ်ဂှ် အခိၚ်အောန်မံၚ်ဏီတုဲ မုလေဝ် ပရေၚ်ပြံၚ်သၠာဲဟွံမွဲကၠုၚ်ရ၊ ဆဂး ဝန်ဇၞော်ၜါဏံဂှ် ဒှ်ဒၟံၚ်ကောန်ဂကူမန်ရတှေ် သွက်အဓာန်ဂတမ္ဂး သွက်ဂကူမန်တံ ပရေၚ်ပညာကီု ပၟတ်လေဝ်ကီုဂှ် ညံၚ်ဂွံတဴတက်အာဂှ် ညးတံလေဝ်ဂစာန်ဒၟံၚ်ကီုရောၚ် အဲညာတ်သာ်ဏံရ” သာ်ဝွံ ညးဟီုရ။

သၟာဗ္ၚပ္ဍဲတွဵုရးဍုၚ်မန်မွဲတၠ
“သွက်ပိုဲ ရဲသၟာဗ္ၚတံဂှ် နကဵုဍိုက်က်ပေၚ်ၚ်ဂှ် မုလေဝ် ညးတံဖန်ကဵုဟွံမာန်ဏီပုဟ်၊ သွက်အဓာန်ဂတးဏံလေဝ် ပိုဲတံ ဟွံဂံၚ်စၟဳစပုဟ်၊ မုဟိုတ်ရောဟီုတှေ် နူကဵုအလဵုအသဳတၟိတံ ရပ်လဝ်ဇုက်တုဲ အတိုၚ်ပၟိက်ဆန္ဒ ညးဍုၚ်ကွာန်တံကီု ရဲသၟာဗ္ၚတံကီုဂှ် ဝန်ဇၞော်ၜါဏံဂှ် မုလေဝ် ညးတံ ဖန်ကဵုဟွံမာန်ပုဟ်” သာ်ဝွံ ညးဟီုရ။