နာဲမာန် – ဂကောံဇာတ်မန်ဂမၠိုၚ် သွက်ဂွံလှေ်ပ္ဍဲအခိၚ်လိုက်ဝှ်ဏံဂှ် နူအခိၚ်လၟုဟ် စန်ပကောံမံၚ်ကောန်သၟိၚ် ကောန်သၟိၚ်ဗြဴနွံတုဲ ပ္ဍဲကဵုကောန်သၟိၚ်ဇၞော်လ္ၚဵု ပရေၚ်အပြံၚ်အလှာဲဇာတ်နွံမံၚ်ရ။ 

ပေဲါဇာတ် ဆာန်ညဳဆာန် ( ဗီု-ဌာန်ပရိုၚ်ဗၠးၜးမန်)

အတိုၚ်ကောန်သၟိၚ် နူဇာတ်ဟံသာထဝ် မာံလွဳမန် လဴထ္ၜးဂှ် “ညးက္ဍိုက်ပ်ဇာတ် ကောန်သၟိၚ်ဇၞော် “ဆာန်ဇေတ်”ဂှ် သၞာံဏံစိုပ်အာဇာတ်ပိုဲ ဟံသာထဝ်ယျ၊ တုဲတှေ် ပ္ဍဲကဵုဇာတ်ကောန်သၟိၚ်ထ္ၜးဇာတ်ဇၞော် “စၠန်” ဂှ်လေဝ် ပြံၚ်စိုပ်အာဇာတ်ပိုဲကီု” သာ်ဏံ ကောန်သၟိၚ်ဂှ် လဴကဵုရ။

ကောန်သၟိၚ်တၞဟ်ဟ်လေဝ် သွက်ဂွံပြံၚ်လှာဲနွံမံၚ်ကီုရ။ လၟုဟ်မ္ဂး ကောန်သၟိၚ်တအ်ကီု ကောန်သၟိၚ်ဗြဴတအ်ကီု အဃောအစာဇာတ်တအ် ပကောံမံၚ်ရောၚ် သာ်ဏံ ကောန်သၟိၚ်ဍောတ် မာံလွဳမန်ဂှ် ဆက်လဴကဵုရ။

ဇာတ်မန်ဒယှ် “မန်ချေတ်သဵု” ဟွံမွဲတုဲ ဇာတ် “ဆာန်ညဳဆာန်” ဝွံ ဒှ်ဇာတ်ဒယှ် အကြာပုရိသာတ်မန်တံရောၚ် ညးဍုၚ်ကွာန်မန်တံ ဟီုရ။

ဇာတ်ဒယှေ်ယှေ် ဗီုကဵု ဇာတ်ဆာန်ညဳဆာန်တံမ္ဂး ပွိုၚ်မွဲသၞာံ ဂွံလှေ်ဒၟံၚ် ကၠံဗ္တံပြၚ်ပြၚ်ဒှ်တုဲ ဇာတ်လ္ၚဵုတံဂှ် ဂွံတိတ် ကဵုစှော်ဗ္တံတံလေဝ် နွံဗွဲမဂၠိုၚ်ရ။

အကာဲအရာပေဲါဇာတ်မန် အပ္ဍဲဍုၚ်မန် သၞာံတုဲကၠုၚ်ဂှ် ဂွံလှေ်ဗ္တံဟွံပရေံကွေံကွေံပုဟ် သာ်ဏံ ညးက္ဍိုက်ပ်က္တဵုဟရိုၚ် ပေဲါဇာတ် မၞိဟ်သြန် “I သဝ်ရဳ” လဴထ္ၜးကဵုရ။

ဇာတ်မန်အပ္ဍဲဍုၚ်မန်ဝွံ နွံၜိုတ် ၁၀ ဇာတ်ဒှ်ဒၟံၚ်တုဲ သၞာံတုဲကၠုၚ်ဂှ် ဇာတ်ဆာန်ညဳဆာန်ဂှ် ဒှ်ပေါဲဇာတ်ဒယှေ်၊ မိမညးဍုၚ်ကွာန်မန်တံ ဒးစိုတ်အိုတ်ရောၚ် ဂွံတီကေတ်ရ။

သွက်သၞာံ ၂၀၁၁ ဏံ ဇာတ် “ဆာန်ညဳဆာန်” ဝွံ သွက်ပုရိသာတ်မန်တံ ညံၚ်ဂွံတၟေၚ်၊ ခိုဟ် ညံၚ်ပုရိသာတ်တံ ဂွံဒုၚ်တဲမာန် အတိုၚ်ပၟိက်စိုတ် ပုရိသာတ်တံနွံဂှ် ဟဍိုက်ဟပေၚ်အာကဵုဏောၚ်ဂှ် ကောန်သၟိၚ်ဇၞော် ဆာန်ညဳဆာန် ဟီုလဝ်ကဵု ဌာန်ပရိုၚ်ဗၠးၜးမန်နွံရ။

သၞာံဏံ သွက်လိုက်ဝှ်ဏံဂှ် ဇာတ်လ္ၚဵု ဒှ်မံၚ်ပရေၚ်အခက်အခုဲကဵုသြန်နွံတုဲ ဇာတ်မန်သွက်ဂွံယျအ်နွံမံၚ်ရောၚ် ဂှ်လေဝ် ပရိုၚ်အကြာကောန်သၟိၚ်တအ် တိတ်မံၚ်နွံရောၚ်။ ဆဂး ဇာတ်လဵု ဒှ်မာန်ဂှ် ဟွံတီချိုတ်တ်ပၠိုတ်တ်ဏီရ။

ပရေၚ်ဇာတ်မန်ဖအိုတ်ဂှ် သွက်ဂွံဓမံက်ရုပ်ရဴပရေၚ်ကမၠောန်ဂကောံဇာတ်မန်ပံၚ်ကောံတုဲ ခြာဟွံလအ်သတ္တဟတုဲ ကၠုၚ်ဂှ် နူကဵုဂကောံပံၚ်ကောံလိက်ပတ်ယေန်သၞာၚ်မန် ကော်ကောံဓရီုဂကောံဇာတ်မန်ပံၚ်ကောံကဵု ဂဳတမန်ပံၚ်ကောံပ္ဍဲဍုၚ်မတ်မလီုတုဲကၠုၚ်နွံရ။

ပ္ဍဲကောံဓရီုဂှ် သ္ၚဳဂၠိပ်ပရေၚ်ကမၠောန်ဇာတ်မန်ကီု ဂကောံဂဳမတမန်ကီု ပရေၚ်သၞောတ်ဝ်ပေဲါဇာတ်တအ်ကီု နွံရောၚ် ကောန်သၟိၚ် တိုန်စိုပ်ကောံဓရီုဂှ်မွဲတၠ လဴကဵုရ။