အာကာ – သွက်သ္ဂောံဗၟံက်ရုပ်ရဴ ဒဳမဵုကရေဇြဳ ကေုာံ သွက်ပရေၚ်ဂကူမ္ဂး ပၟိက်ဆန္ဒ သွက်သ္ဂောံပံၚ်တောဲကၠောန်အာ ကေုာံဗော်ဒဳမဵုကရေဇြဳ အလုံရးမန် AMDP နွံရောၚ်ဂှ် ဗော်ဒဳမဵုကရေသဳ ကောန်ဂကူမန် MNDF ဟီုရ။
ဒု-ဥက္ကဌ ဗော်ဒဳမဵုကရေသဳ ကောန်ဂကူမန် နာဲၚိုဲသိၚ်
“စပ်ကဵုဒဳမဵုကရေဇြဳတှေ် ညးလဵုဟွံဟီု ပံၚ်တောဲမာန်မံၚ်။ တုဲတှေ် သွက်ပရေၚ်ဂကူတှေ် ကဵုဗော်မန်တၟိလေဝ် သွက်ဂွံပံၚ်တောဲကၠောန်ဂှ် ဟွံဇြိုၚ်စိုတ်ပုဟ်” သာ်ဝွံ ဒု-ဥက္ကဌ ဗော်ဒဳမဵုကရေသဳ ကောန်ဂကူမန် နာဲၚိုဲသိၚ် ဟီုရ။
ဟိုတ်နူဟွံဒုၚ်တဲ သၞောဝ်သဇိုၚ်ဍုၚ် ၂၀၀၈ တုဲ ဗော်ဒဳမဵုကရေသဳ ကောန်ဂကူမန်ဂှ် ဟွံပတိုန်စရၚ်ဗော် (မှတ်ပုံတၚ်) ပ္ဍဲပေဲါရုဲမာဲ ၂၀၁၀ ကီုလေဝ် ဟွံဒစဵုဒစးကၠုၚ် လတူဗော်ဒဳမဵုကရေဇြဳ အလုံရးမန်ရောၚ်ဂှ်လေဝ် နာဲၚိုဲသိၚ် ဟီုရ။
“အတိုၚ်ဓရ်ပတှေ်ဇကု ဇကုကၠောန်မာန်မံၚ်၊ နဲညးကဵုညးလေဝ် ကၠောန်ကေတ်ဂွံမံၚ်။ ပိုဲသက်ဂွံဒစဵုဒစး မုလေဝ် ဟွံမွဲပုဟ်” သာ်ဝွံ နာဲၚိုဲသိၚ် ဟီုရ။
ကိုပ်ကၠာနူ ဟွံစိုပ်ပေဲါရုဲမာဲ ၂၀၁၀ ဏီဂှ် သွက်သ္ဂောံ ဖျေံသ္ဂုတ်သွာတ် စပ်ကဵုပေဲါရုဲမာဲတုဲ က္ဍိုပ်သကိုပ်မပါလုပ် ပ္ဍဲဗော်ဒဳမဵုကရေသဳ ကောန်ဂကူမန် ကေုာံ က္ဍိုပ်သကိုပ်မန် မၞုံအပ္ဍဲဍုၚ်လ္ၚဵု၊ ညးတာလျိုၚ် ဗော်ဍုၚ်မန်တၟိ ဒေံါဇူလ္ၚဵု၊ သၞာဲဒါအလဵုအသဳ ဒေံါဇူလ္ၚဵုတံ စဒက်ပတန်ကၠုၚ် ဂကောံကမ္မတဳ ၁၅ တၠ ပ္ဍဲသၞာံ ၂၀၀၉ ဂိတုဂျုန်အိုတ်တေံတုဲ ပ္ဍဲသၞာံ ၂၀၁၀ ဂိတုမာတ်ချ်ဂှ် ဟွံလုပ်ပေဲါရုဲမာဲရောၚ် ဖျေံကၠုၚ်သ္ဂုတ်သွာတ်ရ။ ဟိုတ်နူဂှ်တုဲ ညးမမိက်လုပ်ပြိုၚ်ပကာန် ပ္ဍဲပေဲါရုဲမာဲတံဂှ် ပ္ဍဲဂိတုအေဗရာ ရ ဒက်ပတန်ကၠုၚ် ဗော်ဒဳမဵုကရေဇြဳ အလုံရးမန်တုဲ ဗော်ပရေၚ်ဍုၚ်ကွာန်မန် အပ္ဍဲဍုၚ် ဒှ်ကၠုၚ် ၂ ဗော်ရ။
လၟုဟ် ဗော်ဒဳမဵုကရေသဳ ကောန်ဂကူမန် MNDF ဂှ် ပံၚ်ကောံကဵု ဗော် NLD ကေုာံ ဗော်ကောန်ဍုၚ်အရၚ် ဟွံလုပ်ပေဲါရုဲမာဲတုဲ ချဳဒရာၚ်မံၚ် ပ္ဍဲကမ္မတဳ သ္ပစၞး ကၠတ်ထဝ် CRPP၊ ပ္ဍဲဂကောံမဟာမိတ် ညဳသၟဟ် ဂကူကောန်ဍုၚ်အရၚ် UNA တုဲ ဗော်ဒဳမဝ်ကရေဇြဳ အလုံရးမန် AMDP ဂှ် ပံၚ်ကောံကဵု ဗော်ကောန်ဍုၚ်အရၚ် လုပ်ပေဲါရုဲမာဲတုဲ ချဳဒရာၚ်မံၚ် ဗီုပြၚ်ညးကဵုညးအိုတ်ရ။
ဗော်ကောန်ဍုၚ်အရၚ် ၈ ဗော် မပါလုပ် သီုဗော်မန် MNDF မလုပ်ပြိုၚ်ပကာန်လဝ် ပ္ဍဲပေဲါရုဲမာဲ သၞာံ ၁၉၉၀ တံဂှ် အလဵုအသဳတံ သွက်သ္ဂောံသ္ပစၟတ်သမ္တီကဵု ညးတံ နဒဒှ် ဗော်ပရေၚ်ဍုၚ်ကွာန် လုပ်အဝေါၚ်သၞောဝ်ကီု သီုအကာဲအရာ ဒးဒုၚ်ဖံက်ဖကဝ် အခေါၚ်အရာမၞိဟ် ပ္ဍဲတိဍာ် ကောန်ဍုၚ်အရၚ် ဒှ်မံၚ်ပေဲါပၞာန် ကေုာံ သွက်သ္ဂောံဗလးကဵု ကောန်ထံၚ် သၟာပရေၚ်ဍုၚ်ကွာန်ကီု မပ္တံတၚ်ပန်တၚ်ဂှ် ပ္ဍဲဂိတု အဝ်ဂါတ် ၂၄ ဏံ ပတိုန်ထ္ၜးလဝ်ကဵု ညးစၞးတၟေၚ် အခေါၚ်အရာမၞိဟ် ကုလသမဂ္ဂ မဆေၚ်စပ်ကဵုဍုၚ်ဗၟာရ။
လၟုဟ် ပ္ဍဲဗော်မန် MNDF ဂှ် ကောံဂကောံ နွံမံၚ်ဗွဲမဂၠိုၚ်တုဲ ကော်ကောံဓရီု လၟေၚ်လၟေၚ်တုဲ ချဳဒရာၚ်မံၚ်ရောၚ်ဂှ်လေဝ် နာဲၚိုဲသိၚ် ဟီုရ။
ဗော်ဒဳမဵုကရေသဳ ကောန်ဂကူမန်ဂှ် ပ္ဍဲသၞာံ ၁၉၈၈ ဂိတု အံက်တဝ်ပါ ၁၁ တေံ စဒက်ပတန်ကၠုၚ်လဝ်တုဲ ပ္ဍဲပေဲါရုဲမာဲ ၁၉၉၀ ဂှ် လုပ်ပြိုၚ်ညးစၞး ၁၉ ဒၞာဲ ဇၞးကၠုၚ် ၅ ဒၞာဲရ။ ပ္ဍဲသၞာံ ၁၉၉၁ ဂှ် က္ဍိုပ်သကိုပ်ဗော်တံ ဒးဒုၚ်ရပ်တုဲ ပ္ဍဲသၞာံ ၁၉၉၂ ဂိတုမာတ်ချ် ၁၉ ဂှ် အလဵုအသဳပၞာန်တံ ပလီုထောံဗော်ရ။
