မိလျးထဝ် – ဂကောံကမ္မတဳပံၚ်ကောံမန် ဍုၚ်သၟာၚ် (OMCC) ကီု သဘာပတိဂကောံပံၚ်ကောံပရေၚ်ဂကူမန် (MAU) ကေုာံ ဥက္ကဌဂကောံညဳသၟဟ်ဂကူမန် (MUL)တံကီု ပ္ဍဲကဵုတ္ၚဲဏံ ပလံၚ်ဗစိုပ်လိက်သဝဏ်လၞီအောန်စိုတ် ကုနာယက ဂကောံမန်ဍုၚ်အဝ်သတေလျာ နာဲတာန်တေန် စုတိအာလဝ်ဂှ်ရ ။

အ္စာတာန်တေန်ဝွံ အတိုၚ်ဂွံဆဵုညာတ်ကၠုၚ်လဝ် ညးဂှ်မ္ဂး ကေၚ်ကတ်လဝ် လိက်ပရိယတ္တိကီု၊ ဗှ်လိက်စပ်ကဵု ပရေၚ်ဍုၚ်ကွာန်ဂၠိုၚ်ကီုတုဲ ဒှ်အ္စာပရေၚ်ဍုၚ်ကွာန်ခိုဟ်မွဲ ကီုရ သာ်ဝွံသဘာပတိ(MAU) ကေုာံ ဥက္ကဌ(MUL) နာဲသုန်ဓုန် ဟီုရ။

“အ္စာပရေၚ်ဍုၚ်ကွာန်မန် ခိုဟ်ဟ်မွဲ၊ မၞိဟ်ဒုၚ်ကၠုၚ်ဒဒိုက် သွက်ဂကူမန်မွဲ ဒးပြဟ်လလုဲအာဂှ် ဂိုဟ်ကဟောံဗွဲမလောန်ရ” သာ်ဝွံ ညးဆက်ဟီုရ။

တုဲပၠန် အ္စာတာန်တေန်ဝွံ ဒှ်မၞိဟ်မစွံဂုဏ်ဖဵုဂကူ ဂတဂုဏ်ဖဵုဇကု ညးမွဲ၊ ဒှ်မၞိဟ်ပတှေ်စှေ်စိုတ် လ္တူကမၠောန်ဗၠးၜးဂကူမန်တုဲ မကၠောန်ကၠုၚ်ကမၠောန် သွက်ဂကူမန် မွဲလအိတ်အာယုက် ညးရောၚ် သာ်ဝွံဂကောံ (OMCC) တံ ပ္ဍဲချူပလံၚ်လိခ် လၞီအောန်စိုတ်ဂှ် ထိုၚ်သးလဝ်ညး သာ်ဏံရ။

ဆဂး ၜိုန်ရ အ္စာပရေၚ်ဍုၚ်ကွာန်မန်ပိုဲတံ ဒးပြဟ်လလုဲအာကီုလေဝ် တိုၚ်ပ္ကဴညးတံ ဒက်ပတန်လဝ်ဂှ် ပိုဲအာဟွံစိုပ်ဏီဟီုကီုလေဝ် ပိုဲသ္ပအစာံကဵု ပရေၚ်ဆဵုဂဗ က္ဍိုပ်သ္ကိုပ်ပိုဲတံတုဲ ကောန်ဗွဲကြဴစဴဗွဲဂတတံညးဂမၠိုၚ် ညဳညဳသာသာ ဂိုတ်ဂစာန်ကၠောန်အာပရေၚ်ဂကူမန် ဒဵုကဵုဗၠးၜးရောၚ် သာ်ဝွံ နာဲသုန်ဓုန် ဟီုရ။

အ္စာတာန်တေန်ဂှ်ဝွံ ပ္ဍဲဂိတုအဝ်ဂေတ် ၃ သၞာံ ၂၀၁၁ အခိၚ်ပယာံသဝ်တ္ၚဲ ၈ နာဍဳကဝါ်ဂှ် စုတိကလိလောန်စဴအာ ဘဝပလိုက် ပ္ဍဲရုၚ်ဂဥုဲဍုၚ်ကန်ပါရ်ရာ ဍုၚ်အဝ်သတေလျရ။

နာဲတာန်တေန်ဝွံ ပ္ဍဲသၞာံ ၁၉၇၄ ဂှ် လုပ်ကၠုၚ်ဗော်ဍုၚ်မန်တၟိတုဲ ဒးဒုၚ်ရုဲစှ်ကၠုၚ် နဒဒှ်ကမ္မတဳဗဟဵုမွဲတၠကီုလေဝ် ပ္ဍဲသၞာံ ၁၉၉၅ ဂှ် ဗော်ဍုၚ်မန်တၟိကဵု အလဵုအသဳပၞာန်တံ ကြဴနူ တုပ်စိုတ် ပရေၚ်ဒေံါပန်ပှော်တုဲ နုက်တိက် နူဗော်ဍုၚ်မန်တၟိရ။ ပ္ဍဲသၞာံ ၂၀၀၁ ဂှ် နာဲတာန်တေန်ကဵု သ္ၚိကၟိန်ကောန်ဇာတ်ညးတံ သီုဖအိုတ် ဆုဲပြံၚ်အာ ဍုၚ်အဝ်စတေလဳယျာတုဲ ဒှ်ကၠုၚ် နယက ဂကောံမန်အဝ်သတေလျရ။