မာံသုတ – သွက်အလုံဍုၚ်မွဲ ပရေၚ်ၜိုဟ်လလမ် ဂွံမံက်ဂတဝ်မာန်ဂှ် အဓိက ဒှ်မံၚ်တာလျိုၚ် သမ္မတဥူတိၚ်သိၚ် ဟေၚ်ရ သာ်ဝွံ ဒုဥက္ကဌဗော်မန်ဒဳမဝ်ကရေဇြဳကောန်ဂကူမန် နာဲၚိုဲတိၚ် ဟီုလဴကဵုဌာန်ပရိုၚ်ဗၠးၜးမန်ရ။

ဒုဥက္ကဌဗော်မန်ဒဳမဝ်ကရေဇြဳကောန်ဂကူမန် နာဲၚိုဲတိၚ်

“ညးတေံဂှ် ပ္ဍဲအလဵုအသဳလၟုဟ် ဒှ်မၞိဟ်ဇၞော် တာလျိုၚ်ဇၞော် အိုတ်ရ၊ ယဝ်ရ ဥူတိၚ်သိၚ် ဟွံဓမံက်ရုပ်ရဴတှေ် ကမၠောန်ဏံဟွံဒှ်” သာ်ဝွံ ညးတေံဟီုရ။

လောန်ကၠုၚ် ဂိတုဂျူလာၚ်သတ္တဟလက်ကြဴအိုတ်ဂှ် ကာလဒဝ်အံၚ်သာန်သုကျဳကဵု ဝန်ဇၞော်ဥူအံၚ်ကျဳတံ ဆဵုဂဗသဳကၠဳလဝ် ညးသ္ကံဂှ် မုဟီုဂးလဝ်ဂှ် ဟွံဂွံတီကီုလေဝ် ဂိတုအဝ်ဂေတ် ၂၂ ဏံ ကာလကၠောန်သ္ပ ကောံဓရီုစၠတ်ထဝ်မဂး စပ်ကဵုပရေၚ်ၜိုဟ်လလမ်ဍုၚ်ဂှ် ချပ်သဳကၠဳညးသကအ် နွံရောၚ် နာဲၚိုဲတိၚ် ဆက်ဟီုရ။

ညးမကေတ်လဝ်တာလျိုၚ် နာယကဇၞော် ကမ္မတဳကၠောန်ဗ္ဒျ် သဘၚ်တ္ၚဲကောန်ဂကူမန် (ဗဟဵု) နာဲတေန်အံၚ်ဂှ် “ကိစ္စဓမံက်ဂတဝ်ပရေၚ်ၜိုဟ်လလမ် လဇုဲအာ မွဲတ္ၚဲတှေ် ကိစ္စပရေၚ်ဒဳမဝ်ကရေဇြဳလေဝ် ဂိအာမွဲတ္ၚဲ သၟးဟွံက ပရေၚ်တဴတက်ဍုၚ်လေဝ် ဒးဒုၚ်ဂိအာ မွဲတ္ၚဲပၠန်ဏောၚ်၊ ဟိုတ်ဂှ်ရ သွက်ပရေၚ်ဒဳမဝ်ကရေဇြဳ ဂွံမံက်ဂတဝ်တိုန် ပရေၚ်ၜိုဟ်လလမ် ညံၚ်ဂွံဒှ်ဂှ် နကဵုအလဵုအသဳလၟုဟ် ဒးကၠောန်ကဵု ပြဟ်ဟ်ထေက်၊ ယဝ်ရ ဒဝ်အံၚ်သာန်သုကျဳ ပါလုပ်မာန်မ္ဂး ပဵုတုဲ ကလိတ်ကလောတ် ဂၠိုၚ်တိုန်ဏောၚ်” သာ်ဝွံဟီုရ။

ကာလဒပ်ပၞာန် ဗော်ကောန်ဍုၚ်အရၚ်တံ တက်ကျာပရေၚ်ဒေါအ်ပန်ပှော်ဂှ် အာတ်မိက်ကၠုၚ် ပရေၚ်သဳကၠဳ သောၚ်ကလး ပရေၚ်ဍုၚ်ကွာန် ကၠာလေဝ် ဂတတေံမှ သွက်ဂွံတက်ကျာကဵုအလဵုအသဳတၟိ သာ်ဝွံ နအဖတံ ဟီုဂးကၠုၚ်လဝ်ကီုလေဝ် လၟုဟ် ဒက်ပ္တန်အလဵုအသဳတၟိကၠာလေဝ် အစဳဇန်ပရေၚ်သဳကၠဳဓရ်ၜိုဟ်လလမ်ဂှ် ဖန်က်ကၠုၚ်လဝ် ဟွံမွဲသၟးဟွံသေၚ် ပေါဲဗ္တိုက်တအ် ကလေၚ်က္တဵုဒှ်ကၠုၚ်ရောၚ် သာ်ဝွံနာဲတေန်အံၚ် သ္ၚဳဂၠိပ် ဟီုဂးဏာရ။

တုပ်ကဵု ပရေၚ်ဏံကီု ဥက္ကဌဗော်ဍုၚ်မန်တၟိ နာဲထဝ်မန်ဂှ်လေဝ် “နကဵုပရေၚ်ဍုၚ်ကွာန် ဟွံသောၚ်ကလး ဍိုက်ဖ္တိုက်ကဵုဒၟံၚ်ပၞာန်သၟးတှေ် နကဵုတာလျိုၚ်ပိုဲ ဒးဘိုၚ်ဗတိုက်ကဵု ရဲမဟာမိတ်ဂကောံ UNFC တံကီုဏောၚ် ဒှ်ကၠုၚ်တှေ် ပၞာန်အလုံဍုၚ်မွဲ ဂဵုသၞာန်တိုန်အိုတ်ဏောၚ်” သာ်ဝွံ ဟီုကဵုဌာန်ပရိုၚ်ဗၠးၜးမန်နွံရ။

ပ္ဍဲဂိတုဂျူလာၚ် ၂၈ ဂှ် ဒဝ်အံၚ်သာန်သုကျဳ ချူဗစိုပ်ပလံၚ်လိခ်ပံက်ထာၚ် ကုဇရေၚ်သမ္မတဥူတိၚ်သိၚ်၊ ဗော်သၠးပွးကချေၚ်(KIO)၊ ဗော်သွးကောန်ဂကူကရေၚ်(KNU)၊ ဗော်ဍုၚ်မန်တၟိ(NMSP)၊ ဒပ်ပၞာန်သေံဇၞော်(SSA)တံတုဲ ပဋိပက္ခပရေၚ်ပန်ပှော်က္တဵုဒှ်မံၚ်လၟုဟ်ဂှ် ၜိုဟ်ဟ်သြိုဟ်ဟ်ညံၚ်ဂွံ သောၚ်ကလးအာဂှ် ညံၚ်ဂွံဒေါအ်ပန်ပှော်ညးသ္ကံကီု သွက်ဂွံၜိုဟ်လလံ အလုံဍုၚ်မွဲမာန် ၜိုတ်အစောန်နွံ လုပ်ကၠောန်အာကဵုကီုရောၚ် သာ်ဝွံခ ျူတြးပလံၚ်ဗစိုပ်လဝ် ပ္ဍဲလိခ်ဂှ်ရ။