မိလျးထဝ် – ပ္ဍဲဂိတုအံက်တဝ်ဗာ ၂၁ လောန်ကၠုၚ်တေံဂှ်ဝွံ ဗိုလ်ဝေလေန်ဖျဝ် နူတမ်ဒပ် ခလရ (၃၁) ဖျေံလဝ်ဒပ်လ္တူဍုၚ် ခေါဇာဂှ်ဝွံ တံၚ်ဓဇက် ကောန်ကွးဘာမွဲတၠ သွက်ပလီုပလာ်ကောန်သမ္ဘာရဂှ် ဂွံတီနူရဲဒေသတံဂှ်ရ။
ကွးဘာတန်မူလ ဒေသရေဝ်သၠုၚ်ကျာတအ် အဃောစဴကၠုၚ်မံၚ်နူဘာ ( ဗီု - ဌာန်ပရိုၚ်ဗၠးၜးမန် )
မၞိဟ်ဒးဒုၚ်ဓဇက်ဂှ်ဝွံ အာယုက် (၁၂) သၞာံ ကောန်ကွးဘာ (၅) တန် မဒှ်ကောန်နာဲကောန်ဗစံက် ကေုာံ မိမျေတ် ဒှ်ကောန်ကွာန်ပါၚ်ကြုၚ်ခေါဇာရ။
အဃော မိအေလေန် ကွာ်စဴကၠုၚ်နူဘာ ကြုၚ်ကညာ အကြာဂၠံၚ်ဂှ်ဝွံ ဗိုလ်ဝေလေန်ဖျဝ်ဂှ် တံၚ်ဓဇက်ဍေံတုဲ ကျာန်ပလီုကောန်သမ္ဘာဍေံဂှ် ကွးဘာတၞဟ်ဟ်တံ ကၠုၚ်စိုပ်ဆဵုဒးတုဲ မုလေဝ် ဟွံဂွံသ္ပဟဂှ်ရ သာ်ဝွံ ရဲဒေသ ကွာန်ပါၚ်ကြုၚ်ခေါဇာ မၞိဟ်လုက်စုက်မွဲတၠဂှ် ဟီုရ။
“မိအေလေန်ဂှ် မုလေဝ် ဟွံဒှ်အာမွဲသာ်ရ။ အတိုၚ်မရုန်ဂစာန်လဝ်ဂှ်တှေ် ဗ္လောံကွးဘာဂှ် စာ်အာကီုရ၊” သာ်ဝွံ မၞိဟ်စုက်လုက်မွဲတၠ ဟီုရ။
စပ်ကဵုကိစ္စဏံတုဲ နကဵုဂကောံ အခေါၚ်အရာမၞိဟ်ဗြဴ ကေုာံ ကောန်ၚာ်တံလေဝ် ဗိုၚ်ရီုတုဲ ဗက်ဒၟံၚ်ပရူဏံဂှ်ရရောၚ်။
ညးတာလျိုၚ်ဂကောံအခေါၚ်ရာမၞိဟ်ဗြဴ ကေုာံကောန်ၚာ်မွဲတၠဟီုဂှ်တှေ် “နကဵုပိုဲဂှ် သွက်ကောန်ၚာ်ဂှ်တှေ် ဂစာန်တုဲ ဗိုၚ်ရီုအာကဵုရ၊ ညံၚ်ရဲဒေသတံဂှ် ဟွံဂွံ ပါ်ပဲါ၊ ညံၚ်ဂွံကၠိုဟ်ကေတ် လ္တူကောန်ၚာ်ဏံမာန်ဂှ် မွဲနဲကဵုမွဲနဲ ပိုဲတံ ဒးလလောၚ်တရးကဵု ရဲဒေသတံတီထေက်ရ” သာ်ဝွံ ညးဟီုရ။
နကဵုဗိုလ်ဝေလေန်ဖျဝ်ဏံဂှ်လေဝ် ယဝ်ရဟွံကဵုထောံ ဒုဟ်မွဲမွဲသာ်မ္ဂး ပရေၚ်ဗၠးၜးသွက်ကောန်ၚာ်ဂှ်ကီု၊ ညးတၞဟ်ကီုဂှ် ဒးက္တဵုဒှ်ဓဝိၚ်ရောၚ်၊ ဟိုတ်ဂှ်ရ နနဲဗဗွဲဓဝ် ညံၚ်ဂွံကဵုထောံ ဒုဟ်ကဵုညးမာန်ဂှ် ညးတံဂစာန်ကဵုရောၚ်။
ဗိုလ်ဝေလေန်ဖျဝ်ဂှ်ဝွံ သၞာံတုဲကၠုၚ်တေံလေဝ် ကေၚ်ကၠတ်လဝ်ထဝ် ပ္ဍဲကွာန်ဟံဂံတုဲရ၊ ဆဂး ညးမွဲလေဝ် ဟွံစွံစိုတ် ဟွံကဵုဒုဟ်မွဲသာ်တုဲ မံၚ်အာအတိုၚ်ဂှ်ရရောၚ်။
