မိလျးထဝ် – ပ္ဍဲပယျဵုသေံ-ဗၟာ ပွဳပွူဒေသကျာ်ပိဂှ် ဆုအောန်ကၠုၚ်တုဲ ကမၠောန်ပရိဘောဂတံ ဒှ်မံၚ်အခက်အခုဲရောၚ်ဂှ် ဂွံတီကေတ် နူတၠကမၠောန်ပရိဘောဂ ကောန်ဍုၚ်ကျာ်ပိတံရ။
ဆေၚ်ပရိဘောဂ ပ္ဍဲဍုၚ်ကျာ်ပိ( Photo- OMWO)
“ဆုကၠ၊ ဆုပြာန်တံဂှ် အောန်ကၠုၚ်ကွေံကွေံရ။ ဆုအပြောံတံလေဝ် သှေ်ဆသကုတ်ဂၠေံဂၠေံရ။ ဣဏံဂှ်လေဝ် ဒးအာရာန်ကေတ် မ္ၚးဍုၚ် ၜိုတ် ၁၀ တိုၚ်ပြၚ်ဏီ” သာ်ဝွံ တၠကမၠောန် ပရိဘောဂ မွဲတၠ ဟီုရ။
လၟုဟ်ဆုပြာန် မွဲတာန်မ္ဂး ၚုဟ်မံက်ဒၟံၚ် မွဲလက် ဒစာံလ္ၚီ (၁၈ ၀၀၀) ၜါတ်ကီုလေဝ် ရာန်ကေတ် ဟွံလောဲသွာရောၚ်ဂှ် ညးဆက်ဟီုရ။
“အဲကဵု ရဲအဲ ဗက်ကုတ်ရာန်ကေတ်ဆုအပြောံ ပ္ဍဲဂြိုပ် ၜိုတ်ၜါပိတ္ၚဲဂှ် ဂွံၜိုတ် ၂ လ္ၚီၜါတ်။ ပြဟ်ပြဟ်ဏံတှေ် တော်စကိတ်ဒၟံၚ်ညိ” သာ်ဝွံ ညးဗက်ဂၠာဲရာန်ဆု ပ္ဍဲဂြိုပ်မာကသ မွဲတၠ ဟီုရ။
အတိုၚ်လဟီုညးမ္ဂး ဆုအပြောံ မၞုံဇမၠိၚ် ၁ ပေမ္ဂး သွံရာန်စဂွံတုဲ မွဲတာန်မ္ဂး ၚုဟ်မး မၞုံ ၉၀၀၀ ၜါတ်ရောၚ် ဂွံတီကေတ်ရ။
“ပ္ဍဲဆေၚ်ပိုဲတှေ် သွံမံၚ်ကပေါတ်ကညောတ် ပရိဘောဂ ဍောတ်ဍောတ်သောဲသောဲ ညံၚ်ကဵုဗီုနာဍဳတံရ။ ကၠောန်ကဵုဆုဒကုတ်အပြောံဂၠေံဂၠေံဂှ်ရ။ ဒှ်မံၚ်ဆုအပြောံတှေ် ဗီုလဵုပတိုန်ပတိုန်အရံၚ် လအ်ညိ ပတိုဟ်တိုန်ကၠုၚ်တုဲ လဆောဝ်တှေ် ဖံက်သေဝ်ဇကု ကလေၚ်ပလံၚ်နၚ်လေဝ် နွံကီု။ လၟုဟ် တော်ဟွံကိတ်တုဲ ဒးဇူလဝ်ကမၠောန်ဏံ မွဲအံၚ်” သာ်ဝွံ တၠဆေၚ်သွံကပေါတ် ပရိဘောဂ မွဲတၠ ဟီုရ။
ဟိုတ်နူဒပ်ပၞာန်ဗၟာတံ ထပက်ဒၟံၚ်ပၞာန် ပ္ဍဲဂြိုပ်မာကသ တိဍာ်ဒပ်ပၞာန်ကရေၚ် (ကေအေန်ယူ) ဂှ်တုဲ သ္ပပ္တံနူသၞာံ ၂၀၁၀ ဂိတုဒဳဇြေမ်ပါဂှ် ဒပ်မဟာ (၆) ဒပ်ပၞာန်ကရေၚ်တံ ကၟာတ်ထောံဂၠံၚ်လှာဒကှ်-ကျာ်ပိတုဲ ကၟာတ်ထောံအခေါၚ်ပတိတ်ဆု ပ္ဍဲဂြိုပ်ဆုမာကသရ။
ကမၠောန်ကၠောန်ကပေါတ်ဆုတၟုဲဂှ် မဒှ်ကမၠောန် ပရေၚ်ပိုန်ဒြပ် အဓိက သွက်ဒေသပယျဵုကျာ်ပိတုဲ ကပေါတ်ဆုတၟုဲ မပ္တံကဵု ပရိဘောဂ၊ ဆုလးကၞဳ ပါကေတံဂှ် ဗွဲမဂၠိုၚ် နူဂၠံၚ်ကမၠတ် မွဲကဆံၚ် ပလံၚ်ပၠုပ်ဒၟံၚ် ဍုၚ်သေံရ။
