မာံသုတ – ဟိုတ်နူအခေါၚ်သၠးဒုဟ်ဒဏ် သမတ ဥူတိၚ်သိၚ်တုဲ ကောန်ထံၚ် ၆၀၀၀ ပြၚ် ဗၠးကၠုၚ်ဂှ် ဒုၚ်တၠုၚ်ရောၚ် က္ဍိုပ်သကိုပ်မန် နူဗော်နာနာတံ ဟီုကဵု ဌာန်ပရိုၚ်ဗၠးၜးမန်ရ။
ကောန်ထံၚ် သၟာပရေၚ်ဍုၚ်ကွာန်မန်ဂမၠိုၚ် ( ဌာန်ပရိုၚ်ဗၠးၜးမန် )
“ဗလးကဵု ကောန်ထံၚ်ဂှ် ဒုၚ်တၠုၚ်မံၚ်ရ။ ဆဂး မၞိဟ်ဇကု ဒးစိုတ်ဂှ်ရ ဇကုဗလးဂှ် ဒှ်ဟွံထေက်ရ။ ဗွဲတၟေၚ် ကောန်ထံၚ်ပရေၚ်ဍုၚ်ကွာန် နွံမံၚ်ပ္ဍဲထံၚ် သီုဖအိုတ် ဒးထပ်ဗလးကဵုထေက်ဏောၚ်” သာ်ဝွံ နာဲၚုဲသိၚ် ညးမဒှ် ဒုဥက္ကဌ ဗော်ဒဳမဵုကရေဇြဳ ကောန်ဂကူမန် ဟီုရ။
သအာၚ်နူဂှ်ပၠန် လၟုဟ် ထပက်မံၚ်ပၞာန် ပ္ဍဲတိဍာ် ကောန်ဍုၚ်အရၚ်တံဂှ် ဒေံါဇူထောံတုဲ သွက်သ္ဂောံလလောၚ်တြးကဵု ပရေၚ်ဒေံါပန်ပှော် အလုံကၟိန်ဍုၚ်မွဲကီု၊ သွက်ဂွံဒှ်ကၠုၚ် ပရေၚ်တက်ကျာသဳကၠဳ က္ဍိုပ်ဖဴပိမကီုဂှ် ပၟိက်ဇၞော်ရောၚ်ဂှ်လေဝ် ညးဆက်ဟီုရ။
“က္ဍိုပ်ဖဴပိမ” ဟီုဂှ် အလဵုအသဳလၟုဟ်၊ ဂကောံဇြဟတ်ဒဳမဵုကရေဇြဳ ကေုာံ ဗော်ကောန်ဍုၚ်အရၚ်တံ မမိက်သ္ဂးရောၚ်။
တုပ်တဴသာ်ဂှ်ကီု “ကောန်ထံၚ်ပရေၚ်ဍုၚ်ကွာန်လ္ၚဵု ဗၠးကၠုၚ်ဂှ် ပိုဲဒုၚ်တၠုၚ်၊ ဆဂး ထပ်ဗလးကဵု ကောန်ထံၚ်ပရေၚ်ဍုၚ်ကွာန် သှေ်မံၚ်တံညိဂှ် ဗော်ကောဒေံ ကောန်ဍုၚ်အရၚ်ပိုဲ အာတ်မိက်လဝ်” သာ်ဝွံ ဥက္ကဌ ဗော်ဒဳမဵုကရေဇြဳ အလုံရးမန် နာဲဇၞူမန် ကော် နာဲၚိုဲသိၚ် ဟီုရ။
သွက်သ္ဂောံဗလးကဵု က္ဍိုပ်သကိုပ် ကောန်ဍုၚ်အရၚ် မပ္တံကဵု ခေါန်ထောန်ဥူ ဒးမံၚ်ထံၚ် အာယုက်ဇမၠိၚ်ကီု က္ဍိုပ်သကိုပ်ကွးဘာ ၈၈ မပ္တံကဵု မေန်ကဝ်နာၚ်ကီု၊ သီုကောန်ထံၚ်ပရေၚ်ဍုၚ်ကွာန် သီုဖအိုတ်ညိဂှ် ပ္ဍဲဂိတုအံက်တဝ်ပါ ၁၅ ဗော်ကောဒေံ ကောန်ဍုၚ်အရၚ် ၅ ဗော် ပတိတ်လိက်လလောၚ်တြးတုဲ အာတ်မိက်လဝ် အလဵုအသဳရ။
ပ္ဍဲဗော်ကောဒေံ ကောန်ဍုၚ်အရၚ် ၅ ဗော်ဂှ် ဗော်ဒဳမဵုကရေဇြဳ ကောန်ဍုၚ်အရၚ်သေံ၊ ဗော်ဒဳမဵုကရေဇြဳ အလုံရးမန်၊ ဗော်တဴတက် ကောန်ဍုၚ်အရၚ် ယခေၚ်၊ ဗော်ဒဳမဵုကရက်တေတ် ဖလုၚ်-သဝဝ် ကေုာံ ဗော်ကောန်ဂကူချေၚ်တံ ပါလုပ်ရ။
တုပ်တဴသာ်ဂှ်ကီု ကေၚ်ကာဗဟဵု ဗော်ဍုၚ်မန်တၟိ နာဲယှိုဲတိၚ်လေဝ် “ ဗလးကဵု ကောန်ထံၚ်ပရေၚ်ဍုၚ်ကွာန် သီုဖအိုတ်ညိဂှ် အာတ်မိက်အလဵုအသဳရ။ ဒှ်သာ်ဏံမှ ကလေၚ်ဒက်ပ္တန် ပရေၚ်ဆာန်ကၟိန် ပ္ဍဲအနာဂတ်တေံမာန်ဏောၚ်” သာ်ဝွံ ဟီုရ။
ဗော်ဍုၚ်မန်တၟိဂှ် ဒေံါကၠုၚ်ပန်ပှော်ကဵု အလဵုအသဳပၞာန် ပွိုၚ် ၁၅ သၞာံပြၚ်ကီုလေဝ် သ္ပပ္တံနူ ဂိတုနဝ်ဝေမ်ပါ သၞာံတုဲကၠုၚ်ဏံဂှ် ဒေံါပန်ပှော် လီုကၠုၚ်ရ။ ပ္ဍဲဂိတုအံက်တဝ်ပါ ၆ ဏံဂှ် ညးစၞးဗော်ဍုၚ်မန်တၟိ ကေုာံ ညးစၞးအလဵုအသဳ တွဵုရးမန်တံ ဆဵုဂဗသဳကၠဳ ပ္ဍဲဍုၚ်ရေဝ်ကီုလေဝ် မုရဴမွဲလေဝ် ဟွံဂွံတၚ်တုပ်စိုတ်ရ။
ပ္ဍဲဂိတုဝှ်ပေၚ် (ဂိတုအံက်တဝ်ပါ ၁၂) ဂှ် အလဵုအသဳဗၟာ ကဵုအခေါၚ်သၠးဒုဟ်ဒဏ်တုဲ ဗလးကဵုကောန်ထံၚ် ၆၃၅၉ တၠကီုလေဝ် ကောန်ထံၚ်ပရေၚ်ဍုၚ်ကွာန် ယၟုဒယှ်တှ်တံ ဟွံပါလုပ်ရ။
ဗော်ဒဳမဵုကရေဇြဳ ကောန်ဂကူမန်၊ ဗော်ဒဳမဵုကရေဇြဳ အလုံရးမန်၊ ဗော်ဍုၚ်မန်တၟိတံဂှ် ဒှ်ဗော်သ္ပစၞး ကောန်ဂကူမန် အိုတ်ရ။
0 Comments