ရာၚ်မြဟ် – သွက်သ္ဂောံဒေံါဇူ ကိစ္စၜဳဇီုဨရာဝတဳဂှ် မသတဥူတိၚ်သိၚ် ပတိတ်လိက်သဝဏ်တုဲ ဟီုကၠုၚ်လဝ်ကီုလေဝ် ပြဟ်ပြဟ်ဏံ သွက်ဂွံဒေံါဇူ ကိုန်စဳဇန် ၜဳဇဵုဂှ် ဟွံဆဵုညာတ်ကေတ် အယောၚ်အလာဏီရောၚ်ဂှ် ဂကောံဆက်စၠောံဖောအ်ဗြေဝ် ပရေၚ်မၞိဟ်ကချေၚ် (KDNG) ဟီုရ။

ဟိုတ်နူဟွံဒေံါဇူ ကိုန်စဳဇန်ဏံဏီတုဲ ညးဒေသတံဂှ် ဟွံချိုတ်ပၠိုတ် သွက်အနာဂတ်ညးတံဏီတုဲ ကတဵုဒှ်ဒၟံၚ်ဓဝိၚ်ဏီရောၚ်ဂှ် တ္ၚဲဏံ KDNG ပတိတ်လိက်လလောၚ်တြး ကာမံက် မွဲတၞးရ။

“ကမၠောန်သိုၚ်ခၞံတံဂှ် ဟိုတ်နူဒှ်ဒၟံၚ်အခိၚ်ကသီုတုဲ လ္ၚဵုဂှ် ဒေံါဇူလဝ်နွံ။ ဆဂး လ္ၚဵုဂှ် ဟွံဒေံါဇူမွဲသာ် ဆက်ကၠောန်ဒၟံၚ်ဂှ် အဲဂွံဆဵုမံၚ်ဖိုဟ်” သာ်ဝွံ မိအနာန် နူ KDNG ဂှ် ဟီုရ။

ကပေါတ်အထံက်အရီု သွက်ကိုန်စဳဇန်ဂှ် သှေ်မံၚ်အတိုၚ်တြေံတုဲ ပတေၚ်လဝ်ဂီုကၠီုဖိုဟ်ရ။ သအာၚ်နူဂှ်ပၠန် ကမၠောန်ခဲါထဝ် ပ္ဍဲဒေသၜဳဇီုဂှ်လေဝ် ဆက်ကၠောန်ဒၟံၚ်ဖိုဟ်ရောၚ်ဂှ် ချူလဝ် ပ္ဍဲလိက်လလောၚ်တြးဂှ်ရ။

သအာၚ်နူဂှ်ပၠန် ပ္ဍဲဂိတုအံက်တဝ်ဗာ ၁၁ ဂှ် သၟာကမၠောန်ကြုက် မၞုံပ္ဍဲဒေသတံဂှ် ၜတ်ဒၟံၚ်တိ လပါ်သၠုၚ်ကျာကၟိုန်တုဲ ဆက်ဇက်ဒၟံၚ် ကပေါတ်သိုၚ်ခၞံ နူပယျဵုကြုက်ဏီဖိုဟ်ရ။

“ယဝ်ရသမတ ဒေံါဇူဍာံဍာံဏောၚ်တှေ် ဒးပတိတ်အမိၚ်ထေက်ဏောၚ်။ တုဲတှေ် ဗီုလဵုသဳကၠဳကဵု ကြုက်ဂှ်လေဝ် ညးဍုၚ်ကွာန်တံ ဂွံတီ ဒးဟီုပံက်ပတိတ်ထေက်ဏောၚ်” သာ်ဝွံ မိအနာန် ဟီုရ။

အကြာဟီုမံၚ် ဒေံါဇူကိုန်စဳဇန်ဏံဂှ် ကဝ်ပဝ်ရေယှေန် ဖျေံတမ်ရိုဟ် ဇြဟတ်ဓါတ်လလဳကြုက် (CPI) ဂှ် ဗြဲအိုတ်မ္ဂး ကလေၚ်စကမၠောန်ရောၚ်ဒှ်တုဲ လ္ပဆုဲပြံၚ်ကပေါတ်ကိရိယာညိဂှ် ဟီုလဝ်ကဵု ကောန်ကမၠောန်တံရ။

နူကဵု CPI ဒေံါဇူကမၠောန်ရောၚ်ဂှ် သွက်သ္ဂောံလလောၚ်ပတိတ်ပရိုၚ်၊ ကလေၚ်သီရုပ် ကပေါတ်စက်ကေုာံ ကောန်ကမၠောန်တံတုဲ သွက်သ္ဂောံကလေၚ်ကဵုအခေါၚ် ညးဒေသတံ သ္ဂောံကလေၚ်မံၚ်စံၚ် ဒၞာဲသ္ၚိမူလညးတံဂှ် KDNG အာတ်မိက်လဝ်ရ။

ကၟိုန်ဍာ်ၜဳဇီု ကေုာံ ကၟိုန်တၞဟ်တၞဟ် ၆ ကၟိုန်ဂှ် ဆအယာံမာတ် ဒေံါဇူလဝ်ဟေၚ်တုဲ လုကဴဟွံဒေံါထောံပေၚ်ပေၚ်ဏီဂှ် နကဵု KDNG ပံၚ်တောဲကဵု ညးဍုၚ်ကွာန်တံတုဲ ဆက်ဒစဵုဒစးအာ ကမၠောန်ကိုန်စဳဇန်ဏံရောၚ်ဂှ် ဟီုဓမံက်လဝ် ပ္ဍဲလိက်လလောၚ်တြးဂှ်ရ။