ရာၚ်မြဟ် – ပ္ဍဲမွဲဒမြိပ်ဂၠံၚ်ကွဳစက် ထဝဲါ-ကမ္မာရဳ မၞုံအပ္ဍဲကိုန်စဳဇန် သၞေဟ်ဍာ်ဒမြိုဟ်ထဝဲါဂှ် ဖျေံသၠဲလဝ် ဒပ်ပၞာန်အလဵုအသဳဗၟာ ၆ တမ်ဒပ် မၞုံသၟဝ်ကောပ်ကာဲ ဌာန်ဂအုပ်ပၞာန် ရးပြၚ်ၜဳတံရ။

ကိုန်အစဳဇန် ဖံက်ဂၠံၚ်ကွဳစက် ဍုၚ်ထဝါဲ-ကာမ္မရ (ဗီု - daweiproject.blogspot.com)

ဒပ်တၟိ မစိုပ်ကၠုၚ် နူဂိတုအံက်တဝ်ပါ ဒုတိယသတ္တဟဏံ ကေုာံ ဒပ်မူလ ပံၚ် ၉ တမ်ဒပ်တံဂှ် ချဳဒရာၚ်မံၚ် ပ္ဍဲကိုန်စဳဇန် ဖံက်ဂၠံၚ်ကွဳစက်ရောၚ်ဂှ် ညးတာလျိုၚ် လလောၚ်ပရိုၚ် ခရိုၚ်ဘိက်-ထဝဲါ နူဒပ်မဟာ ၄ ဒပ်ပၞာန်ဗၠးၜးကရေၚ် ဟီုရ။
“ထပ်သၠဲလဝ် ဒပ်ပၞာန်အလဵုအသဳ၊ ဟိုတ်နူဒပ်ပၞာန်တံဂှ် စိုပ်ကၠုၚ်တုဲ ညးဒေသတံ ဖေက်လကိုတ်တုဲ ဂြိပ်ဒဴကၠုၚ် လပါ်ပယျဵုသေံ နွံမံၚ်” သာ်ဝွံ ညးတာလျိုၚ်ဂှ် ဟီုရ။

ကြဴနူ KNU တံ ဒၞာတာထောံ ကမၠောန်ဖံက်ဂၠံၚ်ကွဳစက် ထဝဲါ-ကမ္မာရဳတုဲဂှ် ထပ်သၠဲကၠုၚ် ဒပ်ပၞာန်အလဵုအသဳသာ်ဏံရောၚ်။

ကြဴနူ ဒပ်ပၞာန်အလဵုအသဳ ကေုာံ တမ်ဒပ် မၞုံသၟဝ်ကောပ်ကာဲ ဒပ်မဟာ ၄ KNU တံ ကတဵုဒှ်ပေဲါဗတိုက် ပ္ဍဲဂိတုဂျူလာၚ်အိုတ်တေံတုဲဂှ် ညံၚ်ဟွံဂွံဆက်ကၠောန် ကမၠောန်ဖံက်ဂၠံၚ်ညိဂှ် နူလပါ် KNU ဒၞာတာထောံ ပ္ဍဲဂိတုသေပ်တေမ်ပါဂှ်ရ။

“ထပ်သၠဲလဝ်ဒပ်ဏံဂှ် သွက်ဂီုကၠီု ကိုန်စဳဇန်ဖံက်ဂၠံၚ်ကီု၊ တုဲတှေ် နကဵုဇြဟတ် သွက်ဂွံထပက်ပၞာန်ကဵု ဒပ်မဟာ ၄ KNU ချဳဒရာၚ်မံၚ် ပ္ဍဲဒေသဂှ်ဏောၚ်” သာ်ဝွံ ညးတာလျိုၚ်ဂှ် ဆက်ဟီုရ။

ဒပ်ပၞာန်အလဵုအသဳတံ စိုပ်ကၠုၚ်တုဲ ညးဒေသ နူကွာန်အမဵု၊ ကွာန်ဝါတဝ် ကေုာံ ကွာန်ဇြေန်ဘျူဒါၚ် မၞုံပ္ဍဲပွိုၚ်ဍုၚ်ပါ်မေတ္တာတံ ဂြိပ်ဒဴကၠုၚ် လပါ်ပယျဵုသေံတုဲ ဒပ်ပၞာန်ဗၟာတံ စံၚ်ထောံကွာန်ဂှ်ရောၚ်ဂှ်လေဝ် ညးတာလျိုၚ်ဂှ် ဆက်ဟီုရ။

ကိုန်စဳဇန်ဂၠံၚ်ထဝဲါ-ကမ္မာရဳဂှ် ဟိုတ်နူပွဳပွူသဘာဝ လီုလာ်ကီု၊ ဟိုတ်နူညးဒေသတံ ဒးပြံၚ်ဆုဲကီု၊ ဟိုတ်နူပရေၚ်ဂီုကၠီု KNU ကီုတုဲ နကဵု KNU ဒးဒၞာတာ ကိုန်စဳဇန်ဏံရောၚ်ဂှ် နဝ်ဇြဳဖဝ်ရာသိၚ် မဒှ်ညးအုပ်ကာနာနာ KNU ကေၚ်ဟီုကၠုၚ်လဝ် နွံရ။

တိဍာ်ဂၠံၚ်ကွဳစက် ထဝဲါ-ကမ္မာရဳ တတ်အာဂှ် မဒှ်တိဍာ် KNU တံ ထိၚ်ဒဝ်ချဳဒရာၚ်ရ။ ပၞောဝ်ကွာန် မၞုံ ၂၁ ကွာန်ဂှ် ဟိုတ်နူပေဲါဗတိုက် KNU ကဵု ဒပ်ပၞာန်ဗၟာတံတုဲ ကြဴနူသၞာံ ၁၉၉၇ ဂှ် ကွာန် ၈ ကွာန် ပြံၚ်ဆုဲအာလပါ်ဍုၚ်သေံ နဒဒှ် ညးဒဒိုက် ဂြိပ်ဒဴပၞာန်အိုတ်ရ။

ကိုန်စဳဇန် သၞေဟ်ဍာ်ဒမြိုဟ်ထဝဲါဂှ် Italian-Thai Development company ဖျေံသဇိုၚ် ပ္ဍဲဍုၚ်ၜၚ်ကံက် ဖျေံတမ်ရိုဟ် သြန်သေံ ၄၀၀ ဗဳလျာန်ရောၚ် ဂွံတီကေတ်ရ။

ပ္ဍဲကိုန်စဳဇန် သိုၚ်ခၞံသၞေဟ်ဍာ်ဒမြိုဟ် ထဝဲါဂှ် သွက်သိုၚ်က္ၜၚ် ကေုာံ ပလေဝ်ပလေတ်ထိၚ်ဒဝ်က္ၜၚ်တုဲ ကမၠောန် ပွမသိုၚ်ခၞံ ရုၚ်သ္ၚိဌာန်ကြိယာဗာ၊ ပွမသိုၚ်ခၞံ တိဍာ်ကွတ်စက်၊ ပွမပတန် ကမၠောန်ကွတ်စက် မဆေၚ်စပ်ကဵုကၠောန်ပ္ဍေန်ဓာတ်၊ ပွမသိုၚ်ခၞံ ရုၚ်စက်ဍုန်ကၠောန်ပ္ဍေန်၊ ပွမသိုၚ်ခၞံ ရုၚ်စက်ပသဲက္ဍာၚ်၊ ပွမသိုၚ်ခၞံ ရုၚ်စက်ဓါတ်လလဳ၊ ပွမဖံက်ဂၠံၚ်ကွဳစက် ဂၠံၚ်ကွဳပၟတ် ထဝဲါ-ၜၚ်ကံက် ကေုာံ ပွမတောဲဒလောဲ ပၠံၚ်ကၠောန်ပ္ဍေန် မွဲဒမြိပ်ဂၠံၚ်ကွဳစက်ကွဳပၟတ်တံ ပါလုပ်ရ။