မာံသုတ၊ စၠန်ထဝ် – သွက်သၟာကမၠောန် ကောန်ဍုၚ်ဗၟာ ကလေၚ်စဴသ္ၚိဌာန် နူဍုၚ်သေံတံ ဂွံတတ်ကၠောံပယျဵု ဗွဲမလောဲသွာမာန်ဂှ် အလဵုအသဳသေံတေံ ပံက်ကဵုဒဒန် မာဲဆံက်-ဗြဝတဳ မွဲချိုန်ခဏရောၚ် ဂွံတီကေတ်ရ။
ဒဒန်ဆာန်ကၟိန် သေံဗၟာ ဗြဝတဳ - မာဲချံက် ( ဗီု - Internet )
နူဂိတုနဝ်ဝေမ်ပါ ၂ အခိၚ်နူဂယး ၉ နာဍဳ စဵုစိုပ်အခိၚ်သဝ်တ္ၚဲ ၄ နာဍဳ ပံက်ကဵုတုဲ တ္ၚဲလက္ကရဴလေဝ် သွက်ဂွံဆက်ပံက်အာ နွံရောၚ်ဂှ် ညးတာလျိုၚ်လပါ်အလဵုအသဳဗၟာ ဟွံမိက်ဓမံက်ယၟုမွဲတၠ ဟီုရ။
“သွက်ဂွံကူသာန်သွံရာန်ဗၞိက် ဟွံသေၚ်ပုဟ်။ ဟိုတ်နူသၟာကမၠောန်တံ ကလေၚ်စဴမံၚ် ဍုၚ်ဗၟာဂၠိုၚ်တုဲ ပံက်ကဵုမွဲလစုတ်ရဏောၚ်။ စၟဳစၟတ် ချိုတ်ချိုတ်ပၠိုတ်ပၠိုတ်တုဲမှ ဍေံကဵုအခေါၚ်အာ” သာ်ဝွံ ညးတာလျိုၚ်ဂှ် ဟီုရ။
သၟာကမၠောန် ကောန်ဍုၚ်ဗၟာ ရပ်လဝ်စၟတ်တဲတတ်ကၠောံဍုၚ် ယာယဳတံဂှ် ဒးတတ်ကၠောံ နူဂၠံၚ်ဂၠုၚ်တုဲ သၟာကမၠောန် ဟွံမွဲကဵု တၞးလိက်တံဂှ် အလဵုညးတာလျိုၚ်သေံ စၟဳစၟတ်သၞေဟ်ကၚ်တံ ပလံၚ်ကဵု လပါ်ဍုၚ်ဗြဝတဳရောၚ်ဂှ် ကောန်ဂကူမန် မၞုံပ္ဍဲဍုၚ်မာဲဆံက် ဂွံဆဵုလဝ် နမတ်မွဲတၠ ဟီုရ။
“နူသြၚ်သေံ ညးစၟဳစၟတ်ဂုက် (သၞေဟ်ကၚ်) တံ ပလံၚ်ကဵု သြၚ်ဗၟာ။ လၟုဟ် ပလံၚ်ကဵု ၁၀၀ တုဲယျ။ မၞိဟ်နွံကဵုတၞးလိက် တတ်ဍုၚ်တံဂှ် ဒးကၠောံကဵု ဂၠုၚ်။ မၞိဟ်စဴဂၠိုၚ်တုဲ ညးတာလျိုၚ်သေံကဵုဗၟာတံ ဂွံပံက်ဒဒန်ဏံဂှ် ပ္ညဳပ္ညပ်မံၚ် တၟာလအ်ရ ပိုဲမိၚ်လဝ်။ ဆဂး တ္ၚဲဏံမှ ဂွံအခေါၚ်တတ်ကၠောံ” သာ်ဝွံ ညးဟီုရ။
သွက်သၟာကမၠောန် ကောန်ဍုၚ်ဗၟာ စိုပ်အာဍုၚ်ဗြဝတဳတံ ဂွံကလေၚ်စဴ သ္ၚိဌာန်ဇကုမာန်ဂှ် ကဵုဒၟံၚ်သြန် ညးမွဲတၠ ၅၀၀၀ ဒကေဝ်တုဲ ဒဵုကဵုစိုပ်သ္ၚိ ပလံၚ်ကဵုမံၚ် နကဵုကွဳစက်ကာရောၚ်ဂှ်လေဝ် ညးဆက်ဟီုရ။
“အတိုၚ်ပိုဲ ဂွံမိၚ်လဝ်တှေ် နူကဵုဂကောံ NGOs ရီုဗၚ်မံၚ် အကြာဒေသပယျဵုတံ ကဵုအရီုအဗၚ်လှုဲဏောၚ်။ နူတနေံကဵု နူတနိတေံဂှ် ကဵုမံၚ်မွဲတၠ ၅၀၀၀ ဒကေဝ်။ တ္ၚဲဏံဂှ် ဒှ်အာ ၄၀၀၀ ဒကေဝ်ယျ။ မၞိဟ်စဴတံဂှ် တ္ၚဲဏံ အသိၚ်ဍိုန်စှေ်အာညိယျ” သာ်ဝွံ ညးဟီုရ။
ဟိုတ်နူဍာ်ဇၞော် ပ္ဍဲဍုၚ်သေံ အခိၚ်သၟာကမၠောန်တံ ကလေၚ်စဴမံၚ် ဍုၚ်ဗၟာဂှ် သၟာကမၠောန် ဟွံမွဲကဵု တၞးလိက်တတ်ကၠောံဍုၚ်တံ ဒးဒုၚ်ဓရတ်မံၚ်သြန်ကဵု ညးစလိၚ်အကြာ (ပွဲစား) တံရောၚ်ဂှ် သၟာကမၠောန် တၞးလိက် ဟွံမွဲတံ ဟီုအိုတ်ရ။
“ဂွံစိုပ်မာဲဆံက်ဏံဂှ် လှုဲသေံအိုတ်အာ ၜိုတ် ၄၀၀၀ ၝာတ်။ လှုဲလေဝ် ဟွံမွဲ၊ ဒှ်အခက်အခုဲ ကွေံကွေံ” သာ်ဝွံ သၟာကမၠောန် ဟွံမွဲကဵု တၞးလိက်တတ်ဍုၚ် မစိုပ်ဒၟံၚ် သၞေဟ်ကၚ်စၟဳစၟတ်မာဲဆံက် မွဲတၠ ဟီုရ။
ဟိုတ်နူဍာ်ဇၞော် ပ္ဍဲဍုၚ်သေံဂှ်ရ သၟာကမၠောန် ကောန်ဍုၚ်ဗၟာ ဂၠိုၚ်ကဵုလက်တံ ကလေၚ်စဴဒၟံၚ် ဍုၚ်ဗၟာတုဲ သွက်ပရေၚ်အာကၠုၚ် လောဲသွာ ဂးတုဲ ဒဒန်ဆာန်ကၟိန် မာဲဆံက်-ဗြဝတဳ ကၟာတ်လဝ်လအ်ကဵုသၞာံဂှ် ကလေၚ်ပံက်ကဵု မွဲချိုန်ခဏရောၚ် ဂွံတီကေတ်ရ။
