မိလျးထဝ် – ဟိုတ်နူဍုၚ်သေံက္တဵုဒှ်ဘဲကပ်ဍာ်ဗၠိုက်တုဲ သၟာကမၠောန်ကောန်ဍုၚ်ဗၟာတံ ဂၠောဲစဴဒၟံၚ်ဌာန်ဒေသဂၠိုၚ်ဂှ် လ္ပာ်ဒေသပယျဵုကျာ်ပိကေုာံ ဍုၚ်ဗြဝတဳတံ သၠာဲသြန်ဗၟာကေတ်ဝါတ်ကၠုၚ်ရ သာ်ဝွံ ရဲသၠာဲသြန်တံဟီုရ။
ညးတၠသၠာဲသြန် နာဲအလွယ် ဟီုဂှ် “ရဲစဴတံကၠုၚ်လှာဲဒၟံၚ်လှုဲဂှ် ဂၠိုၚ်ကွေံကွေံရ၊ လၟုဟ်လေဝ် လှုဲဗၟာဂှ် ဂၠာဲစကျာတ်ကၠုၚ်ဒၟံၚ်ယျ၊ မွဲအခိၚ်ဏံဂှ်တှေ် ပိုဲတံ ကၠောန်စကိတ်ဒၟံၚ်ရလေဝ်” သာ်ဝွံ ညးဟီုရ။
စနူပ္ဍဲဍုၚ်သေံ ဍာ်ဇၞော်တုဲ ဒၞာဲသၟာကမၠောန် ကောန်ဍုၚ်ဗၟာတံနွံဂၠိုၚ် မပ္တံ ဍုၚ်ၜၚ်ကံက်၊ ခရိုၚ်နခေါန်ပထုမ် တံဂှ်ရုၚ်ကမၠောန်ဗွဲမဂၠိုၚ် ဗၠိုက်အာဍာ်အိုတ်တုဲ ဆက်ကၠောန်ကမၠောန်ဟွံဂွံရ။
“လောန်ကၠုၚ် ၜါပိတ္ၚဲတေံဂှ် လှုဲသေံမွဲလ္ၚီၜါတ်တှေ် လှာဲဂွံလှုဲဗၟာ ၂၅၀၀ဝ ဒကေဝ်၊ တ္ၚဲဏံ ကာလအာလှာဲပၠန်ဂှ် စှေ်အာ ၂၄၇၀၀ ရ၊ တုဲတှေ် လှုဲဗၟာလေဝ် ကေတ်ဟွံလောဲရပုဟ်” သာ်ဝွံ ညးမသၠာဲလဝ်သြန် လ္တူဍုၚ်ကျာ်ပိဂှ်မွဲတၠ ဟီုလဴကဵုရ။
လ္ပာ်ဍုၚ်ကျာ်ပိပၠန်လေဝ် ဟိုတ်နူရုၚ်စက်ဇၞော်မၞံုဒၟံၚ် လ္တူဍုၚ်ၜၚ်ကံက်တေံဍာ်ဗၠိုက်အာဂှ်ရ ဗၞိက်အဗြောံတံ ပိုတ်အာတုဲ ရုၚ်စက်လ္ၚဵုတံ ဒးကၟာတ်ကၠုၚ်နွံရ။
ရဲဍုၚ်ဗြဝတဳမွဲတၠ ဟီုဂှ်တှေ် “လ္ပာ်ဗြဝတဳဏံဂှ် လှုဲဒဵုကဵုကေတ်ကျာတ်ကွေံကွေံဂှ် ဍေံဟွံဒှ်ဏီ၊ ဆဂး အဏံဂှ်တှေ် ဒးစွံသတိမွဲဂှ် လှုဲအတု(သြန်ပတောအ်) ၊ လှုဲယှအ်ရ” သာ်ဝွံ ညးသၠာဲကၠုၚ်သြန် နူဍုၚ်ဗြဝတဳမွဲတၠ ဟီုရ။
ဒဒန်စၠောံဍုၚ်သေံ-ဗၟာ ဍုၚ်မာဆံက် – ဗြဝတဳဂှ်လေဝ် ပ္ဍဲသတ္တဟလောန်ကၠုၚ်ဏံ ကလေၚ်ပံက်ကၠုၚ်ကဵုပၠန်တုဲ ကောန်ဍုၚ်ဗၟာဗွဲမဂၠိုၚ်စဴမံၚ်လပါ်ဍုၚ်ဗြဝတဳဂှ် ပရိုၚ်ဂမၠိုၚ်ချူထမံက်ပတိတ်မံၚ်အရိုဟ်တ္ၚဲရ။
0 Comments