ရာၚ်မြဟ် – အလဵုအသဳဒေသတံ ၜုၚ်တက်ပျဲပျာံ ကုသၟာခဲါထဝ် အခိုက်တမၠာ ကမၠောန်ဍောတ်ဍောတ် မၞုံပ္ဍဲဒေသ ကမၠောန်ခဲါထဝ် ၜဳဇီုဨရာဝတဳတုဲ ဖျေံဒၟံၚ်ထံၚ်ရောၚ်ဂှ် ဂကောံဆက်စၠောံပရေၚ်ဖောအ်ဗြေဝ်ကာမၞိဟ် ကချေၚ် KDNG ဟီုရ။

ဒၞာဲခါဲလဝ်ထဝ် ပ္ဍဲဒေသၜဳဧရာဝတဳၜါသွာၚ်

ညးဒေသတံ ထပ်ဂၠာဲမံၚ်ထဝ် နူကမၠောန်ခဲါၜံက်ဗရိုတ် (သတ္တု) ထောံကၠဟ်လဝ် ဗွဝ်တိမဒှ်ဂျိမာန်တံဂှ်တုဲ ပ္ဍဲဂိတုအံက်တဝ်ပါ ၁၇ ဂှ် ဒးဒုၚ်ရပ်တုဲ ဖျေံထောံထံၚ်ရောၚ်ဂှ် KDNG ဟီုရ။

“ညးဒးဒုၚ်ရပ် ၁၁ တၠတံဂှ် လၟုဟ်ရပ်ချုက်လဝ် ပ္ဍဲဗဒိုပ်ဗၠာဲသၟိၚ် စၟတ် ၁ ဍုၚ်မျေတ်ကျဳဏာ။ ဒဵုကဵုလၟုဟ် ဟွံဗၠးဏီပုဟ်။ မၞိဟ်ဒးဒုၚ်ရပ်ကၠာတေံဂှ် ဍေံတံကဵုကလေၚ်နုက်လဝ် နွံ” သာ်ဝွံ မိအနာန် နူ KDNG ဟီုရ။

ညးဒးဒုၚ်ရပ်တံဂှ် မဒှ်ညးဒေသ မတန်တဴ ပ္ဍဲဗဒိုပ်ပြံၚ်ဆုဲတံဂှ်တုဲ ဒးဆဵုဂဗမံၚ်ကဵု အခက်အခုဲ ပရေၚ်စသုၚ်မံၚ်စံၚ်၊ ပရေၚ်ထတ်ယုက် ကေုာံ ပရေၚ်ပညာကောန်ၚာ်ညးတံရောၚ်ဂှ် ညးဆက်ဟီုရ။

သွက်သ္ဂောံကလေၚ်ဗလးကဵု ညးခဲါထဝ် ဒးဒုၚ်ရပ်လဝ်တံဂှ် ညးဒေသတံ ပလံၚ်ဗစိုပ်လဝ်လိက် ကုသကိုပ်ဝန်ဇၞော် တွဵုရးကချေၚ်ကီုလေဝ် စဵုကဵုလၟုဟ် ဟွံကလေၚ်နၚ်ပရိုၚ်ဏီရ။

သွက်သ္ဂောံကၠောန် ဂၠံၚ်ကၟိုန်ၜဳဇီု မပါလုပ် ပၞောဝ်ကၟိုန် ရ စဳဇန်လဝ် သွက်သ္ဂောံသိုၚ်ခၞံ လတူဂၠံၚ်ၜဳဨရာဝတဳဂှ် ဒးဒုၚ်သီတိဝါ ညးဒေသတံတုဲ ဒးဒုၚ်ပြံၚ်ဆုဲဏာ ဗဒိုပ် (အောၚ်မြၚ်သာ) ဂှ်ရ ညးဒေသတံဂှ် ကမၠောန်ခဲါၜံက်ထဝ်ဏံ ဒှ်ကၠုၚ် ကမၠောန်သြန်လုပ်အဓိက ညးတံမွဲရောၚ်ဂှ် လိက်ဒုၚ်စဳရေၚ်ဂှ် ဟီုဓမံက်လဝ်ရ။

ကမၠောန်ခဲါၜံက်ထဝ် မၞုံပ္ဍဲဒေသၜဳဇီုဝွံ ပ္ဍဲဂိတုအံက်တဝ်ပါ ၅၊ သၞာံ ၂၀၁၁ ဏံ အတိုၚ်အမိၚ် သကိုပ်အုပ်ဓုပ် ဍုၚ်မျေတ်ကျဳဏာ ဥူထောန်ကျဝ်ဂှ် သၟာကမၠောန် နူကမၠောန်ပံၚ်ဖက် အလဵုအသဳဍိုပ်က္ဍိုပ်တံဟေၚ် ဂွံအခေါၚ်ကၠောန် ခဲါၜံက်ထဝ်ရောၚ်ဂှ် လလောၚ်တြးလဝ်ရ။

သအာၚ်နူဂှ်ပၠန် ကၠာနူဟွံလဇုဲ ဂိတုအံက်တဝ်ပါ ၁၀ ဂှ် ညးဒေသ၊ တၠကမၠောန်ပရေၚ်ပိုန်ဂြပ် ကေုာံ သီုညးဂြိုက်ထဝ်တံ သီုဖအိုတ် ဒးတိတ်ကဵုနူဒၞာဲကိုန်စဳဇန်ရ။

ပတိတ်လဝ်အမိၚ်သာ်ဏံတုဲ ယဝ်ဟွံဒ္ဂေတ်ဗက်မ္ဂး ကေတ်အာအရေဝ်ဏောၚ်ဂှ်လေဝ် အလဵုအသဳဒေသတံ ဟီုပၟိၚ်လဝ်ကဵု ညးဒေသတံ နကဵုလိက်ရ။

“ကြဴနူရပ်ထောံ ညးဒေသတံဂှ်တုဲ ညးမွဲလေဝ် ဟွံဂံၚ်အာကၠောန်ရပုဟ်။ ညးဒေသတံဂှ် ညးတံ ကၠောန်မံၚ် ကမၠောန်ဏံရတှေ် ညးတံ ဒှ်အခက်အခုကွေံကွေံ” သာ်ဝွံ ညးဒေသ နူဒေသမျေတ်ကျဳဏာမွဲတၠ ဟီုရ။

ပ္ဍဲဒေသၜဳဇီု ပွမကၠောန်ကမၠောန် ခဲါထဝ် နကဵုစက် ဇၞော်ဇၞော်လှဲလှဲကီု၊ ပွမရပ်ဒၟံၚ် ညးဂြိုက်ထဝ် အခိုက်တမၠာတံကီုဂှ် ဒစဵုဒစးမံၚ်ကဵု မူဝါဒ အလဵုအသဳလၟုဟ် ကၟာတ်လဝ်ပရေၚ်ခဲါထဝ် ဇၞော်ဇၞော်လှဲလှဲ ပ္ဍဲၜဳဍုၚ်ဗၟာ သွက်သ္ဂောံထိၚ်ဒဝ် ပွဳပွူသဘာဝရောၚ်ဂှ်လေဝ် KDNG ဟီုလဝ်ကီုရ။