ဌာန်ပရိုၚ်ဗၠးၜးမန် – သ္ပပ္တံနူ ဂိတုဒဳဇြေမ်ပါ ၂၁ တုဲ ဗော်ဍုၚ်မန်တၟိ ကၠောန်သ္ပမံၚ် သဘၚ်သဳကၠဳဗော် အလန်အဋ္ဌမ ပ္ဍဲဌာန်ဂအုပ်ဗဟဵု မၞုံပ္ဍဲကၞောတ်ၜဳရေဝ်ရ။

ပ္ဍဲသဘၚ်သဳကၠဳဝွံ သွက်ပရေၚ်ၜိုဟ်လလမ် ဆဵုဂဗသဳကၠဳလဝ် ကုညးစၞးအလဵုအသဳဂှ် စွံအဓိကတုဲ သဳကၠဳအာရောၚ် ဂွံတီကေတ်ရ။

“ကလေၚ်သ္ၚဳဂၠိပ် လၟေၚ်ကမၠောန် တုဲကၠုၚ်တေံဏောၚ်။ ဖျေံအာလၟေၚ်ကမၠောန် အဓာန်ဂတဏောၚ်၊ အကာဲအရာ ပရေၚ်ဍုၚ်ကွာန် ကတဵုဒှ်မံၚ်လၟုဟ်ဂှ်လေဝ် သဳကၠဳအာဏောၚ်” သာ်ဝွံ ကမ္မတဳရေၚ်တၠုၚ် ကေၚ်ကာဗဟဵုမွဲတၠ ဟီုရ။

ပ္ဍဲသဘၚ်သဳကၠဳဝွံ နူခရိုၚ်သဓီု၊ ခရိုၚ်မတ်မလီု၊ ခရိုၚ်ထဝဲါ ညးစၞးမွဲကၠံပြၚ် တိုန်စိုပ်ရောၚ်ဂှ် ဂွံတီကေတ်ရ။

ဃောကၠောန်သ္ပမံၚ် သဘၚ်သဳကၠဳဗော်ဂှ်ဟေၚ် ပ္ဍဲဂိတုဒဳဇြေမ်ပါ ၂၂ ဏံ ဂကောံဝန်ဇၞော်ကွဳပၟတ် ဥူအံၚ်မေန် ဍိုက်က္ဍိုပ်ဂှ် ဆဵုဂဗကဵု ညးစၞးဗော်ဍုၚ်မန်တၟိ ညးအုပ်ကာနာနာ ဗော်ဍုၚ်မန်တၟိ ဍိုက်က္ဍိုပ်တုဲ စနူအခိၚ်နူဂယး ၜိုတ် ၁၁ နာဍဳဂှ် ဆဵုဂဗသဳကၠဳကၠုၚ် ကိစ္စပရေၚ်ၜိုဟ်လလမ် ဗွဲပဏာမ ပ္ဍဲဍုၚ်ဝၚ်က ခရိုၚ်ကမ္မရဳ ကၟိန်ဍုၚ်သေံရ။

ပရေၚ်ဆဵုဂဗသဳကၠဳကဵု ညးစၞးအလဵုအသဳဗၟာဂှ် ပတိုန်ထ္ၜးကဵု ဌာန်ဂအုပ်ဗဟဵုတုဲ သဳကၠဳအာရောၚ်ဂှ် ညးအုပ်ကာနာနာ ဗော်ဍုၚ်မန်တၟိ နာဲဟံသာ ဟီုဂးကဵု သၟာပရိုၚ်ဂမၠိုၚ် ကြဴနူဆဵုဂဗသဳကၠဳကဵု ညးစၞးအလဵုအသဳ တုဲဒှ်ဂှ်ရ။

ဗော်ဍုၚ်မန်တၟိဂှ် ပ္ဍဲသၞာံ ၁၉၉၅ တေံ ဒေံါကၠုၚ်ပန်ပှော် ကုအလဵုအသဳပၞာန်ဗၟာရ။ ဗွဲကြဴ အလဵုအသဳပၞာန်တံ ကဵုကၠုၚ်ဇြဟတ်ဓရိုဟ် သွက်သ္ဂောံပြံၚ်လှာဲ ဗီုပြၚ်ဒပ်မၚ်ပယျဵုတုဲ ပ္ဍဲသၞာံ ၂၀၁၀ ဂိတုသေပ်တေမ်ပါဂှ် ဒေံါပန်ပှော် လီုကၠုၚ်ရ။

ပ္ဍဲဂိတုတုဲကၠုၚ်တေံလေဝ် ဝန်ဇၞော်ကွဳပၟတ် ဥူအံၚ်မေန်ဂှ် ဆဵုဂဗသဳကၠဳကၠုၚ် ကုဗော်သွးကရေၚ် (KNU), ဗော်တဴတက်ကရေၚ်ဍာဲ (KNPP), ဒပ်ပၠတရဴချေၚ် (CNF), ဂကောံဗၠးၜးကချေၚ် (KIO) မဒှ်ဗော်မလုပ်ဂကောံ UNFC ရ။

UNFC ဂှ် ကိုပ်ကၠာတေံ ဒက်ပ္တန်လဝ် နကဵုဂကောံရပ်လွဟ် ၁၂ ဂကောံ မပါလုပ် သီုဗော်ဍုၚ်မန်တၟိတုဲ လၟုဟ်ပ္ဍဲဂှ် ဂကောံကချေၚ်ၜါဂကောံ ပံၚ်ကောံအာတုဲ ဒှ်အာ ၁၁ ဂကောံရ။

ဗော်ဍုၚ်မန်တၟိဂှ် ပ္ဍဲဂိတုအံက်တဝ်ပါ တုဲကၠုၚ်ဏံ ဆဵုဂဗကဵု ညးစၞးအလဵုအသဳ ပ္ဍဲဗွိုၚ်ဒပ်ခလရ (၁၆) ဍုၚ်ရေဝ်မွဲဝါ၊ ပ္ဍဲဂိတုနဝ်ဝေမ်ပါဂှ် ဆဵုဂဗကဵု ညးရေၚ်တၠုၚ်ဖဵု ပရေၚ်ၜိုဟ်လလမ် အလဵုအသဳတွဵုရးမန် ပ္ဍဲဌာန်ဂအုပ်မွဲဝါရ။