ဌာန်ပရိုၚ်ဗၠးၜးမန် – ပ္ဍဲပေဲါရုဲမာဲအကြာ မကၠောန်သ္ပ ခြာဟွံလအ်ဂတဏံ ဂကောံဒဳမဵုကရေသဳ ကောန်ဂကူမန် (MNDF) ဟွံလုပ်ပြိုၚ်ရောၚ်ဂှ် ပ္ဍဲကောံဓရီုကမ္မတဳဗဟဵု မကၠောန်သ္ပ ပ္ဍဲဂိတုဒဳဇြေမ်ပါ ၂၂ ဏံ ဖျေံလဝ်သ္ဂုတ်ရ။
“ပိုဲဟွံလုပ်ပေဲါရုဲမာဲအကြာဏံပုဟ်။ သွက်ပေဲါရုဲမာဲဂတတေံလေဝ် ဒးကူချပ်မံၚ်ဏီ၊ ဒးမၚ်ရံၚ်မံၚ်ဏီ” သာ်ဝွံ နာဲၚိုဲသိၚ် ညးမဒှ်ဥက္ကဌ ဂကောံဒဳမဵုကရေသဳ ကောန်ဂကူမန် ဟီုရ။
ဂကောံဒဳမဵုကရေသဳ ကောန်ဂကူမန်ဂှ် သွက်သ္ဂောံလုပ်ပေဲါရုဲမာဲအကြာ ကိစ္စပတိုန်ယၟုလုပ်သၞောဝ်ကီု၊ ကိစ္စဗော်ပရေၚ်ဍုၚ်ကွာန်မန်ၜါ သ္ဂောံပံၚ်ကောံကီု ဂွံသဳကၠဳဂှ် ပ္ဍဲဂိတုဒဳဇြေမ်ပါ ၂၂ ဏံ ကၠောန်သ္ပကၠုၚ် ကောံဓရီုကမ္မတဳဗဟဵု ပ္ဍဲဍုၚ်မတ်မလီုရ။
“ကောန်ထံၚ်ပရေၚ်ဍုၚ်ကွာန် ညံၚ်ရဴက္ဍိုပ်သကိုပ် ကောန်ဍုၚ်အရၚ် ဃောန်ထောန်ဥူတံ သာၚ်ညောအ်လွေန်တံ လုကဴဟွံဗၠးတိတ်ကၠုၚ်ဏီတှေ် ပိုဲဟွံချပ် ပရေၚ်လုပ်ပေဲါရုဲမာဲပုဟ်၊ တုဲပၠန် နကဵုအလဵုအသဳတၟိဏံ မုကၠောန်သ္ပကဵုမာန်ရော၊ လတူညးတံ ကၠောန်ဂှ် ကလေၚ်သ္ၚဳဂၠိပ်တုဲမှ ပိုဲချပ်ကိစ္စပရေၚ်ပတိုန်ယၟုလုပ်သၞောဝ်ဏောၚ်” သာ်ဝွံ နာဲၚိုဲသိၚ် ဟီုရ။
ကြဴနူဗော်ဂအုပ်ဒဳမဵုကရေဇြဳ ကောန်ဂကူ NLD ပတိုန်ယၟုလုပ်သၞောဝ်တုဲ ဂကောံဒဳမဵုကရေသဳ ကောန်ဂကူမန်လေဝ် ကလေၚ်ဒက်ပခိုၚ်ပတိုန်ဗော်ညးတံတုဲ ထပ်ဗပေၚ်ကၠုၚ်ဇြဟတ်ရ။
ဂကောံဒဳမဵုကရေသဳ ကောန်ဂကူမန်ဂှ် ပ္ဍဲဂိတုအံက်တဝ်ပါ ၁၁၊ သၞာံ ၁၉၈၈ တေံ စဒက်ပ္တန်ကၠုၚ်တုဲ ပ္ဍဲပေဲါရုဲမာဲ ၁၉၉၀ ဂှ် လုပ်ပြိုၚ်ညးစၞး ၁၉ တၠ၊ ဇၞးကၠုၚ် ၅ တၠရ။ ပ္ဍဲသၞာံ ၁၉၉၂ ဂှ် အလဵုအသဳပၞာန် နဝတတံ ရုပ်သီပလီုကၠေံ နူဒဒှ် ဗော်ပရေၚ်ဍုၚ်ကွာန် လုပ်သၞောဝ်ရ။
0 Comments