မာံသုတ – သွက်ဗော်ပရေၚ်ဍုၚ်ကွာန်မန် ၜါဗော် သ္ဂောံပံၚ်ကောံဂှ် ဗော်ဒဳမဵုကရေသဳ ကောန်ဂကူမန် (မန်ဒဳမဵု) MNDF ပံက်လဝ်ကမ္မတဳပ္ညဳပ္ညပ် ပရေၚ်ဗော်မန်ၜါ ပံၚ်ကောံရ။
အာစာသဝ်ဟံၚ်ဍုၚ် အဃောဟီုမံၚ်ဂလာန်။
ပ္ဍဲကောံဓရီု ကမ္မတဳဗဟဵု ဂကောံဒဳမဵုကရေသဳ ကောန်ဂကူမန် မကၠောန်သ္ပ ပ္ဍဲဍုၚ်မတ်မလီု ပ္ဍဲဂိတုဒဳဇြေမ်ပါ ၂၂ ဏံ ဖျေံလဝ်သ္ဂုတ်သွာတ်ရောၚ်ဂှ် ဖက်ဆောညးအုပ်ကာ (၁) ဒံက်တာမေန်ကျဳဝေန် ကော် အာစာသဝ်ဟံၚ်ဍုၚ် ဟီုရ။
“နူကမ္မတဳဏံ ဆဵုဂဗသဳကၠဳကဵု ပုဂ္ဂိုလ်ကဵုသ္ဂုတ်သွာတ်မာန် နူဗော်ဒဳမဵုကရေဇြဳ အလုံရးမန်တံတုဲ တၚ်သ္ဂုတ်သွာတ်ဂှ် ဒးကလေၚ်ပတိုန်ထ္ၜး ပ္ဍဲကမ္မတဳဗဟဵု မန်ဒဳမဵုဏောၚ်” သာ်ဝွံ အာစာသဝ်ဟံၚ်ဍုၚ် ဟီုရ။
သအာၚ်နူဂှ်ပၠန် ကိစ္စဂကောံဒဳမဵုကရေသဳ ကောန်ဂကူမန် ပတိုန်လိက်လုပ်သၞောဝ်ဟာ ဟွံပတိုန်ဟာဂှ် တန်တဴကဵု ဗလးကဵု က္ဍိုပ်သကိုပ် ကောန်ဍုၚ်အရၚ် မဒးဒုၚ်မံၚ်ထံၚ် နကဵုပရေၚ်ဍုၚ်ကွာန်တံဂှ်တုဲ ဒးကလေၚ်မၚ်ရံၚ်မံၚ်ဏောၚ်ဂှ် နူကမ္မတဳဗဟဵု မန်ဒဳမဵု သ္ၚဳဂၠိပ်လဝ်ရ။
“ပြဟ်ပြဟ်ဏံ ဗော်ပိုဲဂှ် လုပ်မံၚ်သၞောဝ်တုဲ ဆက်သုၚ်စောဲအာ ယၟုဏံထေက်ဏောၚ်ဂှ် ညးစၞးဗော်ပိုဲ ကာလဆဵုဂဗကဵု ညးစၞးဗော်မန်ဒဳမဵုဂှ် ဟီုဂးလဝ်နွံ” သာ်ဝွံ ဥက္ကဌ ဗော်ဒဳမဵုကရေဇြဳ အလုံရးမန် နာဲဇၞူမန် ကော် နာဲၚိုဲသိၚ် ဟီုရ။
သွက်သ္ဂောံကံက်ကေတ် ဆန္ဒညးဍုၚ်ကွာန်ဂှ် နူဗော်အလုံရးမန် ပံက်လဝ် ကဝ်မရှေန်မွဲ မပါလုပ် ညး (၇) တၠ ညးမဒှ် ဝန်ဇၞော်ကာကောန်ဍုၚ်အရၚ်မန် တွဵုရးကရေၚ် နာဲချေတ်ဥူ ဍိုက်က္ဍိုပ်တုဲ စဒက်ပ္တန်လဝ် နူဂိတုနဝ်ဝေမ်ပါ ၂၇ ဂှ်ရ။
“ညးကဵုသ္ဂုတ်သွာတ်မာန် နူဗော်ညးတံဂှ်ရ ပိုဲဆဵုဏောၚ်။ ဆဵုလဝ်ကဵု ကမ္မယှေန် ညးတံ တုဲယျ၊ ညးတံ ကဵုသ္ဂုတ်သွာတ် ဟွံမာန်တုဲ မုလေဝ် ဟွံတၟေၚ်ကၠုၚ်ပုဟ်” သာ်ဝွံ ဒံက်တာ မေန်ကျဳဝေန် ဟီုရ။
“ယၟုဗော်လဵု သုၚ်စောဲအာဂှ် ကာလဒက်လဝ် ကမ္မတဳ ၁၅ တၠ စပ်ကဵု လုပ်ပေဲါရုဲမာဲထေက် ဟွံထေက်တေံဂှ် ဖျေံလဝ်သ္ဂုတ်သွာတ် တုဲမံၚ်ရ။ ယဝ်သုၚ်စောဲယၟုဏံတှေ် မုလေဝ် အခက်အခုဲ ဟွံမွဲပုဟ်၊ မန်ဒဳမဵုကီု ဗော်အလုံဒေသကီု သက်ဒးပၠံၚ်မံၚ်ယၟု ဟွံမွဲပုဟ်” သာ်ဝွံ နာဲတေန်အံၚ် မဒှ်ဒု-ဥက္ကဌ ဂကောံဒဳမဵုကရေသဳ ကောန်ဂကူမန် ဟီုရ။
နကဵုဗော်ကောန်ဍုၚ်အရၚ်မန် သွက်သ္ဂောံလုပ်ပေဲါရုဲမာဲ ၂၀၁၀ ဂှ် ပတိုန်ယၟုလုပ်သၞောဝ် ထေက် ဟွံထေက် စပ်ကဵုပရေၚ်ဂှ်တုဲ ပ္ဍဲသၞာံ ၂၀၀၉ ဂိတုဂျုန် သကုတ်လက္ကရဴဂှ် ဒက်ပ္တန်ကၠုၚ် ကမ္မတဳ (၁၅) တၠရ။
အပ္ဍဲဝွံ က္ဍိုပ်သကိုပ်ပရေၚ်ဍုၚ်ကွာန်မန် ဝှ်ကြံၚ် နာဲထောန်သိၚ် ကော် နာဲထဝ်သောန် (ဥက္ကဌတြေံ မန်ဒဳမဵု)၊ နာဲၚိုဲသိၚ် (ဥက္ကဌ မန်ဒဳမဵု လၟုဟ်)၊ နာဲဇၞူမန် ကော် နာဲၚိုဲသိၚ် (ဥက္ကဌ ဗော်ဒဳမဵုကရေဇြဳ အလုံရးမန်)၊ နာဲတေန်အံၚ် (ဒု-ဥက္ကဌ မန်ဒဳမဵု၊ ကေၚ်ကာဗဟဵုတြေံ ဗော်ဍုၚ်မန်တၟိ)၊ နာဲမျေတ်ဇြိုဲ (ဗဟဵုကမ္မတဳတြေံ ဗော်ဍုၚ်မန်တၟိ၊ လၟုဟ်ဝန်ဇၞော် ဂကောံအလဵုအသဳ တွဵုရးဍုၚ်မန်)၊ ဒံက်တာဗညာအံၚ်မောဝ် (ကောန်ဗော်တြေံ ဗော်ဍုၚ်မန်တၟိ၊ လၟုဟ် ညးစၞးကၠတ်ထဝ် ကောန်ဂကူ နူဗော်အလုံရးမန်)၊ အမာတ် မဇၞးလဝ်မာဲ ပ္ဍဲပေဲါရုဲမာဲ ၁၉၉၀ ဒံက်တာမေန်သဵုလေန် ကော် အာစာသဝ်စောန်တၟး (ညးအုပ်ကာနာနာ မန်ဒဳမဵု)၊ ဒံက်တာမေန်ကျဳဝေန် ကော် အာစာသဝ်ဟံၚ်ဍုၚ် (ဖက်ဆောညးအုပ်ကာ မန်ဒဳမဵု) ကေုာံ သကိုပ်ပရေၚ်ထတ်ယုက် တွဵုရး ဒေံါဇူ ဒံက်တာမာံနဲသဵု (ဝန်ဇၞော် ဂကောံအလဵုအသဳတွဵုရးဍုၚ်မန်) တံ ပါလုပ်အိုတ်ရ။
0 Comments