မာံသုတ – ညးက္ဍိုပ်ဓမံက်ပတိုန် ပရေၚ်ၜိုဟ်လလမ် ကဆံကၟိန်ဍုၚ် အလဵုအသဳဗၟာ ဂကောံဝန်ဇၞော်ကွဳပၟတ် ဥူအံၚ်မေန် ဍိုက်က္ဍိုပ်ကဵု က္ဍိုပ်သကိုပ် ဗော်သွးကရေၚ် (ကေအေန်ယူ) တံ ပ္ဍဲဒဳဇြေမ်ပါ ၂၁ ဂှ် ဆဵုဂဗသဳကၠဳညးသကအ် ပ္ဍဲဍုၚ်မာဲဆံက် မဒှ်ပယျဵုသေံ-ဗၟာရ။

ဒပ်ပၞာန်ကရေၚ် KNU ပ္ဍဲဒေသ ပယျဵုသေံမွဲဒၞဲါ

အခိၚ်နူဂယး ၜိုတ် ၁၀ နာဍဳဂှ် ညးစၞးၜါလပါ်တံ ဆဵုဂဗညးသကအ် ပ္ဍဲဟဝ်တေဝ် မၞုံပ္ဍဲအရာပ်နံၚ်ဘွာ ဍုၚ်မာဲဆံက်တုဲ အခိၚ်ဒေါဝ်တ္ၚဲ ၁၂ နာဍဳဂှ် သဳကၠဳတုဲဒှ်အာရောၚ်ဂှ် ညးမၞုံတာလျိုၚ် ကေအေန်ယူ ဟွံမိက်ဓမံက်ယၟုမွဲတၠ ဟီုရ။

“ဂိတုဂတဏံတှေ် ညးစၞး KNU ကဵု ညးစၞးအလဵုအသဳတံ သွက်ဂွံဆဵုဂဗ ပ္ဍဲဍုၚ်ဖာအၚ်ဂှ် ပ္ညဳပ္ညပ်လဝ် ဗွဲပဏာမဏောၚ်၊ ကာလဂှ်မှ ဆက်သဳကၠဳသောဲသောဲဗြောဲဗြောဲဏောၚ်” သာ်ဝွံ ညးတာလျိုၚ် ကေအေန်ယူဂှ် ဟီုရ။

ပ္ဍဲညးစၞး ကေအေန်ယူ ဆဵုဂဗသဳကၠဳဏံဂှ် ဒု-ဥက္ကဌ ဒေဗေတ်တာကပဝ်၊ ညးအုပ်ကာနာနာ နဝ်ဇြဳဖဝ်ရာသိၚ်၊ သကိုပ်ဗိုလ်ဇၞော် မူတူသေဖဝ်၊ ဗဒဝ်အာတဵု၊ ဗဒဝ်ဒေဗေတ်ထဝ်၊ ဗဒဝ်သဝ်အံၚ်မဝ်အေတံ ပါလုပ်ရောၚ်ဂှ် ဂွံတီကေတ်ကီုလေဝ် နူလပါ်ကေအေန်ယူ သ္ပဒတန်ဟီုဂး ဟွံမွဲဏီရ။

နူဂိတုနဝ်ဝေမ်ပါ ၈ စဵုစိုပ်နဝ်ဝေမ်ပါ ၁၁ ဂှ် KNU သ္ပကောံဓရီုကာတၟေၚ်တုဲ ဒက်ပ္တန်ကၠုၚ် ကမ္မတဳဓမံက်ပတိုန် ပရေၚ်ၜိုဟ်လလမ် မပါလုပ် ညး ရ တၠရ။ ပ္ဍဲဝွံ ဥက္ကဌ ဒေဗေတ်တာကပဝ်၊ ဒု-ဥက္ကဌ သကိုပ်ပၞာန် မူတူသေဖဝ်၊ ညးအုပ်ကာ ဗဒဝ်ဒေဗေတ်ထဝ်တံ မဒှ်တုဲ နဝ်ဇြဳဖဝ်ရာသိၚ်၊ သကိုပ်ဗိုလ်ရဝ်ဂျာဃေန်၊ ဗဒဝ်အာတဵု ကေုာံ ဗဒဝ်အံၚ်မဝ်အေတံဂှ် ပါလုပ်နဒဒှ်ကောန်ဂကောံရ။

ကြဴဂှ်တုဲ ပ္ဍဲဂိတုနဝ်ဝေမ်ပါ ၁၉ ဂှ် ညးစၞးအလဵုအသဳဗၟာ ကေုာံ KNU တံ ပ္ဍဲသၞာံဏံ ဆဵုဂဗသဳကၠဳညးသကအ် အလန်ဒုတိယ ပ္ဍဲဍုၚ်မာသာဲ၊ ခရိုၚ်ဇၚ်ရာဲ မဒှ်ပယျဵုသေံ-ဗၟာရ။

သအာၚ်နူဂှ်ပၠန် ညးစၞးအလဵုအသဳဗၟာ ကေုာံ က္ဍိုပ်သကိုပ် KNU တံ ပ္ဍဲဂိတုအံက်တဝ်ပါ ၉ ဂှ် ဗွဲပဏာမ သဳကၠဳညးသကအ် ပ္ဍဲဍုၚ်မာဲဆံက် အလန်ပထမရ။

“ကောန်ဂကောံ UNFC တံဂှ် မွဲမွဲဂကောံ ဆဵုကဵုအလဵုအသဳမာန်မံၚ်။ ကာလဆဵုတှေ် အတိုၚ်မူ UNFC ဟေၚ် ဒးဒတူလိုၚ်အာဏောၚ်ဂှ် ဖျေံလဝ်သ္ဂုတ်သွာတ် နွံ” သာ်ဝွံ ညးအုပ်ကာနာနာ UNFC နာဲဟံသာ ဟီုရ။

ဗော်သွးကရေၚ် KNU ဂှ် မဒှ်ကောန်ဂကောံ ကံၚ်ဇြဳဖိတ်ဒရေဝ် ညဳသၟဟ်ဂကူကောန်ဍုၚ်အရၚ် UNFC ရ။

KNU ဂှ် သွက်ဂကူ ကဆံၚ်တုပ်သၟဟ် ကေုာံ သွက်အခေါၚ်ကံကုသဵုဇကု ဇကုဖန်ဖက်ကေတ်မာန်ဂးတုဲ သ္ပပ္တံနူသၞာံ ၁၉၄၉ ဂိတုဂျာန္နဝါရဳ ၃၁ ဂှ် ပၠန်ဂတးကၠုၚ် အလဵုအသဳဗၟာ အဆက်ဆက်ရ။