ဌာန်ပရိုၚ်ဗၠးၜးမန် – ပ္ဍဲဂိတုဒဳဇြေမ်ပါ ၂၃ ဏံဂှ် သကိုပ်ဝန်ဇၞော်တွဵုရးမန် ကေုာံ ကမ္မတဳဗဟဵု ကၠောန်ဗဒှ် တ္ၚဲကောန်ဂကူမန်တံ ဆဵုဂဗ ပ္ဍဲဍုၚ်မတ်မလီုတုဲ လတူပရေၚ်ကၠောန်ဗဒှ် တ္ၚဲကောန်ဂကူမန် ကောံကောံကလောံကလောံဂှ် ဒုၚ်တၠုၚ်ကေတ်ဂုဏ်စရာဲရောၚ် သကိုပ်ဝန်ဇၞော် ဟီုရ။

အဃောညးဍုၚ်ကွာန်တံ ဇက်ကၠောဲတိုန်ကၠုၚ် တ္ၚဲကောန်ဂကူမန် မရနုက်ကဵု (၆၄) ဝါ (ဗဟဵု)

“စပ်ကဵုကၠောန်ဗဒှ် တ္ၚဲကောန်ဂကူမန်တုဲ တၟေၚ်တၟေၚ်တၟဟ်တၟဟ် ညးဟွံဟီုပုဟ်၊ ညးဒုၚ်တၠုၚ်၊ သီုကဵုဇြဟတ်၊ ညံၚ်ရဴသကိုပ်ဝန်ဇၞော်ချေၚ် ဒစဵုဒစး တ္ၚဲကောန်ဂကူချေၚ်ဂှ် ညးဟွံဒစဵုဒစးပုဟ် ညးဟီုဏာဗီုဂှ်” သာ်ဝွံ ဒုဥက္ကဌ ကမ္မတဳကၠောန်ဗဒှ် တ္ၚဲကောန်ဂကူမန် မရနုက်ကဵု (၆၅) ဝါ ဒံက်တာမေန်ကျဳဝေန် ကော် အာစာသဝ်ဟံၚ်ဍုၚ် ဟီုရ။

ပ္ဍဲပေဲါဆဵုဂဗဂှ် နူကမ္မတဳ ကၠောန်ဗဒှ် တ္ၚဲကောန်ဂကူမန် မပ္တံကဵု ဒံက်တာမေန်ကျဳဝေန်၊ ဒံက်တာမေန်သဵုလေန် ကော် အာစာသဝ်စောန်တၟး၊ နာဲပါန်အံၚ်၊ မာံဝဏ္ဏကျဳတံ ပါလုပ်တုဲ လပါ်အလဵုအသဳ တွဵုရးမန်ဂှ် သကိုပ်ဝန်ဇၞော် ဥူအုၚ်မျေတ်၊ ဒံက်တာမာံနဲသဵု၊ နာဲလွဳအံၚ် ကော် နာဲမျေတ်ဇြိုဲ ကေုာံ သကိုပ်အုပ်ဓုပ်ခရိုၚ် ပွိုၚ်ဍုၚ်တံ တိုန်စိုပ်အိုတ်ရ။

နူတ္ၚဲကောန်ဂကူမန် (ဗဟဵု) မရနုက်ကဵု (၆၅) ဝါဂှ် ဘိက်ပၟိၚ်လဝ် သကိုပ်ဝန်ဇၞော် သွက်သ္ဂောံတိုန်စိုပ် တ္ၚဲကောန်ဂကူမန်ကီုလေဝ် ဟိုတ်နူအကာဲအရာ ပရေၚ်ဂီုကၠီုညးတုဲ တိုန်စိုပ်ဟွံမာန်ရောၚ်ဂှ် ညးဟီုရ။

“ယဝ်ကၠောန်တ္ၚဲကောန်ဂကူမန် ပ္ဍဲမုဟ်ဍုၚ်တှေ် ညးတိုန်စိုပ်မာန်မံၚ်၊ လၟုဟ် ညးတိုန်စိုပ်ဟွံမာန်ကီုလေဝ် ညးပလံၚ်ဗစိုပ် လိက်သဝဏ်ဏောၚ် ညးဟီုလဝ်” သာ်ဝွံ ဒံက်တာမေန်ကျဳဝေန် ဟီုရ။

ပ္ဍဲကမ္မတဳ ကၠောန်ဗဒှ် တ္ၚဲကောန်ဂကူမန် (ဗဟဵု) မရနုက်ကဵု (၆၅) ဝါဂှ် ရုဲစှ်လဝ် ဥက္ကဌ နာဲတေန်ဌေ၊ ဒုဥက္ကဌ ဒံက်တာမေန်ကျဳဝေန်၊ ဒံက်တာမေန်သဵုလေန်၊ ဒံက်တာမေန်လွောန်တေန်၊ နာဲလွောန်အံၚ် ကေုာံ ညးအုပ်ကာနာနာ မာံဝဏ္ဏကျဳတံရ။

တ္ၚဲကောန်ဂကူမန် မရနုက်ကဵု (၆၅) ဝါ မဒှ်ပ္ဍဲဂိတုဖေဖဝ်ဝါရဳ ၈၊ သၞာံ ၂၀၁၂ (မာ်မွဲစွေက်) ဏံဂှ် ကၠောန်ဗဒှ် ပ္ဍဲကွာန်ကအ်ဗိန်၊ ပွိုၚ်ဍုၚ်ကအ်ကြိက်၊ တွဵုရးကရေၚ်ရ။

တ္ၚဲကောန်ဂကူမန် မရနုက်ကဵု (၆၄) ဝါ (ဗဟဵု) သၞာံအာဂှ် ကၠောန်ဗဒှ် ပ္ဍဲဖလာတ်ဝေၚ်ဇြဟတ် ဍုၚ်ဇြပ်ဗု ဗီုပြၚ်မိပ်မိပ်လဟိၚ်လဟိၚ်။

တ္ၚဲကောန်ဂကူမန် မရနုက်ကဵု (၆၄) ဝါ (ဗဟဵု) သၞာံအာဏံဂှ် ကၠောန်ဗဒှ် ပ္ဍဲဖလာတ်ဝေၚ်ဇြဟတ် ဍုၚ်ဇြပ်ဗု မိပ်မိပ်လဟိၚ်လဟိၚ်ရ။

ကမ္မတဳ ကၠောန်ဗဒှ် တ္ၚဲကောန်ဂကူမန် ကဆံၚ်ဗဟဵုဂှ် သ္ပပ္တံနူ သၞာံ ၁၉၉၇၊ မဒှ်သၞာံသဘၚ်ရတုထဝ် တ္ၚဲကောန်ဂကူမန် မရနုက်ကဵု (၅၀) ဝါတေံ စဒက်ပ္တန်ကၠုၚ်တုဲ ပံၚ်ပကောံလဝ် ပွိုၚ်ဍုၚ် မၞုံအပ္ဍဲတွဵုရးမန်ကီု၊ သီုပ္ဍဲရးလ္ဂုၚ်၊ ဗ္ဂေါ၊ တၞၚ်သဳ၊ တွဵုရးကရေၚ်တုဲ လၟေၚ်လၟေၚ်သၞာံ ပြံၚ်လှာဲဒေသတုဲ ကၠောန်ဗဒှ်ကၠုၚ်ရ။

သ္ပအစာံကဵု တ္ၚဲပ္တိုန်ဍုၚ် ဟံသာဝတဳ (ဗဂေါ) သက္ကရာဇ် သာသနာ ၁၁၁၆၊ မာ်မွဲစွေက်တုဲ ကိုပ်ကၠာနူ ဍုၚ်ဗၟာ ဟွံဗၠးၜး နူသၟဝ်တဲအၚ်္ဂလိက်တေံဂှ် က္ဍိုပ်သကိုပ်မန်တံ ကၠောန်ဗဒှ်ကၠုၚ် တ္ၚဲကောန်ဂကူမန် ပ္ဍဲဂိတုမာ်မွဲစွေက် ဇၟာပ်ဇၟာပ်သၞာံရ။