မာံသုတ – ဗော်ဒဳမဝ်ကရေဇြဳ ကောန်ဂကူမန် (ဗော်ဒမ) ကေုာံ ဗော်ဒဳမဝ်ကရေဇြဳ အလုံရးမန် (ဗော်အလုံရးမန်) တံ သွက်သ္ဂောံပံၚ်ကောံဂှ် ခမဳသၚ်မန် ကေုာံ ညးဍုၚ်ကွာန်မန်တံ ထံက်မံၚ်ဂလာန်ရောၚ်ဂှ် ဥက္ကဌ ဗော်အလုံရးမန် နာဲဇၞူမန် ဟီုရ။
ဗီုဥက္ကဋ္ဌဗော်ဒဳမဵုကရေဇြဳအလုံရးမန် နာဲဇၞူမန်
သွက်ဗော်ၜါ ဂွံပံၚ်ဂှ် နူဂိတုနဝ်ဝေမ်ပါ ၂၇ စကံက်ကေတ်မံၚ် ဆန္ဒညးဍုၚ်ကွာန်တုဲ ညးဍုၚ်ကွာန်မန်တံ ထံက်ဂလာန်အိုတ်ရောၚ်ဂှ် ဂွံတီကေတ်ရ။ ဗွဲတၟေၚ် ခမဳသၚ်မန်တံ ထံက်ဂလာန်ဂၠိုၚ်ရောၚ်ဂှ် နာဲဇၞူမန် ဟီုရ။
“ပ္ဍဲပွိုၚ်ဍုၚ်ပါ်လၟိုၚ်တှေ် ကျဇၞော် ခမဳသၚ် ၜိုတ် ရ၀ ဇကု ပံၚ်ကောံတုဲ ဗော်ၜါဏံ ဒးပံၚ်ဏောၚ် ချူပလံၚ်ဗစိုပ်နၚ်လိက်။ ကဝ်မရှေန်နူဗော်ပိုဲဂှ်လေဝ် ကံက်ဆန္ဒ ညးဍုၚ်ကွာန်တံတုဲယျ၊ တ္ၚဲဏံ ညးတံဒုၚ်စဳရေၚ်နၚ် ဗွဲမဂၠိုၚ်ဂှ်တှေ် ထံက်ဂလာန်ကဵု ပံၚ်ကောံ” သာ်ဝွံ ညးဟီုရ။
နကဵုဗော်ကောန်ဍုၚ်အရၚ်မန် ယဝ်လုပ်ပေဲါရုဲမာဲမ္ဂး ဇြဟတ်ဂွံခိုဟ်ကီု၊ ညးမကဵုမာဲ ဂကူမန်တံ ညံၚ်ဟွံထုဲထရုဲ ဒှ်မံၚ်စိုတ်ၜါလွးကီုဂှ် ဗော်မန်ၜါ ဒးပံၚ်ထေက်ရောၚ် က္ဍိုပ်သကိုပ်ဗော်ၜါလပါ်တံ ဟီုပတိတ်ကၠုၚ် နူဂိတုတုဲကၠုၚ်ဂှ်ရ။
သွက်သ္ဂောံကံက်ကေတ် ဆန္ဒညးဍုၚ်ကွာန်ဂှ် နူဗော်အလုံရးမန် ပံက်လဝ် ကဝ်မရှေန်မွဲ မပါလုပ် ညး (၇) တၠ ညးမဒှ် ဝန်ဇၞော်ကာကောန်ဍုၚ်အရၚ်မန် တွဵုရးကရေၚ် နာဲချေတ်ဥူ ဍိုက်က္ဍိုပ်တုဲ စဒက်ပ္တန်လဝ် နူဂိတုနဝ်ဝေမ်ပါ ၂၇ ဂှ်ရ။
“ဗီုလဵုပံၚ်ကောံညးသကအ်ဂှ် ပ္ဍဲဂိတုဏံ ၁၈ ဂှ် ဗော်ပိုဲ ကော်ကောံဓရီု ကေၚ်ကာဗဟဵုတုဲ ဖျေံအာသ္ဂုတ်သွာတ်ဏောၚ်” သာ်ဝွံ နာဲဇၞူမန် ဟီုရ။
တုပ်တဴသာ်ဂှ်ကီု နူဗော်ဒမ ဒံက်တာမေန်သဵုလေန်၊ ဒံက်တာမေန်ကျဳဝေန်၊ နာဲသဵုမျေတ် ကေုာံ နာဲပါန်အံၚ်တံဂှ် ဆဵုဂဗမံၚ်ကဵု ညးမပါလုပ် ပ္ဍဲကဝ်မရှေန် ကံက်ကေတ်ဆန္ဒ ညးဍုၚ်ကွာန် နူဗော်အလုံရးမန် ၄ တၠတုဲ သဳကၠဳမံၚ် ပရေၚ်ဗော်ၜါ ပံၚ်ကောံ ပ္ဍဲဍုၚ်မတ်မလီုမွဲဒၞာဲရ။
ဗော်ဒမ ဒးဒုၚ်ပလီုလဝ် ပ္ဍဲသၞာံ ၁၉၉၀ ဂှ် ပ္ဍဲဂိတုတုဲကၠုၚ်ဏံ သ္ပကောံဓရီု ပ္ဍဲဍုၚ်မတ်မလီုတုဲ ကလေၚ်ရုဲစှ်ဗပေၚ်စုတ် ကမ္မတဳကေၚ်ကာတၟိကီုလေဝ် ကိစ္စပတိုန်ယၟု လုပ်သၞောဝ်ဂှ် ဟွံသ္ဂုတ်သွာတ်ဏီရ။
“ဟွံပလေဝ်သၞောဝ် ၂၀၀၈ တှေ် ဟွံလုပ်ပေဲါရုဲမာဲပုဟ်ဂှ် ပ္ဍဲဂကောံမဟာမိတ် ကောန်ဍုၚ်အရၚ် ညဳသၟဟ် (UNA) ပိုဲ ဖျေံလဝ် မူဏံ နွံမံၚ်။ ဆဂး ဂိတုတုဲကၠုၚ်ဏံ ဂကောံကောန်ဍုၚ်အရၚ်ပိုဲဂှ် ဆဵုကဵု ဒဝ်အံၚ်သာန်သုကျဳတုဲယျ၊ ဟိုတ်ဂှ်ရ ဗော်ပိုဲဂှ် ပ္ဍဲဂိတုဒဳဇြေမ်ပါ ၂၂ ဏံမှ ဖျေံသ္ဂုတ်၊ ဗော်မန်ၜါဂှ် မုချ ဒးပံၚ်ညးသကအ်ဏောၚ်” သာ်ဝွံ ဥက္ကဌ ဗော်ဒဳမဝ်ကရေဇြဳ ကောန်ဂကူမန် နာဲၚိုဲသိၚ် ဟီုရ။
