ဌာန်ပရိုၚ်ဗၠးၜးမန် – အလဵုအသဳဗၟာကဵု ဗော်သွးကောန်ဂကူကရေၚ် KNU တံ ကေတ်လဝ်တၚ်တုပ်စိုတ် ပရေၚ်ဒေံါပန်ပှော် ကဆံၚ်ပဏာမကီုလေဝ် သွက်ပရေၚ်ၜိုဟ်လလမ်ဇေတ်ဇေတ်ဂှ် ဒးသဳကၠဳမံၚ် ကဆံၚ်ကဆံၚ်ဏီရောၚ်ဂှ် KNU ဟီုရ။
“လၟုဟ် သွက်ဂွံဒေံါပန်ပှော် ကဆံၚ်တွဵုရးဂှ် ကေတ်လဝ်တၚ်တုပ်စိုတ်ပဏာမ၊ ဆဂး ဂွံဒှ်ပရေၚ်ၜိုဟ်လလမ်ဇေတ်ဇေတ်ဂှ် ဒးသဳကၠဳမံၚ် တၟာဂလိုၚ်ဏီ။ ဥပမာ ပ္ဍဲဒေသကရေၚ် ဒပ်ပၞာန်ဗၟာ နွံမံၚ်တၟာဂလိုၚ်ဏီ။ ဣဏံဂှ် ဗီုလဵုဂွံကလေၚ်သီရုပ်ကၠေံ မပ္တံသာ်ဏံ ဒးဆက်သဳကၠဳမံၚ် ကဆံၚ်ကဆံၚ်ဏီဏောၚ်” သာ်ဝွံ ဒု-ဥက္ကဌ ဗော်သွးကောန်ဂကူကရေၚ် သဝ်ဒေဗေတ်တာကပဝ် ဟီုရ။
ပ္ဍဲဂိတုဂျာန္နဝါရဳ ၁၂ ဂှ် ညးစၞးၜါလပါ် ဃောဆဵုဂဗ ပ္ဍဲဍုၚ်ဖာအၚ်၊ တွဵုရးကရေၚ်ဂှ် ဂွံလဝ်တၚ်တုပ်စိုတ် ပရေၚ်ဒေံါပန်ပှော် ကဆံၚ်တွဵုရးတုဲ လပါ် KNU အာတ်လဝ် တၚ် (၁၁) တၚ်ဂှ် လပါ်ညးစၞးအလဵုအသဳဗၟာတံ တုပ်လဝ်စိုတ် နကဵုမူရောၚ်ဂှ် ဓမံက်ထ္ၜးလဝ် ပ္ဍဲလိက်လလောၚ်ပရိုၚ် KNU ရ။
နကဵု KNU ဂွံလဝ်တၚ်တုပ်စိုတ်ပဏာမကဵု ညးစၞးအလဵုအသဳဗၟာတံဂှ် ကာလကလေၚ်စိုပ်ကၠုၚ် ဌာန်ဂအုပ်ဗဟဵု သွက်သ္ဂောံထပ်သဳကၠဳကဵု အလဵုအသဳဂှ် ဆက်သဳကၠဳအာ ကဆံၚ်ပၟိက်နွံတံရောၚ်ဂှ်လေဝ် ပါလုပ်ကီုရ။
“ပရေၚ်ၜိုဟ်လလမ် ပိုဲနွံပၟိက်ဂှ် ဒေံါပန်ပှော် အလုံကၟိန်ဍုၚ်မွဲဏောၚ်၊ နူဂှ်မွဲကဆံၚ် သဳကၠဳပရေၚ်ဍုၚ်ကွာန်ဏောၚ်၊ လၟုဟ်တှေ် လပါ်ကချေၚ်တေံလေဝ် ဒှ်မံၚ်ပေဲါဗတိုက်ဏီ၊ ဆဂးဟွံသေၚ် လပါ်ကရေၚ်ဍာဲ၊ လပါ်ဒေသကရေၚ်ပိုဲလေဝ် ဆက်ဒှ်မံၚ် ပေဲါဗတိုက်ဏီ” သာ်ဝွံ ညးဟီုရ။
ပ္ဍဲပေဲါသဳကၠဳဂှ် လပါ် KNU မပ္တံကဵု သကိုပ်ပၞာန်ဇၞော် မူတူသေဖဝ်၊ ဗဒဝ်ဒေဗေတ်ထဝ်၊ ဒုသ္ကိုပ်ပၞာန်ဂျဝ်နဳ၊ ဗဒဝ်သဝ်အာတဵု၊ ဒုသကိုပ်ဗိုလ်ဇၞော် ရဝ်ဂျာဃေန်တံ ပါလုပ်တုဲ လပါ်ညးစၞး အလဵုအသဳဗၟာဂှ် ဂကောံဝန်ဇၞော်ကွဳပၟတ် ဥူအံၚ်မေန် ဍိုက်က္ဍိုပ်တံ ပါလုပ်ရ။
ဂကောံဓမံက်ပတိုန် ပရေၚ်ၜိုဟ်လလမ် ကဆံၚ်ကၟိန်ဍုၚ် ဥူအံၚ်မေန် ဍိုက်က္ဍိုပ်ဂှ် ပ္ဍဲဂျာန္နဝါရဳ ၅ ဂှ်လေဝ် ဆဵုဂဗလဝ်ကဵု ဒပ်ပၠတရဴချေၚ် (CNF) တုဲ ကေတ်လဝ်တၚ်တုပ်စိုတ် ဒေံါပန်ပှော် ၅ တၚ်ရ။
ပ္ဍဲဂိတုဏံ စၟတ်တ္ၚဲ ၂၀ ဂှ်လေဝ် သွက်သ္ဂောံဆဵုဂဗကဵု ဗော်တဴတက်ကရေၚ်ဍာဲ (KNPP) ကေုာံ ပ္ဍဲအကြာပွဳပွူ ၂၅ ဂှ် သွက်သ္ဂောံဆဵုဂဗကဵု ဗော်ဍုၚ်မန်တၟိ နွံရောၚ်ဂှ်လေဝ် ပရိုၚ်တိတ်မံၚ်ရ။
ညးစၞးအလဵုအသဳကဵု ညးစၞး KNU တံဂှ် ပ္ဍဲဂိတုအံက်တဝ်ပါ ဒုတိယသတ္တဟတေံကီု၊ ပ္ဍဲဂိတုနဝ်ဝေမ်ပါ ၁၉ ကဵု ဒဳဇြေမ်ပါ ၂၁ ဂှ်ကီု ဆဵုဂဗလဝ် ဂၠိုၚ်ကဵုဝါတုဲ လၟုဟ်ဂွံတၚ်တုပ်စိုတ် ကဆံၚ်ပရေၚ်ဒေံါပန်ပှော် ပဏာမတုဲ ဆက်သဳကၠဳအာ ကဆံၚ်ကဆံၚ်ပၠန်ရ။
KNU ဂှ် သွက်ကဆံၚ်ကောန်ဂကူတုပ်သၟဟ် ကေုာံ သွက်အခေါၚ်ကံကုသဵုဇကု ဇကုဖန်ဖက်ကေတ်မာန် သ္ပပ္တံနူဂိတုဂျာန္နဝါရဳ ၃၁၊ သၞာံ ၁၉၄၉ တေံ ပၠန်ဂတးကၠုၚ်ကဵု အလဵုအသဳပၞာန်ဗၟာ အဆက်ဆက်ရ။
