ဌာန်ပရိုၚ်ဗၠးၜးမန် – ဖျာကျာ်ဝၚ်က မၞုံအပ္ဍဲကွာန်ဝၚ်က၊ ပွိုၚ်ဍုၚ်သၚ်္ခလပူရဳ၊ ကရပ်ပယျဵုဍုၚ်ကျာ်ပိဂှ် နူဗတံ (ဖေဖဝ်ဝါရီ-၂၈) အခိၚ်ၜိုတ် ၈ နာဍဳ ပၟတ်တူအာ ၜိုတ်ပွိုၚ်ဘာ်နာဍဳတုဲ အလုံဖျာဖအိုတ် ဒှ်အာပတေၚ် ဆေၚ်လေၚ်အာအိုတ်ရ။

ဟိုတ်နူပၟတ်ဂှ် ဗဒမ်ဖျာ ၃၆ ခန် တူအာပၟတ်တုဲ ၚုဟ်မးသြန်သေံ ၜိုတ် ရ၀၀ ကိုဋ်ၜါတ် ဆောံလေၚ်အာရောၚ်ဂှ် ကြဴနူပၟတ်တူတုဲ ညးမၞုံလျိုၚ်ဒေသတံ ဆိၚ်ဆကေတ် ပ္ဍဲကောံဓရီုကာတၟေၚ် မကၠောန်သ္ပ ပ္ဍဲဘာဝိဝေကာရာမ ဂှ်ရ။

ကပေါတ်မတူအာတံဂှ် ကပေါတ်ယေန်သၞာၚ်ကွတ်တဲ မပ္တံကဵု ဗွိုက်လတက် ကောန်ဍုၚ်အရၚ်၊ ကပေါတ်မဆေၚ်စပ်ကဵုကျာ် မကၠောန်လဝ် နကဵုဗရိုတ် သြန်၊ ကပေါတ်ကွိၚ်ကွိုက်၊ ကပေါတ်ပရိဘောဂ ကေုာံ ဂၠိက်ယာတ် မၞုံကဵုၚုဟ်မးတံ ပါလုပ်အိုတ်ရ။

“မုဟိုတ် ပၟတ်ဂွံတူအာဗီုဏံဂှ် ဟီုဟွံမာန်ဏီပုဟ်၊ ပၟတ်လေဝ် ကၠောံထၞာန်အာ မွဲလစုတ်ဓဝ်တုဲ ကွဳစက်ပလိုတ်ပၟတ်တံလေဝ် ဟွံဂတာပ်အခိၚ်ပုဟ်၊ ဒှ်ကၠုၚ်မွဲလစုတ်ဓဝ်တုဲ မၞိဟ်တံလေဝ် ရီုဟွံမာန်ပုဟ်” သာ်ဝွံ ညးမဆဵုညာတ်နမတ် ကျာ်ဇၞော်အာစာ ဟံသာရာဇာ နူဍုၚ်ကျာ်ပိ ဟီုရ။

အခိၚ်ပၟတ်တူဏံဂှ် ဒှ်အခိၚ်တေက်မံၚ်ကဵု သဘၚ်ကျာ်ကွာန်ဝၚ်က ဗ္တံဒုတိယရ။ အခိၚ်ဖျာကျာ်ကၟာတ် ပ္ဍဲဒၞာဲဖလာတ်ပေဲါ အခိၚ်မၞိဟ်ပေၚ်ကၠေတ်မံၚ်ဂှ် ပၟတ်တူအာရ။

“မွဲအာယုက်ကွာန်ဝၚ်က ၜိုတ် ၃၀ သၞာံဏံ ပၟတ်တူလၟုဟ်ဂှ် ဒှ်အလန်ကၠာအိုတ်ရ။ မွဲလစုတ်ဓဝ် ဘာ်နာဍဳလေဝ် ဟွံပေၚ်ပုဟ်၊ ဂတမတ်အဲရ ဖျာ်ကျာ် ပၟတ်တူအာဖအိုတ်၊ ကြပ်ဟွံပတှေ်” သာ်ဝွံ ၝောံမၞိဟ်ကွာန်ဝၚ်ကမွဲတၠ ဟီုရ။

သဘၚ်ကျာ်ကွာန်ဝၚ်ကဝွံ ဇၟာပ်ဇၟာပ်သၞာံ ကၠောန်ဗဒှ်မံၚ် ပ္ဍဲဂိတုဖဝ်ရဂိုဏ် (၅-၆-၇) မံက်တုဲ မိပ်တမ္ညဝ်တဴ နကဵုပေဲါဇာတ် မန်၊ ဗၟာ၊ ပေဲါလှေ်ယေန်သၞာၚ်မန်၊ ပေဲါလဟိၚ် လှေ်ဒယှေ် ကွးဘာသေံ၊ ပေဲါလက်ပၠုဲ အခိုက်ကၞာမန် ကေုာံ ပေဲါဂဳတသေံ-မန်တံရ။

ပ္ဍဲကွာန်ဝၚ်ကဝွံ သ္ၚိမၞုံၜိုတ် မွဲလ္ၚီမသုန်ကၠံတုဲ ကောန်ဂကူမန် မသၠးကၠုၚ်ဂဝ် နူဍုၚ်မန်တေံ ဗွဲမဂၠိုၚ် နွံတန်တဴအိုတ်ရ။ လ္ၚဵုတံဂှ် ကလိဂွံလဝ် လိက်စၟတ်သမ္တီ ကောန်ဍုၚ်သေံအိုတ်ရ။