နာဲသာၚ် – ဂကူမန်ဍုၚ်သေံ တန်တဴဒၟံၚ် အပ္ဍဲကဵုအဒေါဝ်ဍုၚ်သေံကီု ဒေသပလိုတ်ဍုၚ်သေံ သကုတ်သၟဝ်ကျာဍုၚ်သေံ နူဗၞတ် (၃၀) ခရိုၚ်ပြၚ်တအ် ကၠုၚ်စိုပ်ကောံကလောံညးသကအ် ပ္ဍဲကဵုစၟတ်တ္ၚဲ ၁၈ ကဵု ၁၉ ပ္ဍဲဂိတုဖေဖဝ်ဝါရဳ ဝွံတုဲ ကၠောန်ဗဒှ် သဘၚ်ကၞာ တ္ၚဲဂကူမန် မရနုက်ကဵု (၆၅) ဝါ ပ္ဍဲကဵုဘာလကျာ် ‘သမဂ္ဂဳယာယာံ’ ပ္ဍဲပွိုၚ်ဍုၚ် သာမ်ခေါ် ခရိုၚ်ပရထုံဌာနဳရ။
ဗီု - ကွးဘာတအ် လှေ်ထၜးပျးဒၟံၚ် ပရူဝၚ်ဍုၚ်ပရထုံ
ပ္ဍဲကဵုသဘၚ်ကၞာ တ္ၚဲဂကူမန်ဝွံ နူကဵု ဂကူမန် ကွာန်နာနာ ကၠုၚ်နူကဵု ခရိုၚ်နာနာတအ် ကၠောန်လဝ် ကၞာထးတုဲ ထ္ၜးပျး ပရူကလော်မန် လိက်ပတ်မန် အခိုက်ကၞာမန် အိုတ်တုဲ ဍုၚ်ကွာန်နာနာတအ်လေဝ် သီုကဵုသွံဒၟံၚ် ယာတ်ပဠောံ ကွာၚ်ၜဴ ယို်ဟ်ၜန်နာနာသာ်တုဲ သဘၚ်ကၞာတ္ၚဲဂကူမန်ဂှ် ဒှ်အာ သီုကဵုပရေၚ်ထ္ၜးပျး ယေန်သၞာၚ်မန်ရ။
အခိၚ်တ္ၚဲစေၚ်ဂှ် ဂကောံနာနာ နူကဵုဍုၚ်ကွာန်နာနာတအ် ကောံစိုပ်ကၠုၚ်တုဲ ကွာ်ဇက်တိတ်ထၜးဒြဟတ် ပ္ဍဲကဵုဍုၚ်သာံခေါ်တုဲ ဂကူသေံဂမၠိုၚ် ဂွံတီကၠုၚ် ပရူမန် နွံဒၟံၚ် မုစိကွာန် မုစိဒေသတအ်ဂှ် ထ္ၜးပျးကၠုၚ်ရ။
အခိၚ်ဗတံစၟတ်တ္ၚဲ (၁၈) ဂှ် ကၠောန်သ္ပသဘၚ်ကၞာတုဲ ဂကူမန်ဍုၚ်သေံ ဒေသနာနာ ဗၞတ် (၃၀၀၀) တအ် တိုန်စိုပ်သဘၚ်ကၞာ စသုၚ်ပုၚ်သွ ဗဂါပ်တ္ၚဲသဝ်ရ။
＂ပိုဲတအ် ကၠုၚ်စိုပ် ပ္ဍဲကဵု ကွာန်ကအ်အဒေါဝ် ခရိုၚ်လာံဖုၚ် တေံ၊ လၟုဟ် ဂွံစိုပ်ရ＂ ရဴဝွံ ညးဇၞော်ဇၞော် မဇ ဂကူမန် မွဲက္ဍိုပ် လဴထ္ၜးစ ကီုရ။
ဂကူမန် နူကဵုဒေသလာံဖုၚ်ဝွံ ဒှ်ဂကူမန်တမ်မူလ ပ္ဍဲကဵုဍုၚ်သေံတုဲ ညးတအ် ပတန်ကၠုၚ် ဍုၚ်ကွာန်ညးတအ် ဗၞတ် (၁၃၀၀) သၞာံပြၚ်ရောၚ်။
ပ္ဍဲကဵုသဘၚ်ကၞာဂှ်ဝွံ အခိုက်ကွိၚ်ကွိုက် မန်ဍုၚ်သေံ ကဵု အခိုက်ကွိၚ်ကွိုက်မန်ဍုၚ်မန်ဂှ် စွံလဝ် သီုကဵု ၜါဝိုၚ်တုဲ တိၚ်တက်ဒၟံၚ်ရ။
အခိၚ်ဗတံဝွံ ပံက်သဘၚ်ကၞာတ္ၚဲဂကူမန်တုဲဂှ် နူကဵုကွာန်နာနာတအ် ထ္ၜးပျးအခိုက်ကွိၚ်ကွိုက်ညးတအ် ဖအိုတ်တုဲ နူကဵု ဘာဗတောန်လိက် ပွိုၚ်ဍုၚ်သာံခေါ်ဂှ် ထၜးပျးကဵုဇာတ် ဝၚ်ဍုၚ်ပထုံဌာနဳကီုရ။
စၟတ်တ္ၚဲ ၁၉ ဂှ် ကမ္မတဳကၠောန်ဗဒှ် တ္ၚဲဂကူမန်တအ် ဖါပ်သၚ် ခမဳသၚ်မန် (၈၅) ဇကုတုဲ ရာဒနာ သွက်တၠတိဨကရာဇ်ဍုၚ်သေံ အာယုက်ကဵုဂွံဂၠိၚ် သၞိၚ်ကဵုဂွံသ္ၚောဲရ။
