ဂျူရဳဆာဲ – သွက်ကမၠောန် ပရေၚ်ဖောအ်ဗြေဝ် တွဵုရးမန်ဂှ် သကိုပ်ဝန်ဇၞော် ဥူအုၚ်မျေတ် ကေုာံ တၠကမၠောန် ပရေၚ်ပိုန်ဒြပ်မန်တံ ပ္ဍဲဂိတုမာတ်ချ် ၁၂၊ အခိၚ်ဒေါဝ်တ္ၚဲ ၁၁ နာဍဳဂှ် ဆဵုဂဗညးသဳကၠဳ ညးသကအ် ပ္ဍဲရုၚ်အလဵုအသဳတွဵုရး၊ ဍုၚ်မတ်မလီုရ။

ဒၞာဲရန်လဝ်သွက်ဂွံကၠောန် သၞေဟ်ဍာ်ဒမျိုဟ်ကရပ်ကွာန်တၟိကြုၚ်ကြေၚ်(Photo-IMNA)

သ္ပအဓိကကဵု ပရေၚ်ဖောအ်ဗြေဝ်ပရေၚ်စက် ကေုာံ သွက်သ္ဂောံဓမံက်ပတိုန် ကမၠောန်ပရေၚ်ပိုန်ဒြပ် တွဵုရးမန်တုဲ သဳကၠဳတဴရောၚ်ဂှ် တၠကမၠောန်ပရေၚ်ပိုန်ဒြပ်မန် မတိုန်စိုပ် ပေဲါသဳကၠဳတံ ဟီုအိုတ်ရ။

“သကိုပ်ဝန်ဇၞော်ဂှ် ဂွံကၠောန်ကမၠောန်မာန်ဂှ် ညးကဵုအာ အရီုအဗၚ်ဏောၚ် ညးဟီုကဵုပိုဲ” သာ်ဝွံ တၠကမၠောန် ပရေၚ်ပိုန်ဒြပ်မန် နာဲသဵုမျေတ် ဟီုရ။

နူကုမ္ပဏဳ တၠမန် နာဲဗညာမသာန် ဍိုက်က္ဍိုပ်တုဲ တၠကမၠောန်ပရေၚ်ပိုန်ဒြပ်မန် နာဲသိုၚ်ကျဝ်၊ နာဲမေန်အံၚ်၊ နာဲသဵုမျေတ်၊ နာဲလ္ဂန်အိန်တံ တိုန်စိုပ်သဳကၠဳအိုတ်ရ။

ဒုၚ်သဇိုၚ်ကဵု ကအ်လ္ဂုတ် ပွိုၚ်ဍုၚ်ရေဝ်ဂှ်တုဲ ပ္ဍဲပြၚ်ၜဳ မၞုံဇရေၚ်ကွာန်တၟိကြုၚ်ကြေၚ်ဂှ် သိုၚ်ခၞံအာ သၞေဟ်ဍာ်ဒမျိုဟ်မွဲတုဲ နူဂှ်မွဲကဆံၚ် ဆက်ဖံက်အာဂၠံၚ် ကွဳစက်၊ ကွဳပၟတ် ဝါအနာၚ်-ကျာ်ပိရောၚ်ဂှ်လေဝ် သကိုပ်ဝန်ဇၞော် သောၚ်ကလးကဵု အစဳအဇန်ဂှ်ရ။

အစဳအဇန်ဂှ်ဝွံ တံၚ်ဓဇက် ကိုန်စဳဇန် ပ္ဍဲအစဳအဇန်ပရေၚ်ဖောအ်ဗြေဝ် တွဵုရးမန်တုဲ ဆက်ပတိုန်ထ္ၜးကဵု အလဵုအသဳကၟိန်ဍုၚ်ရောၚ်။

အခိၚ်ဗော်ဍုၚ်မန်တၟိ ဒေံါပန်ပှော် သၞာံ ၁၉၉၅ တေံ၊ ကိုန်စဳဇန် သၞေဟ်ဍာ်ဒမြိုဟ် ကအ်လ္ဂုတ်ဏံဂှ် ရာမည အေန်တာနေရှေန်နေဝ် ကုမ္ပဏဳ လိမိတက် မၞုံသၟဝ်ကောပ်ကာဲ ဗော်ဍုၚ်မန်တၟိ ကေုာံ ကုမ္ပဏဳ Power-P ဍုၚ်သေံတံ ပံၚ်ကောံတုဲ ဓမံက်ကၠုၚ်ရုပ်ရဴကီုလေဝ် ဟိုတ်နူအကာဲအရာ ပရေၚ်ပိုန်ဒြပ် ဍုၚ်သေံတုဲ ဒးဒေံါဇူကၠုၚ် ကိုန်စဳဇန်ဏံရောၚ်ဂှ် ကေၚ်ကာဗဟဵု ဗော်ဍုၚ်မန်တၟိမွဲတၠ ဟီုရ။

“ပ္ဍဲသၞာံ ၁၉၉၆ တေံဂှ် နူအာကာသ တက်ဗီုပြၚ်တိပကတိတုဲ ဂၠံၚ်ၝောံတိုၚ်ဂှ်လေဝ် ဖျေံလဝ်ဗီု ချိုတ်ချိုတ်ပၠိုတ်ပၠိုတ်တုဲယျ၊ ချုက်လိက်ကသုက်တုပ်စိုတ် MoU လေဝ် တုဲယျ၊ ကြပ်ဓမံက်ရုပ်ရဴဂှ် ပရေၚ်ပိုန်ဒြပ်ဍုၚ်သေံ ကလိုက်ကၟဵုအာတုဲ ဒးဒေံါဇူထောံ” သာ်ဝွံ ညးဟီုရ။

သအာၚ်နူဂှ်ပၠန် သွက်ကမၠောန်ဖောအ်ဗြေဝ်ဒေသဂှ် သွက်သ္ဂောံသိုၚ်အာ ဒေသပရေၚ်စက် ပ္ဍဲဍုၚ်ကျာ်ပိ ပယျဵုသေံ-ဗၟာတုဲ သွက်သ္ဂောံဖံက်ဂၠံၚ်တြေံဂှ် အလဵုအသဳ ကေုာံ ဗော်ဍုၚ်မန်တၟိတံ ပ္ဍဲဂိတုအေဗရာဏံ သွက်ဂွံ ဆက်ပ္ညဳပ္ညပ်သဳကၠဳအာ နွံရ။

တုပ်တဴသာ်ဂှ်ကီု ယဝ်ဖံက်ဂၠံၚ်ဇြပ်ဗု၊ လှာဒကှ်၊ ကအ်ကြိက်-ဗြဝတဳ မာန်မ္ဂး သွက်ညးဒေသတံ ပရေၚ်တဵုလွဳ ဇၞော်မောဝ်ကၠုၚ်မာန်တုဲ ဂွံကၠုၚ်ကမၠောန်ကၟိတ်ရောၚ်ဂှ်လေဝ် သကိုပ်ဝန်ဇၞော် ဟီုဂးကၠုၚ်ရောၚ်ဂှ် နာဲသဵုမျေတ် ဟီုရ။