မာံတဵုလွဳ – နကဵုအစဳအဇန် ကမ္မတဳ လိက်ပတ်ယေန်သၞာၚ်မန် ပွိုၚ်ဍုၚ်မဆေၚ်စပ်တံဂှ် နူကဵုဂိတုမာတ်ချ် ၁ ဏံ စဗ္တောန်မံၚ် လိက်ပတ်မန် အပ္ဍဲပွိုၚ်ဍုၚ်နာနာ မၞုံအပ္ဍဲတွဵုရးမန်အိုတ်ရ။

ကွးဘာမန်ဥတုကညၚ်(Photo-IMNA)

“ပ္ဍဲပွိုၚ်ဍုၚ်ဇြပ်ဗုတှေ် ကွးဘာ ကွာန်ဝါခရူ၊ ပ္ၚ၊ ကြုက်ပိ၊ ဝါဂၠံၚ်၊ အနေၚ်၊ ကွာန်သက်၊ ဖံၚ်စိၚ်၊ အရာပ်ခိုၚ်ကၠိုက်တံဂှ် အာဗ္တောန်မံၚ် ပ္ဍဲဘာလကျာ် စုက်လုက်ကဵုဇကုအိုတ်ရ၊ ခမဳသၚ်တံ ဍိုက်က္ဍိုပ်တုဲ ဗ္တောန်ကဵုမံၚ်ရ” သာ်ဝွံ ကောန်ဂကောံ ဗ္တောန်လိက်ပတ်မန် မွဲတၠ ဟီုရ။

ကွးဘာသှ်လိက်တုဲဒှ်အာတံ အာဗ္တောန်မံၚ်လိက်အိုတ်တုဲ ယဝ်သှ်လိက် ၁၀ တန်တုဲမ္ဂး သဘၚ်ကၞာပံက်တန်ဗ္တောန်ဂှ် ဆက်ကၠောန်အာ ပ္ဍဲပွိုၚ်ဍုၚ်နာနာရောၚ်ဂှ်လေဝ် ကောန်ဂကောံ လိက်ပတ်ယေန်သၞာၚ်မန် နူပွိုၚ်ဍုၚ်ဇြပ်ဗုမွဲတၠ ဟီုရ။

ပရေၚ်ဗ္တောန်လိက်ပတ်မန် ဥတုက္ညၚ်ဝွံ သၞာံအာတေံဂှ် ဒးဗ္တောန်ကၠုၚ် ပ္ဍဲဘာလကျာ်၊ ဇြပ်တုဲ ကွာန်လ္ၚဵုတံဂှ် ဒးဗ္တောန်ကၠုၚ် သၟဝ်သၞိၚ်ဆုအိုတ်ရ။

“တန်ဗ္တောန်လိက်ပတ်မန်သၞာံဏံဂှ် ပ္ဍဲဘာလကျာ်၊ ပ္ဍဲဇြပ်သၟးဟွံသေၚ် ပ္ဍဲဘာအလဵုအသဳလေဝ် ဂွံလဝ်အခေါၚ်ဗ္တောန်ရ” သာ်ဝွံ ကျာ်ဇၞော်အာစာ ဘဒ္ဒန္တ သဳလဝန္တ မဒှ်ညးမရေၚ်တၠုၚ်ဖဵု ပရေၚ်ၜိုဟ်လလမ်မန် ဟီုရ။

တုပ်တဴသာ်ဂှ်ကီု ပ္ဍဲပွိုၚ်ဍုၚ်မုဟ်ဍုၚ်လေဝ် ပံက်ဒၟံၚ်တန်ဗ္တောန်လိက်ပတ်မန်တုဲ ခမဳသၚ်ကီု သီုခရှ် ဗ္တောန်ကဵုမံၚ် နဒဒှ်အာစာဘာအိုတ်ရောၚ်ဂှ် ကျာ်ဇၞော်အာစာ ဆက်ဟီုရ။

ပရေၚ်ဗ္တောန်လိက်ဥတုက္ညၚ်ဂှ် အပ္ဍဲတွဵုရးမန်သၟး ဟွံသေၚ်၊ ပ္ဍဲဒေသကောန်ဂကူမန်တံ မတန်တဴ မပ္တံကဵုလ္ဂုၚ်၊ ဗ္ဂေါ၊ တွဵုရးကရေၚ်တံလေဝ် ဗ္တောန်ကၠုၚ်မံၚ် ဇၟာပ်ဇၟာပ်သၞာံရ။

ပ္ဍဲသၞာံ ၂၀၁၁ ဂှ် ကွးဘာ တြဴဠက် (၆၀၀၀၀) ပြၚ် ဗ္တောန်ကၠုၚ်မံၚ် လိက်ပတ်မန်ဥတုက္ညၚ်ရောၚ်ဂှ် ဂွံတီကေတ် နူစရၚ်ကမ္မတဳလိက်ပတ်ယေန်သၞာၚ်မန် (ဗဟဵု) ရ။