မာံတဵုလွဳ၊ နာဲမာန် – ဂကောံဒဳမဝ် ကရေသဳ ကောန်ဂကူမန် ကေုာံ ဗော်ဒဳမဵုကရေဇြဳ အလုံရးမန်တံ ဟွံပံၚ်သ္ပ ဒှ်မွဲဗော်မ္ဂး နုက်တိတ် နူဗော်ဒဳမဵုကရေဇြဳ အလုံရးမန်ဏောၚ်ဂှ် ညးမဒှ်ဥက္ကဌဗော် နာဲဇၞူမန် (ကော်) နာဲၚိုဲတိၚ် ဟီုကဵု ဌာန်ပရိုၚ်ဗၠးၜးမန်ရ။

“အဲဂှ် မၞိဟ်နွံပၟိက်ကဵု ဗော်မန်ၜါ ပံၚ်ကောံဏောၚ်၊ ကၠာတေံလေဝ် အဲဟီုပတိတ်တုဲယျ၊ ပ္ဍဲဗော်ပိုဲဂှ်လေဝ် လပါ်မၞိဟ် ဟွံမိက်ပံၚ်ဂှ် နွံမံၚ်၊ အတးလောန်တှေ် ထပ်ပ္ညဳပ္ညပ်ညးသကအ်ပၠန်ဏောၚ်၊ စိုပ်အခိၚ်ဂှ်ရ ယဝ်ဟွံပံၚ်ဏီတှေ် အဲနုက်တိတ်ဏောၚ်” သာ်ဝွံ နာဲဇၞူမန် ဟီုရ။

ပ္ဍဲဂိတုမာတ်ချ် ၂၄ ဂှ် ကျာ်ဇၞော်အာစာ ဒယှ်ပြာကဋ် အကြာကောန်ဂကူမန်ဂမၠိုၚ် ကော်ပကောံ ဗော်မန်ၜါ သွက်သ္ဂောံပ္ညဳပ္ညပ်သဳကၠဳ ပရေၚ်ကိစ္စပံၚ်ကောံ ပ္ဍဲဘာဟံသာထဝ် မၞုံအပ္ဍဲအရာပ်ခိုၚ်ကၠိုက် ဍုၚ်ဇြပ်ဗုရ။

ပ္ဍဲပေဲါပ္ညဳပ္ညပ်သဳကၠဳဂှ် နူဗော်ဒဳမဵုကရေဇြဳ အလုံရးမန် ဥက္ကဌ နာဲဇၞူမန်၊ နူဂကောံဒဳမဝ်ကရေသဳ ကောန်ဂကူမန် ဒုဥက္ကဌ နာဲတေန်အံၚ်၊ ညးအုပ်ကာနာနာ ဒံက်တာမေန်သဵုလေန်၊ ဖက်ဆောညးအုပ်ကာ ဒံက်တာမေန်ကျဳဝေန်၊ နာဲမန်ရာဇာ၊ နူဗော်ဍုၚ်မန်တၟိ ဖက်ဆောညးအုပ်ကာ နာဲအံၚ်မေန်၊ ကေၚ်ကာဗဟဵု နာဲတၠညးတံလေဝ် တိုန်စိုပ်အိုတ်ရ။

“နကဵုအဲ တိုန်စိုပ် စၞးဗော် ဟွံသေၚ်ပုဟ်၊ အဲကၠုၚ်သဳကၠဳ နကဵုပရေၚ်ပူဂဵုဏောၚ်” ဂှ် နာဲဇၞူမန် ဆက်ဟီုရ။

ဟိုတ်နူဗော်ဒဳမဵုကရေဇြဳ အလုံရးမန် ဟွံဗလးနၚ် မၞိဟ်စၞးညးတံတုဲ သွက်သ္ဂောံထပ်ကၠောန်သ္ပ ပရေၚ်ကိစ္စသဳကၠဳ ဗော်မန်ၜါပံၚ်ကောံဂှ် ထပ်ဆိၚ်လဝ် ဂိတုအေဗရာ ၂၂၊ ပ္ဍဲဘာသာသနာ ၂၅၀၀၊ ဍုၚ်မတ်မလီုရောၚ်ဂှ် ကျာ်ဇၞော်အာစာမွဲဇကု ဟီုရ။