ခေတ္တာနန် – နဗော် ဒဳမဵုကရေဇြဳ အလုံဒေသရးမန် သ္ကိုပ်သ္ကတုဲ ကဵုဘိက်သောၚ်ကလး စပ်ကဵု ဗီုပြၚ်ရုဲစှ် အုပ်ဓုပ်ကွာန် ကေုာံ တၚ်နၚ် ဥပဒေ စပ်ကဵု ရုဲစှ်ပတိုန် ညးအုပ်ဓုပ်ကွာန် ပ္ဍဲတွဵုရးဍုၚ်မန်၊ ပွိုၚ်ဍုၚ်ၜါသွာၚ် ပ္ဍဲကွာန်ဂမၠိုၚ်တအ်ဂှ်ရ။

အမတ်ကၠတ်ထဝ် တွဵုရးဍုၚ်မန် ဒံက်တာ အံၚ်နာၚ်ဥူဂး “လၟုဟ် ကွာန်ယာက်၊ တဵုကဏာ၊ ကမာမဵုကဵု ကွါန်ဇိုၚ်ဇိုၚ်ဝုတ်ဒုဟ် ညိညတအ်ဟေၚ်ရ ဂွံအာကဵုလဝ် ပရေၚ်သောၚ်ကလးဏအ်ရ” သာ်ဝွံဂးရ။

နအလဵု ဒံက်တာ အံၚ်နာၚ်ဥူ အမာတ်ကၠတ်ထဝ် တွဵုရးဍုၚ်မန် သကုတ် ဆန္ဒမာဲ (၁) ဟေၚ် သ္ကိုပ်သ္ကတုဲ စပ္တံနူ စၟတ်တ္ၚဲ (၁၂) ပ္ဍဲဂိတုဏအ်ဂှ် စကဵုမံၚ် ပရေၚ်သောၚ်ကလး ပ္ဍဲပွိုၚ်ဍုၚ်ၜါသွာၚ် စပ်ကဵု ပရေၚ်ရုဲစှ် အုပ်ဓုပ်ကွာန် ကေုာံ သၞောတ်သၞောဝ် ဥပဒေ နာနာ တအ်ရောၚ်ဂှ် ဂွံတီကေတ်ရ။

ဒံက်တာ အံၚ်နာၚ်ဥူဟီု “ဖိတ်ကသေအ် ညးတၠ စိုတ်လုပ်စတအ် နကဆံၚ် ပထမကၠာတုဲ ဗီုပြၚ်တက်ကျာ သုၚ်ဝေၚ် ဍာ်လက်ဖက်တုဲ သၟာန်သၟုက် သောၚ်ကလးကၠာရ။ နူဂှ်မွဲကဆံၚ် ဆက်စပ်ကဵု မၞိဟ်ဟလိုၚ်တုဲ ကဵုသောၚ်ကလး ဗီုပြၚ်သီကၠဳ၊ ဗီုပြၚ်တန်ဗ္တောန်ရ။ ညးစိုတ်လုပ်စတအ် ဗွဲမဂၠိုၚ် တိုန်စိုပ်အိုတ်ရ” သ္ဂ္ဂးတဴရ။

ဂိတုလောန်ကၠုၚ် ပ္ဍဲကဵု ဖေဖဝ်ဝါရဳ (၂၄) ဂှ် ပ္ဍဲကၠတ်ထဝ် ကောန်ဍုၚ်အရၚ်၊ ကဆံၚ်ကၟိန်ဍုၚ် သ္ပဒတန်ဏာ ဥပဒေ စပ်ကဵု ပရေၚ်ရုဲစှ် အုပ်ဓုပ်ကွာန် နဒဒှ် ဥပဒေ စၟတ် (၁) တုဲဟေၚ် ပရေၚ်သောၚ်ကလးစပ်ကဵု ရုဲစှ်အုပ်ဓုပ်ကွာန် ပ္ဍဲပွိုၚ်ဍုၚ်ၜါသွာၚ်တအ် စမံက် ချဳဓရာၚ်တိုန်ကၠုၚ်ကီုလေဝ် ဒှ်ရ။

ညးမဒှ် ကောန်ဂကောံ ပ္ဍဲကံၚ်ဇြဳနာဲဗ္စာ ကၟိန်ဍုၚ်ဗၟာ စပ်ကဵုသွာၚ်ဥပဒေ ဥူမျဵုသ္ဂးဂှ် “ ပ္ဍဲဥပဒေဏအ် တၚ်တၟေၚ် ပါဒၟံၚ် ညိညဂှ် ဂွံဆဵုကေတ်ရ။ ပ္ဍဲသ္ဇိုၚ်သၞောဝ်ဥပဒေတေံ ထမံက်ချူလဝ်တေံဂှ် နူဍုၚ်ဂှ် တိုက်ရိုက် ရုဲစှ် စၟတ်ပတိုန် အုပ်ဓုပ်ကွာန်တအ် မာန်မံၚ်ရ။ ပ္ဍဲဥပဒေ မသၟာဲလဝ် လၟုဟ်ဏအ်ဂှ် နူဍုၚ်ဂှ် တိုက်ရိုက် ရုဲစှ်ပတိုန်ကေတ် အုပ်ဓုပ်ကွာန်ဂှ် ဟွံဂွံရမဒှ်တုဲ၊ ညးဇၞော်အုပ်ဓုပ်ကွါန်တအ် ကဆံၚ်ဆံၚ်တအ် (မပ္တံ – ၁၀ သ္ၚိ၊ ၁၀၀ သ္ၚိ) သီုဖအိုတ်ဂှ် ဒးရုဲစှ်ကဵု ဗီုပြၚ်မာဲဒမၠုၚ်ဟေၚ်ရ။ ဗီုပြၚ် ဒးရုဲစှ်ကဵု မာဲဒမၠုက်ဂှ်လေဝ် ပရေၚ်အပြံၚ်သၠာဲ မွဲမွဲသာ် နွံမာန်ရောၚ် ညာတ်သာ်ဂှ်တုဲ ဂပ်ဝ်ထေက်ကြိုက်မံၚ်ရောၚ်” သာ်ဝွံသ္ၚဳဂၠိပ် ထ္ၜးလဝ်ရ။

ပ္ဍဲသက္ကရာဇ် ၂၀၁၁ ဂှ် သ္ကိုပ်ဝန်ဇၞော်တွဵုရးဍုၚ်မန် ဥူအုၚ်မျေတ် ကဵုကျဝ်ဒုၚ် ရုဲစှ်လဝ် ညးအုပ်ဓုပ်ကွာန် ပ္ဍဲကွာန် မနွံဒၟံၚ် ပ္ဍဲတွဵုရးဍုၚ်မန် မွဲကွာန် ၜါတၠတုဲ အပ္ဍဲၜါတၠဂှ်ဟေၚ် မၞိဟ်ညးဍုၚ်ကွာန်တအ် ဂၞပ်စိုတ်ဂၠိုၚ်ဂှ်ဟေၚ် ရုဲစှ်ပတိုန်ကဵု နဒဒှ် အုပ်ဓုပ်ကွာန်ကီုရ။