မိလျးထဝ် – ပ္ဍဲဂိတုမာတ်ချ် စၟတ်တ္ၚဲ၂၇ နူတနေံဏံဂှ် နူကဵုဗော်ဂဥုပ်ဒဳမဝ်ကရေဇြဳကောန်ဂကူ (အမျိုးသားဒီမိုကရေစီအဖွဲ႕ ချူပ် – NLD) ကၠောန်သ္ပ သဘၚ်ကၞာပံက်ရုၚ် ပ္ဍဲအခိၚ် (၇) နာဍဳ နူဂယးဂှ် ညးမတိုန်စိုပ် ဗၞတ် (၅၀၀) တၠရောၚ် ဂွံတီကေတ်ရ။

ရုၚ်ဗော်ဂဥုပ် NLD ဂှ် ပံက်လဝ် ဗဒါဲတိုက်သြန်မျဝတဳ (Myawaddy Bank) ပ္ဍဲဂၠံၚ်ဆာန်ကၟိန် အဒေါဝ်ဍုၚ်ဗြဝတဳရောၚ် ဂွံတီကေတ်ရ။ ပ္ဍဲကဵုသဘၚ်ကၞာဂှ်ဝွံ ကောန်ဗော်အေန်အေဝ်ဒဳ၊ နူကဵုဗော်ကရေၚ်ကေအန်ယူ၊ ဂကောံညးဍုၚ်ကွာန်တၞဟ်ဟ် မဖျေံလဝ်သဇိုၚ် လ္တူဍုၚ်ဗြဝတဳ ကေုာံ ရဲလတူဍုၚ်ဗြဝတဳတံ ၜိုတ် (၅၀၀) တၠပြၚ်ၚ် တိုန်စိုပ်ရောၚ် ညးမတိုန်စိုပ်မွဲတၠ လဴထ္ၜးစရ။

“ရုၚ်ဗော်ဂဥုပ် NLD တံဂှ် ဇၟာပ်ဒၞာဲဇၟာပ်ဒေသ ပံက်မ္ဂးတှေ် ညးဍုၚ်ကွာန်တံ ဇၟာပ်ညးဇၟာပ်အဲဂှ် ကဵုဒၟံၚ်ဇြဟတ်လၟိုန်ရဏောၚ်” ရဴသာ်ဝွံ ညးတိုန်စိုပ်လဝ် အခန်ကၞာ ကောန်ဍုၚ်ဗြဝတဳမွဲတၠ ဟီုရ။

ပ္ဍဲကဵုလၟေၚ်အခန်ကၞာဝွံ လျိုၚ်သဘၚ်ကၞာ ချူဓဇက်လဝ် ဗၞတ် (၈) အစဳအဇန်တုဲ အပ္ဍဲကဵုဂှ်မ္ဂး အစဳအဇန် နူကဵု လိက်သဝဏ် နူဗော်ကရေၚ်ကေအေန်ယူ (KNU) လေဝ် ပါဒၟံၚ်ကီုရောၚ်။

နကဵုလၟေၚ်အစဳအဇန် လၟေၚ်ၚ်ဂှ်ဟေၚ် ကၠောန်ဗဒှ်ဏာတုဲ နူကဵု ညးလျိုၚ်ကောန်ဗော်အေန်အေဝ်ဒဳ မွဲတၠ ဗှ်ထ္ၜးကဵု လိက်သဝဏ် ကေအန်ယူ မအာတ်မိက်လဝ် သွက်ညဳသာသၟဟ်န်ကောန်ဍုၚ်အရေၚ်ကဵု ပရေၚ်ၜိုဟ်လလံ အပ္ဍဲဍုၚ်ရောၚ် သာ်ဝွံ ညးအုပ်ကာနာနာ ဥူထောန်အံၚ်ကျဝ် နူဗော်အေန်အေဝ်ဒဳ (တိဍာ်ဗၠးၜး) ဖျေံလဝ်သဇိုၚ် ပ္ဍဲဍုၚ်မေဝ်ဆံက်ဂှ် ဟီုရ။

နူကဵုဗော်အေန်အေဝ်ဒဳဝွံ ရန်တၟအ်ကဵု သွက်ပရေၚ်ဘဏ္ဍာတုဲ သီုသွံဒၟံၚ် လိက်အုပ်၊ ပဠောံ T-Shirt မတက်စုတ်လဝ် တဆိပ်ရုပ်ဒဝ်အံၚ်သာန်သုကျဳ ကေုာံ ယာတ်ပါတ်က္ဍိုပ် ရုပ်မြာ်ဇဵုမံၚ် ကေုာံ ရုပ်သကိုပ်ပၞာန်အံၚ်သာန်တံ ပါလုပ်ရ။

ပ္ဍဲကဵုသဘၚ်ကၞာsဂှ်ဝွံ နူကဵုဂကောံသၟတ်ကရေၚ်တံလေဝ် ကၠုၚ်ယှေ်လဟိၚ်ကဵုဒွက် ဒုၚ်တၠၠုၚ်ပရိတ်ဿာတ် နကဵုဒွက်ကရေၚ် ညးမတိုန်စိုပ်တံ ကီုရ။

အတိုၚ်ညးတာလျိုၚ် ဗော်ဂဥုပ်တအ် ဟီုမ္ဂး နူကဵုဗော်ညးတအ် ပံက်ရုၚ်အလန်ဏံဂှ်ဝွံ ဒှ်အလန်ကၠာအိုတ် ဟွံသေၚ်တုဲ အလန်ကၠာတေံ ကေၚ်ပံက်ကၠုၚ်လဝ် ဟိုတ်နူပရေၚ်ဍဵုဍိုက်တုဲ ဒးဒုၚ်ကၟာတ်ဂၠိုၚ်ကဵုသၞာံတုဲ လၟုဟ်ဂှ် ကလေၚ်ပံက်မွဲဝါပၠန် မရနုက်ကဵု ဒုတိယရ။

တုပ်တဴညံၚ်ရဴသာ်ဂှ်ကီု ပ္ဍဲစၟတ်တ္ၚဲ ၂၁ ဂိတုမာတ်ဂှ် သဘၚ်ကၞာပစူဂတဵုမုက် ဗော်ဒီမဝ်ကရေဇြဳအလုံရးမည် လ္တူဍုၚ်ကျာ်ပိဂှ်လေဝ် နူကဵုဗော်မန်တအ် ကၠောန်ဗဒှ်ကီုတုဲ ညးဍုၚ်ကွာန် ကေုာံ ညးတာလျိုၚ် အပ္ဍဲဍုၚ် ဗၞတ် (၅၀၀) တၠ တိုန်စိုပ်ကီုရောၚ် ဂွံတီကေတ်ရ။