နာဲမာန် – တ္ၚဲဏံ စာၚ်ကၟက် စာၚ်အုက် ဂြဴမှ တ္ၚဲတၟးဟွံသေၚ်ရ စိုပ်ကၠုၚ်အခိၚ် စာၚ်ၝောံဂြဴမှ တ္ၚဲတၟးရောၚ် သာ်ဏံ ဥက္ကဌဂကောံမိစဴဗု (ဂကောံအစောန်စရာဲညးဗြဴမန်) ပွိုၚ်ဍုၚ်ဇြပ်ဗု အ္စာၝောံမအုမ်ယျဳ ဟီုဏာ ကာလပံက်ဂကောံညးဗြဴမန် ပ္ဍဲပွိုၚ် ဍုၚ်ဇြပ်ဗုဂှ်ရ။
ဂကောံအစောံစရာဲညးဗြဴမန်(မိစဴဗု)
ဂကောံညးဗြဴမန် ခုတ်ခဴလဝ်ယၟု ဂကောံမိစဴဗု (ဂကောံအစောန်စရာဲညးဗြဴမန်) ဝွံ တုဲကၠုၚ် ဂိတုဂျောန် (၂) ဂှ် ပံက်ကၠုၚ်လဝ် ကဆံၚ်ဗဟဵု လ္တူဍုၚ်မတ်မလီုတုဲ အတိုၚ်သ္ဂုတ်သွာတ်ဗဟဵုဂှ် ကမ္မတဳဗဟဵုတံ ဓမံက်ဒၟံၚ်ရုပ်ရဴ ပံက်ဒၟံၚ်ကဆံၚ် ပွိုၚ်ဍုၚ်နာနာ နွံရ။
ပ္ဍဲကဵုပေဲါကောံဓရီု ပံက်ဂကောံမိစဴဗု ကဆံၚ်ပွိုၚ်ဍုၚ်ဇြပ်ဗုဂှ် ညးမဒှ်သဘာပတိ ကျာ်ဇၞော်အ္စာ ဘဒ္ဒန္တသဳလဝန္တ မြော် ဏာဂလာန်သာ်ဝွံရ။ “တ္ၚဲဏံ ပံက်ဂကောံညးဗြဴ မိစဴဗု ဏံဂှ် မုသက်ဒးဖေက် ဟွံမွဲပုဟ်၊ အလဵုအသဳလၟုဟ် ညးတံကဵု လဝ်အခေါၚ်ရရောၚ် ကာလတက်ကျာပရေၚ်ၜိုဟ်လလမ် ဗော်ဍုၚ်မန်တၟိဂှ် အဲလေဝ်ပါမံၚ်မွဲဇကုကီု ပရေၚ်ဂကူဇကု ညံၚ်ဂွံဇၞော်မေဝ် တောတက်ဂှ် ဗွဲမသၠးပွး ကၠောန်ညိ ညးတံ တုပ်လဝ်စိုတ် ထ္ပက်လဝ်စၟတ်တဲနွံမံၚ် ဟိုတ်ဂှ်ရ ကၠောန်ဂံၚ်ၚ်ညိ” သာ်ဏံ ကျာ်ဇၞော်ဂှ် ဟီုမြော်ဂလာန်ရ။
ဂကောံညးဗြဴမန် ကော်ဂး ဂကောံမိစဴဗု (ဂကောံအစောန်စရာဲညးဗြဴမန်) ဂှ် ကြဴနူကဵု ပေဲါရုဲမာဲအကြာတုဲ ပ္ဍဲကဵုဂကောံမဟာဇန် မံက်တိုန်ကၠုၚ် ဗွဲမဂၠိုၚ်ဂှ် ဂကောံညးဗြဴမန် မိစဴဗုဏံဂှ် ဒှ်ဂကောံဇၞော်မွဲဂကောံကီုရ။
ဂကောံညးဗြဴမန်မိစဴဗုဏံဝွံ ကၠောန်ရေၚ်တၠုၚ်ဒၟံၚ် ပရေၚ် ပရဟိတနာနာရ သွက်ညးဗြဴဂိယဲဒိုက်ကီု သွက်ညးဗြဴဗြဴဂမၠိုၚ်တံ ကာလသၠးဂဝ်ဂၞဴ ဒှ်အခက်အခုဲကဵု ပရေၚ်သြန်မ္ဂး သွက်ဂွံထံက်ပၚ်အာကီု ပ္ဍဲကဵုတၚ်ရန်တၟံဂကောံဂှ် ဓမံက်ထ္ၜးလဝ်ရ။
ဆက်တုဲ ဥက္ကဌပွိုၚ်ဍုၚ်ဇြပ်ဗု အ္စာၝောံမိအုမ်ယျဳဂှ် “ပေဲါရုဲမာဲအကြာတုဲဒှ်အာတုဲ သၞောတ်ဒဳမဝ်ကရေဇြဳ ညံၚ်ရဴမံက် တိုန်မံၚ်ညိညိကီုရ ဗီုကဵုဂကောံ NLD တံ၊ ဗီုကဵု ‘ဒဝ်အံၚ်သာန်သီုကျဳ’ ဂှ် ညးကော်စ မၞိဟ်တၠအစောန် (စွမ်းဆောၚ်ရှၚ်) မွဲရ။ ဂကောံညးဗြဴမန်ပိုဲလေဝ် ထေက်ကဵု ဒးကေတ်ပတောံကွေံရ၊ ညးဗြဴမန်ပိုဲလေဝ် ဒးဂံၚ်သ္ကာကီုရောၚ် ဒးဂံၚ်အာက္ဍိုပ်ရောၚ်၊ အခိၚ်ဏံဂှ် စိုပ်အခိၚ်စာၚ်ၝောံဂြဴမှ တ္ၚဲတၟးရောၚ်” သာ်ဝွံ ညးဟီုပ္တိုန်ဏာ ဂုဏ်စရာဲ ကုဒဝ်အံၚ်သာန်သုကျဳရ။
ဂကောံညးဗြဴမန် မိစဴဗု ဏံဂှ် ပူဂဵုညးဗြဴမန် မွဲလုပ်ဂကောံမ္ဂး သွက်ဂွံလုပ်ဒှ်ကောန်ဂကောံဂှ် ဒးစုတ်သြန်လုပ်ဂကောံ ပွိုၚ်မွဲသၞာံ ၁ လက်ဒကေဝ်ရ။
“ဂကောံညးဗြဴမန်ဏံဂှ် ပ္ဍဲကဵုရးဍုၚ်မန် အလုံညးဗြဴမန်ပိုဲတံ ဒှ်ကိစ္စမွဲသာ်ကီု မပ္တံ ဍာ်ဗၠိုက်ကီု ပၟတ်တူကီု ဒှ်ဒဒိုက်မမိက် ကဵုမွဲမွဲကီု ညးမွဲ ကေုာံ ညးမွဲ ကေတ်အဆက်ညးကံ သွက်ဂွံရီုဗၚ်အာညးသ္ကံရောၚ်” သာ်ဏံ ဂကောံညးအုပ်ကာ မိချဵုချဵုဟီုရ။
ဂကောံညးဗြဴမန် မိစဴဗု ကဆံၚ်ပွိုၚ်ဍုၚ်ဂှ် ပံက်ဏာတုဲမ္ဂး ပ္ဍဲကဵုကွာန်ဂမၠိုၚ်တံ ညံၚ်ဂွံဆက်ပံက်အာတၟံတၟံကွာန်ဂှ် နူကဵု ကမ္မတဳပွိုၚ်ဍုၚ်တံ ဆဝ်ဗ္ၚုဟ်လဝ်ရ။
