ခတ္တာနန် – တန်ဗ္တောန် “သၟတ်ကေုာံ ဂမြၚ်ဉာဏ်ချပ်ဗ္စာ” (Youth and Critical Thinking Training) ဂှ် ကၠောန်ဗဒှ်ဏာ ဒၞာဲတိုက်ရံၚ်လိက် (ဥတ္တရအလၚ်းပညာ) ပ္ဍဲဍုၚ်ဇြပ်ဗု တုဲဒှ်အာရ။

တန်ဗ္တောန်ဝွံ နူဂိတုဂျုန် ၉ စဵု ၁၁ ပံက်အာ ပွိုၚ်ပိတ္ၚဲတုဲ သၟတ်လတူဍုၚ်ဇြပ်ဗု ကေုာံ နူကွာန်ပွဳပွူတံကီု သၟတ်နူရးတၞၚ်သဳ မွဲတၠကီု သီုဖအိုတ် ၂၃ တၠ တိုန်စိုပ်ကတ်လ္ၚတ်ရ။

“သၟတ်တံဂှ် ဗၠေတ်ဍာံချပ်ဗ္စာမာန်တုဲ ဂုဏ်ဖဵုနွံနွံ ညံၚ်ဂွံဖန်ဇန်အာမာန်ကီု၊ အစောန်စရာဲ ဂမြၚ်ဉာဏ်ချပ်ဗ္စာ သၟတ်တံ ဂွံသၠုၚ်တိုန်မာန် သွက်ဂွံဒှ်အထံက်အပၚ် ပ္ဍဲအရာရပ်စပ်သောၚ်ကလးပြသၞာ ဘဝမၞိဟ်မာန်ကီုဂှ် ရန်တၟံတုဲပံက်တန်ဗ္တောန်ဏံ” သာ်ဝွံ ညးပါလုပ်ဂကောံကၠောန်ဗဒှ်တန်ဗ္တောန် မာံဗညာထဝ်လဵု ဟီုရ။

ပ္ဍဲတန်ဗ္တောန်ဝွံ ပွမဗှ်လိက်၊ ချူလိက်၊ ကလၚ် ကေုာံ ပရေၚ်သဳကၠဳတံ ပါလုပ်တုဲ အတိုၚ်လိက်စၞောန်ထ္ၜး ဂကောံချူလိက်၊ ဗှ်လိက်ဂမြၚ်ဉာဏ်ချပ်ဗ္စာ ဍုၚ်နာနာ (International Consortium for Reading, Writing for Critical Thinking -RWCT-IC) ဂှ်ဟေၚ် ဗ္တောန်အာရောၚ် ညးတေံဆက်ဟီုရ။

“ဇၟာပ်ပ်အရာ သွက်ဂွံချပ်ဗစာပါ်ပဲါချပ်မာန်ကီု၊ ပ္ဍဲအရာပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်ဍုၚ်ကွာန်ဒှ်ဒှ် ပ္ဍဲဘဝညးတံ ဒးဆဵုဂဗမံၚ် အရိုဟ်ရိုဟ်တ္ၚဲဂှ် ဒၞာဲဗၠေတ်ဟွံထေက် ညံၚ်ဟွံဂွံဗၠေတ်၊ ညံၚ်ဟွံဂွံ ဒးဒုၚ်လီဠာန်၊ အလဵုဇကု ချပ်ဗ္စာရဏာစၚ်ခြၚ်ကေတ်မာန် သီုကဵုလညာတ်ပညာ ဂွံသၠုၚ်တိုန်မာန်” ရောၚ်ဂှ် ဒံက်တာထောန်လေန် ဒါရိုက်တာဂကောံ Thinking Classroom Foundation ဟီုရ။

နူ Thinking Classroom Foundation ဂှ် ဗ္တောန်ထ္ၜးပျးကဵုမံၚ် တန်ဗ္တောန် ၂ သာ်နွံတုဲ သွက်အာစာတံဂှ် တန်ဗ္တောန် ၁၀ တ္ၚဲ၊ သွက်သၟတ်၊ ဂကောံပရေၚ်ဍုၚ်ကွာန်၊ CBO ၊ ဂကောံညးဗြဴတံဂှ် တန်ဗ္တောန် ၃ တ္ၚဲ ဖန်ဇန်လဝ်ရ။

သွက်သ္ဂောံဂွံအခေါၚ် ပံက်တန်ဗ္တောန်သၟတ်တံဏံဂှ် ဒးပတိုန်ထ္ၜးလိက် အာတ်လဝ်အခေါၚ် ကုသ္ကိုပ်အုပ်ဓုပ်ပွိုၚ်ဍုၚ်ဇြပ်ဗု၊ သ္ကိုပ်ဌာနလလောၚ်ပရိုၚ်၊ ဂကောံပရိုၚ်ဗၠာဲသၟိၚ်တံကီု ဂွံတီရ။

သအာၚ်နူဏံပၠန် သွက်ဂွံတိုန်ကတ်ဗတောန်ဂှ် ကော်ဘိက်လဝ်သၟတ် ရဲဗော်ကျဖေါအ်(ပြည်ခိုၚ်ဖြိုး)၊ ဗော် NLD၊ ဗော်တစည ကေုာံ ဗော်ဒဳမဵုကရေဇြဳ အလုံရးမန်တံကီုလေဝ် သၟတ်ညးစၞးတိုန်စိုပ်ဟၟဲရ။

ဂကောံ Thinking Classroom Foundation ဂှ် စဒက်ပ္တန်လဝ် နူသၞာံ ၂၀၀၁ တေံ ဖျေံကၠုၚ်လဝ်သဇိုၚ် ပ္ဍဲဍုၚ်ဇၚ်မာဲ(ဍုၚ်သေံ) ရ။