ဌာန်ပရိုၚ်ဗၠးၜးမန် – ကြဴနူပေဲါရုဲမာဲ ၂၀၁၀ တုဲဂှ် အလုံကၟိန်ဍုၚ်မွဲ ပရေၚ်ဖံက်ဖကဝ် အခေါၚ်အရာမၞိဟ် မၞုံ ၃၇၁ အမှုတုဲ အပ္ဍဲဝွံ ပရေၚ်ဍဵုဍိုက်ပျဲပျာံ ကေုာံ ပရေၚ်သ္ပအနိၚ်အထက် မၞုံ ၈၃ အမှုရောၚ်ဂှ် ဌာန်ဆက်စၠောံပတိုန်စရၚ်အခေါၚ်အရာမၞိဟ် (ဍုၚ်ဗၟာ) ND-Burma ဟီုရ။
ပ္ဍဲလိက်ဒုၚ်စဳရၚ် မၞုံယၟု “ပရေၚ်ကၠောန်သ္ပ လောန်ၜက်နူသၞောဝ်၊ ပရေၚ်ဍဵုဍိုက်ပျဲပျာံ ကေုာံ ပရေၚ်သ္ပအနိၚ်အထက် ကြဴနူပေဲါရုဲမာဲ ၂၀၁၀” ဂှ် ဟီုဓမံက်ထ္ၜးဏာ သာ်ဂှ်ရ။
ပရေၚ်အလဵုအသဳဗၟာ ဍဵုဍိုက်ပျဲပျာံ ကေုာံ သ္ပအနိၚ်အထက်တံဂှ် ကတဵုဒှ်ကၠုၚ် ပ္ဍဲထံၚ် ကေုာံ ပ္ဍဲဒေသကောန်ဍုၚ်အရၚ် မကတဵုဒှ်မံၚ် ပဋိပက္ခရပ်လွဟ်ရောၚ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
“သွက်ဂွံတဴတက်နဇိုၚ်နတဲ ပတဝ်ဏာကဵု ပရေၚ်ဒဳမဝ်ကရေဇြဳ ဍာံဍာံဏောၚ်တှေ် သၞောတ်သ္ဂုတ်သွာတ်အမှု ဗၠးဗၠးၜးၜး စဵုဒၞာလဝ် ပရေၚ်ဖံက်ဖကဝ် ပရေၚ်ဍဵုဍိုက်ပျဲပျာံ ဟွံမွဲတံဂှ် အလဵုအသဳတံ ဒးသောၚ်ကဵုဏောၚ်” သာ်ဝွံ ပ္ဍဲပေဲါသောၚ်ကလးပရိုၚ် မကၠောန်သ္ပ ပ္ဍဲဍုၚ်ၜၚ်ကံက် ပ္ဍဲဂိတုမေအိုတ်ဂှ် နာဲထောန်ထောန်ဇြဝ် မဒှ်က္ဍိုပ်ဂကောံစန္ဒက်ဆဝ်မ္ၚုဟ် ND-Burma ဟီုထံက်ထ္ၜးရ။
ပရေၚ်ဖံက်ဖကဝ် အခေါၚ်အရာမၞိဟ် မပ္တံကဵုပရေၚ်ဍဵုဍိုက်ပျဲပျာံ ကေုာံ ပရေၚ်သ္ပအနိၚ်အထက်တံဂှ် ဟွံကေတ်အရေဝ် နကဵုသၞောဝ်တုဲ ကလိလောန်မံၚ် အတိုၚ်ပၟိက်စိုတ်ရောၚ်၊ ပရေၚ်ဒဒှ်ဏံဝွံ သွက်ပရေၚ်ပြံၚ်လှာဲ ဒဳမဝ်ကရေဇြဳ ဍုၚ်ဗၟာဂှ် ဒှ်ပရေၚ်ဆိုအ်ဗမွဲရောၚ်ဂှ်လေဝ် ပါလုပ် ပ္ဍဲလိက်ဒုၚ်စဳရေၚ်ဂှ်ရ။
ပ္ဍဲသရောပ်လိက်ဒုၚ်စဳရေၚ်ဂှ်မ္ဂး သောၚ်ကလးလဝ် အကာဲအရာ ကောန်ထံၚ်ပရေၚ်ဍုၚ်ကွာန် ကေုာံ ကောန်ဍုၚ်အရၚ် ဗွဲတၟေၚ် အကာဲအရာ ဖံက်ဖကဝ် လတူညးဗြဴ ကေုာံ ကောန်ၚာ်တံဂှ် သောၚ်ကလးထ္ၜးလဝ်ရ။
“သွက်ညးဗြဴ ဒးဒုၚ်ဍဵုဍိုက်ပျဲပျာံ ပကီုပရာပ်လိၚ်မွဲဂှ် သွက်ဂွံတိတ်ဗၠး နူပရေၚ်ဒုၚ်စသိုၚ် ပ္ဍဲစိုတ်ဏံ ဝါတ်ဂါတ် ဗွဲမလောန်ဏောၚ်၊ ဒးဒုၚ်စသိုၚ် ဝေဒနာ ဂိသကေဝ် စပ်ကဵုရုပ်တုဲ ဝေဒနာ ဒးဒုၚ်စသိုၚ် စပ်ကဵုစိုတ် ပရေံပရေံဂှ်လေဝ် ညးဗြဴတံ ဒးဒုၚ်စမံၚ်ဏောၚ်၊ မုဟိုတ်ရော ဟီုတှေ် ကောန်ပၞာန်ဗၟာတံဂှ် ဟွံဒးဒုၚ်ကေတ်အရေဝ် ပရေၚ်ဖံက်ဖကဝ် ကေတ်မာန် ဆေၚ်စပ်ကဵုလိၚ် လတူညးဗြဴတံတုဲ ဆက်ကလိလောန်မံၚ်ဒုဟ်ဂှ် ညးဗြဴတံ ဆက်ညာတ်မံၚ်ဏောၚ်၊ ပရေၚ်ဖံက်ဖကဝ်ဗီုဏံဂှ် ပ္ဍဲဒေသကောန်ဍုၚ်အရၚ် ဒှ်မံၚ်ပဋိပက္ခရပ်လွဟ်ဏောၚ်၊ ဥပမာတှေ် တွဵုရးသေံသၟဝ်ကျာကဵု တွဵုရးကချေၚ်တံဏောၚ်” သာ်ဝွံ ခွေါန်သာန်ပါန် နူဂကောံညးဗြဴကချေၚ် (ဍုၚ်သေံ) ဟီုရ။
ၜိုန်ရကၠေၚ်ဒၞက်လဝ် နကဵုလိက်ကသုက်၊ စေဝ်ပၞောန်သဇိုၚ် အခေါၚ်အရာမၞိဟ် ဂၠးကဝ်ကီုလေဝ် ပ္ဍဲဍုၚ်ဗၟာဂှ် သၞောဝ်အပ္ဍဲဍုၚ် သောၚ်ကလးကဵု ပရေၚ်ဖံက်ဖကဝ် အခေါၚ်အရာမၞိဟ်ဂှ်ကီု (ဟွံသေၚ်) သၞောတ်စဳရေၚ်ဂဗုတ် ဗၠးၜးတံ ဟွံမွဲကီုဏီတုဲ ကဝ်မရှေန် အခေါၚ်အရာမၞိဟ် စိုပ်တရဴလေဝ် ဟွံမွဲဏီရ။
ဂကောံချဳဒရာၚ် အခေါၚ်အရာမၞိဟ် မဖျေံသဇိုၚ် ပ္ဍဲပယျဵုသေံ-ဗၟာ ၁၃ ဂကောံဂှ် သွက်သ္ဂောံပံၚ်တောဲချဳဒရာၚ် ပ္ဍဲပရေၚ်ကမၠောန် ပတိုန်စရၚ် အခေါၚ်အရာမၞိဟ်တုဲ ပ္ဍဲသၞာံ ၂၀၀၃ တေံဂှ် ဒက်ပ္တန်ကၠုၚ် ဌာန်ဆက်စၠောံ ပတိုန်စရၚ်အခေါၚ်အရာမၞိဟ် (ဍုၚ်ဗၟာ) ND-Burma ရ။
ပ္ဍဲဟာတ်ယာဲ သၟတ်ရပ်လဝ်လွဟ်မွဲတၠ ဟိုတ်နူပန်ကြာန်ကြာန်တုဲ ဂအုပ်ဘာအ္စာၝောံမွဲတၠချိုတ်၊ ကွးဘာၜါတၠဒးဘဲဝပ်
ဂိတုဖေဖဝ်ဝါရဳ စၟတ်တ္ၚဲ (၁၁) နူတနေံဏအ် အခိၚ်သဝ်တ္ၚဲ ၜိုတ် (၅) နာဍဳဂှ်ဝွံ ပ္ဍဲတွဵုရးသံၚ်ခလာ ဒေသခရိုၚ်ဟာတ်ယာဲဂှ် သၟတ်ရပ်လွဟ်အာယုက် (၁၈) သၞာံမွဲတၠ ဟိုတ်နူပန်ပှော်ဏာလွဟ် ပ္ဍဲကဵုဘာဗ္တောန်လိက် (Patong Prathan Khiriwat) ဂှ်တုဲ ဂအုပ်ဘာအ္စာၝောံသေံမွဲတၠကဵု ကွးဘာၜါတၠတၠ...
