နာဲမာန် – ပ္ဍဲရုၚ်ဂဥုဲ ဒဝ်ဝေန် (မတ်မလီု) ရုၚ်ဂဥုဲဒယှ်ဂှ် ယဝ်ရ မၞိဟ်ယဲဒးကရေက်လဝ် ‘ခရ’ လအ်စိန်မ္ဂး သဝ်ဝန်ပါ်ကရေက် ဒံက်တာလှဝေန် (ခွဲစိတ်ဆရာဝန်) ဟွံပကာရောၚ် မၞိဟ်ယဲလ္ၚဵုကီု ညးမၚ်ယဲကီု ဟီုဂးကဵု ဌာန်ပရို်ၚ်ဗၠးၜးဂကူမန် နွံရ။

ညးဂိယဲ ကော်ယၟု သၟတ်ဗြဴ ‘မိသဇၚ်ဥူ’ (မိသဇၚ်ဦး) အာယုက် (၁၄) သၞာံဂှ် ဒှ်ယဲထိုၚ်စၞတုဲ ကြိုတ်ဂုဟ်အာရ။ တုဲကၠုၚ် ဂိတုဂျူလာၚ်မံက် ဂှ် ဝေဒနာဗုၚ်ဂိက္တဵုဒှ်တုဲ ဂျူလာၚ်(၁၁) ဂှ် အာထ္ၜးပ္ဍဲရုၚ်ဂဥုဲ ဒဝ်ဝေန် ဍုၚ်မတ်မလီုရ။

ထ္ၜးယဲ ပ္ဍဲရုၚ်ဂဥုဲ ဒဝ်ဝေန်တုဲဂှ် အ္စာဂဥုဲ ဒံက်တာလှဝေန် (ခွဲစိတ်ဆရာဝန်) ကေတ်လျိုၚ် လွဳလွတ်ကရေက်ဗုၚ် သၟတ်ဗြဴဂှ်ရ။ ကရေက်လွဳလွတ် ဂွံလအ်ပွိုၚ်မွဲသတ္တဟတုဲ ခရသၟတ်ဗြဴဂှ် ဟွံစိန်လောဲလောဲရ။ အ္စာဂဥုဲဒံက်တာလှဝေန်ဂှ် တိုန်ရုၚ်ဂဥုဲဒဝ်ဝေန် အရိုဟ်တ္ၚဲကီုလေဝ် ဟွံကၠုၚ်ရံၚ် ခရသၟတ်ဗြဴ ‘မိသဇၚ်ဥူ’ရ။ အ္စာဂဥုဲ ‘ဒံက်တာလှဝေန်’ ဂှ် ဒှ်အ္စာဂဥုဲ ကရေက်ခရစိစောန်မွဲတုဲ သီုကဵုဒးလဝ်တာလျိုၚ် ပ္ဍဲရုၚ်ဂဥုဲဇၞော် ဍုၚ်မတ်မလီု ကီုရ။

အစာသဝ် (သမားတော်ကြီး) မွဲတၠ ကၠောန်ဒၟံၚ်ကမၠောန် ပ္ဍဲရုၚ်ဂဥုဲ ဒဝ်ဝေန် ဂှ် “ဒံက်တာလှဝေန်ဏံ ဟွံရံၚ်စံၚ် မၞိဟ်ယဲ ဒးဒုၚ်ပါ်စရေက်ဏအ်ဂှ် သီု ‘သဇၚ်ဥူ’ ဏံတှေ် ဒးဆဵုဂဗ ညးပန်တၠရ၊ ပူဂဵု ဗီုဗီုဏံ ပိုဲလေဝ် ဒးစွံသတိဏောဝ် ညးဂိယဲမွဲမွဲတၠ ဇကုရီုဗၚ် လွဳလွတ်ဏာ ညးဂွံဗၠးဘဲလမျီုမာန်ဂှ် ပၟိက်ဇၞော်ရောၚ်၊ လၟုဟ် ဗီုကဵု ဒံက်တာလှဝေန် ကၠောန်သ္ပဏာဗီုဏံဂှ် သွက်ရုၚ်ဂဥုဲဒဝ်ဝေန်ဂှ် လက်သန်ခိုဟ် ဟွံသေၚ်” သာ်ဏံ ဟီုထ္ၜးကဵုရ။

အပါသၟတ်ဗြဴ ညးဂိယဲ မိသဇၚ် ‘ဥူကျဝ်ဇြိုဲ’ ဟီုဂှ် “ ခရ ကောန်ဝုတ်အဲဂှ် နူကဵု ဒံက်တာလှဝေန် စကရေက်တုဲ လၟုဟ်ပေၚ်အာ (၁၀) တ္ၚဲယျ၊ နူတနေံဏံ အဲမၚ်ရံၚ်မံၚ် ဒံက်တာ ဂေတ်အာလ္ပာ် ညးကရေက်ဗုၚ်တအ်တုဲတှေ် ဟွံလုပ် ကၠုၚ်ကျောဝ် ခရ ကောန်ဝုတ်အဲမွဲသာ် ကလေၚ်တိတ်အာပၠန်၊ အ္စာဂဥုဲဗြဴ (နာပ် – Nurse) တအ်လေဝ် ဘိုအ်ဂွံစုတ်ဂဥုဲ ကဵုကောန်ဝုတ်အဲဂှ် ဂဥုဲတအ် စိုပ်မံၚ် ပ္ဍဲခါတ်ကောန်ဝုတ်အဲယျ၊ ဆဂး ဒံက်တာလှဝေန် ဟွံကဵုအမိၚ်တှေ် ညးတအ်လေဝ် ဟွံဂံၚ်စုတ်” သာ်ဏံ ဟီုထ္ၜးရ။

ရုၚ်ဂဥုဲ ဒဝ်ဝေန် ပုဂ္ဂလိက လ္တူဍုၚ်မတ်မလီုဂှ် ဒှ်ရုၚ်ဂဥုဲကဆံၚ်သၠုၚ် မွဲတုဲ ဒှ်ရုၚ်ဂဥုဲ ညးတၠဝေဒနာဲ ညးဂိယဲတအ် အာလွဳလွတ် ဂၠိုၚ်မွဲရ။

ရုၚ်ဂဥုဲ ပုဂ္ဂလိက ကဆံၚ်သၠုၚ် ဒဝ်ဝေန် ဝွံ ဒှ်ရုၚ်ဂဥုဲတိုက်ပိထပ်တုဲ သွက်အခန်ဗဒမ် ညးဂိယဲတအ်မ္ဂး အခန်တၟေၚ် ကဵု အခန် ဓမ္မတာနွံရ။ အခန်တၟေၚ်မ္ဂး မွဲတ္ၚဲမ္ဂး ဒးကဵု (၁၅၀၀၀) ဒကေဝ်တုဲ အခန်ဓမ္မတာ ညးဂမၠိုၚ်မံၚ်ဂှ် မွဲတ္ၚဲ (၄၅၀၀) ဒကေဝ် ဒးကဵုရ။