ဇၟန်ဗၠဲ – လိုက်ဝှ်တိကှ်ဏံ ဂကောံဂဳတမန်တအ် သွက်ဂွံတိတ်ပေဲါဂှ် ပလေဝ်ပလေတ်လဝ် နူကဵုဂိတု ခ္ဍဲသဳတေံကီု တုဲဒှ်မံၚ်အိုတ်ယျတုဲ ဒုၚ်ဂွံလဝ် အဝ်တာ (order) တၟာဟလိုၚ်ရဏောၚ်ဂှ် ဂွံတီကေတ်ရ။

“နူကဵုဂိတုခ္ဍဲသဳတေံ ပလေဝ်ပဠေတ်လဝ်တုဲအိုတ်မံၚ်ယျ၊ စပ်ကဵုပဝ်လဇြဳဂကောံကီု သၠာဲလဝ်ဗီုပြၚ်နွံမံၚ်၊ တုဲပၠန် သွက်ဂွံဓမံက်ရုပ်ရဴကဵုကောန်ဂကူတအ်ဂှ် ကပေါတ်စက်တအ်ကီု ကပေါတ်နာနာတအ်ကီု သၠာဲလဝ်တၟိဖအိုတ်ဏောၚ်” သာ်ဏံ သၟာဒယှေ်ဒွက် ပါမောက္ခဆာန် ဟီုကဵု သၞံၚ်တိုၚ်ရ။

နူကၠာဟွံဂွံလုပ်ဒ္ဂိုန်သၞာံဏံဂှ် ညးကၠုၚ်လိၚ်ဂဳတတံ စိုပ်မံၚ်တုဲ နူကဵုဂကောံဂဳတမန်တအ် သွက်ဂွံအာတိတ်ပေဲါ (Show) ပ္ဍဲဒေသနာနာဂှ် ဒုၚ်ဂွံလဝ် အဝ်တာ (order) တၟာဟလိုၚ်ကီုရောၚ် ဂွံတီကေတ်ရ။

“ပြဟ်ဟ်ဏံ ပေဲါချိုတ်ပၠိုတ်ဂှ် ဝှ်ပေၚ်ဏံတှေ် ဂဳတမန်ပိုဲ သွက်ဂွံဒှ် ပ္ဍဲကွာန်တံၚ်ပရၚ်ဘာဒေါဝ်နွံဏောၚ်၊ တုဲတှေ် သဘၚ်ကျာ်တၟံနွံဏောၚ်၊ ဆက်အာပၠန်ဂှ် သဘၚ်ကျာ်ဓမ္မသလေဝ်ဒှ်ဏောၚ်၊ ဂိတုဂတ (က္ထိုန်ပေၚ်) တေံတှေ် ဒှ်ပ္ဍဲသဘၚ်ကျာ်မၚ်ဝ၊ မွဲအဆက်ဓဝ် ပေဲါဇွသၚ်တှေ် ပ္ဍဲကွာန်ဓမ္မသ၊ ကအ်မိတ်တအ် သွက်ဂွံဒှ်နွံမံၚ်ဏီ” သာ်ဏံ သၟာဒယှေ်ဒွက်ဒယှ် ပါမောက္ခဆာန်ဟီုရ။

ကောန်ဂကောံဂဳတမန် သၞာံဏံဝွံ သၟာဒယှေ်ဒွက်နွံမံၚ်အတိုၚ်တြေံရတုဲ သၟာဒယှေ်ဒွက်တၟိ ၁-၂ တၠ ပဵုတိုန်ကီုရ။ ပ္ဍဲသၞာံဏံ ကောန်ဂကောံဂဳတမန်တအ် စဳဇန်လဝ် သွက်ဂွံပ္တိတ်ကဝး ဗၞတ်ၜိုတ် (၇) ကဝး နွံကီုတုဲ အပ္ဍဲဂှ်သီုကဝးဂကောံဂဳတမန်ကဵု ကဝးညးမွဲဓဝ်တအ် ပါလုပ်ကီုရောၚ် ဂွံတီကေတ်ရ။

“ပိုဲဂဳတမန်တအ်ဇန်လဝ် လိုက်ဝှ်တေံ သွက်ဂွံပ္တိတ်ကဝး ‘လျးခေတ်’ ဂှ်နွံ၊ ကဝး ‘နဒဳ’၊ ကဝး ‘သြန်ဆာဲ’ လေဝ်နွံရ။ တုဲပၠန် ပ္တိတ်လဝ်ကဝးဂကောံ လအ်ကၠုၚ်စှ်သၞာံယျ၊ သၞာံ(၂၀၁၃) တေံမ္ဂး သွက်ဂွံပ္တိတ်ကဝးဂကောံ နွံမံၚ်ကီုဏောၚ်” သာ်ဝွံ ညးစၞးဂဳတမန် “နာဲတိုၚ်ပ္ကဴ” ဟီုလဝ်ကဵု လိက်ပရိုၚ်သၞံၚ်တိုၚ် နွံရ။

ပိုဲသၟာဂဳတတအ် မိက်ဂွံကဵု ဇၟာပ်ကောန်ဂကူမန်ပိုဲ ကဵုဒြဟတ်ကဝးဇေတ်တ်ကီုရ၊ ၚုဟ်လေဝ် ဟွံကွာမံၚ်ရ၊ မုပရောတှေ် ပိုဲတအ် ဂွံအာဍာ်ဇမၠိၚ်မာန် သာ်ဝွံ ညးဆက်ဟီုရ။

“ပိုဲလေဝ်ဝဳၜံၚ်မံၚ် သၟာဒယှေ်ဒွက်တၟာဟလိုၚ်ကီုရ၊ ခက်ခုဲညးကဵုညးနွံမံၚ်တုဲ တိတ်အာဂှ်ဂၠိုၚ်ရ၊ ဆဂး သၞာံဏံ မၞိဟ်လုပ်တိတ်အောန်မံၚ်ကီုရ၊ တုဲပၠန် ဂွံဒြဟတ်စိုတ်မွဲဂှ် ဆီပိုဲကဵုပိုဲ၊ ဂကူပိုဲကဵုပိုဲတှေ် ဂကူပိုဲဖအိုတ် ဒှ်အာမွဲစၚ်ဏောၚ်၊ သၞာံဏံ ပရေၚ်ချဳဒရာၚ်ပိုဲလေဝ် တၟေၚ်မံၚ်ဏောၚ် ဗဵုတှေ် ဆဵုကေတ်ဏောၚ်” သာ်ဏံ သၟာဒယှေ်ဒွက်ဒယှ် ပါမောက္ခဆာန်ဟီုရ။