ဌာန်ပရိုၚ်ဗၠးၜးမန် – ဂကောံဒက်မိတ် ကောန်ဂကူမန် ဍုၚ်သေၚ်ကာပေါဝ် Mon Friendship Association Singapore ဍိုက်က္ဍိုပ်တုဲ ပ္ဍဲစၟတ်တ္ၚဲ အံက်တဝ်ပါ ၂၆ မ္ဂး ကၠောန်ဗဒှ် သဘၚ်ဟီုတွံ ပရေၚ်မန်ရောၚ် ဂွံတီကေတ်ရ။

ပ္ဍဲသဘၚ်ဟီုတွံဏံမ္ဂး ပရေၚ်ပညာမန်၊ ပရေၚ်ဂကူမန်၊ ဝၚ်၊ လိက်ပတ်ယေန်သၞာၚ်မန် ကေုာံ ပရူပရာ မဆေၚ်စပ်ကဵု ပရေၚ်ပိုန်ဒြပ် ဒေသမန်တံ ပါလုပ်တုဲ ကဏ္ဍသၟာန်သွဟ်လေဝ် ပါလုပ်သဳကၠဳကီုရောၚ်။

သွက်သဘၚ်ဟီုတွံဏံဂှ် နာဲမိုၚ်တဝ် မဒှ်သကိုပ်စၞောန်ပ္ညုၚ် (တြေံ) နူဌာနထိၚ်ဒဝ်တၚ်သမ္တီကောန်ဂကူ၊ နာဲဇၞူမန် ကော် နာဲၚိုဲတိၚ် မဒှ်ဥက္ကဌ ဗော်ဒဳမဵုကရေဇြဳ အလုံရးမန် (AMDP) ကေုာံ နာဲဗညာသာန် မဒှ်တၠကမၠောန်ပရေၚ်ပိုန်ဒြပ်မန်တံ ဍိုက်က္ဍိုပ်သဳကၠဳအာရောၚ်ဂှ် နာဲသဟာဲမန် မဒှ်နာယက ဂကောံဒက်မိတ် ကောန်ဂကူမန်ဂှ် ဟီုရ။

“ဝၚ်မန် ဗီုလဵုနွံကၠုၚ်ဂှ် မၞိဟ်ဟွံတီတံ ဂွံတီအာကီု၊ လပါ်လိက်ပတ်မန်လေဝ် အကာဲအရာလၟုဟ် နွံမံၚ်ဗီုလဵု၊ တုဲပၠန် စပ်ကဵုကမၠောန်ပရေၚ်ပိုန်ဒြပ်မန် ဗီုလဵုဂွံကၠောန်တံဂှ် ဂွံသဳကၠဳလှာဲဂတးလညာတ်တုဲ ပိုဲကၠောန်သ္ပသဘၚ်ဟီုတွံဏံ” သာ်ဝွံ ညးဟီုရ။

သဘၚ်ဟီုတွံဝွံ ပ္ဍဲဂိတုအံက်တဝ်ပါ ၂၆၊ တ္ၚဲသိုက် နူအခိၚ် ၁ နာဍဳကလေၚ် စဵုစိုပ် ၅ နာဍဳ ကၠောန်သ္ပအာ ပ္ဍဲဒၞာဲ Ren Ci Community Hospital Hall, 71 Irrawaddy Rd, Singapore 329562 Near Novena MRT Station ရ။

အစဳအဇန် ဟီုတွံဝွံ ဗလးအာ ပ္ဍဲမုက်လိက်အေန်တာနိတ် ဂကောံဒက်မိတ် ကောန်ဂကူမန် ဍုၚ်သေၚ်ကာပေါဝ် http://sahaimon.net တိုက်ရိုက်ရောၚ် ဂွံတီကေတ်ရ။

ပရူဝၚ်မန် လိက်ပတ်မန် အာဲကၟာဲယေန်သၞာၚ်မန် ပတိုန်ၚုဟ်ဟွံမာန်တံဂှ် ကောန်ဂကူမန် မစိုပ်ဍုၚ်သအာၚ်တံကီု၊ သၟတ်တၞောဝ်ဒတောဝ်တၟိတံကီု ဂွံဆက်တဲထိၚ်ဒဝ်အာမာန် ကေုာံ လညာတ်ပညာ သုတ၊ ရသ မဆေၚ်စပ်ကဵု ပရေၚ်မၞိဟ် ပရေၚ်ပိုန်ဒြပ်တံ ဂွံဇၞော်မောဝ်ကၠုၚ်မာန်တုဲ မဒးကၠောန်သ္ပ သဘၚ်ဟီုတွံရောၚ်ဂှ်လေဝ် နာဲသဟာဲမန် ဟီုရ။

သွက်သ္ဂောံ အာဟီုတွံ ပရေၚ်မန် ပ္ဍဲဍုၚ်သေၚ်ကာပေါဝ်ဂှ် နူတနေံ အခိၚ်သဝ်တ္ၚဲ ၄ နာဍဳဂှ် နာဲမိုၚ်တဝ် ကေုာံ နာဲဇၞူမန်တံ တိတ်အာနူဍုၚ်လ္ဂုၚ် နကဵုက္ၜၚ်ကျာတုဲ လအ်ၜိုတ်ပွိုၚ်မွဲသတ္တဟရောၚ် ဂွံတီကေတ်ရ။

ဂကောံဒက်မိတ် ကောန်ဂကူမန် ဍုၚ်သေၚ်ကာပေါဝ် (Mon Friendship Association Singapore) ဂှ် စဒက်ပ္တန်ကၠုၚ် နကဵုကောဒေံမိဿဟာဲ ကောန်ဂကူမန် ၜိုတ် ၅၀၀ တၠ နူသၞာံ ၂၀၀၁ တေံတုဲ လၟုဟ်ဂွံအာယုက် ၁၁ သၞာံရောၚ် ဂွံတီကေတ်ရ။