ဌာန်ပရိုၚ်ဗၠးၜးမန် – ပ္ဍဲကိစ္စ သွံဏာဂအာၚ်တိ ဘာတန်မူလ ကွာန်ဓမ္မသ၊ ပွိုၚ်ဍုၚ်ကျာ်မြဟ်ဂှ် နကဵုညး ပါလုပ်လဝ် ဟွံသေၚ်ရောၚ် ဥက္ကဋ္ဌတြေံ ကွာန်ဓမ္မသ နာဲထောန်လေန် ကယျာန်တးပဲါရ။
“အတိုၚ်သ္ဂုတ်သွာတ် ကောံဓရီုကမ္မတဳဘာဂှ် သွံဏာဂအာၚ်တိဘာမွဲကရေက် နကဵုသြန် ၁၉၃ ကိုဋ်တုဲ သိုၚ်ဏာဘာတန်လဒေါဝ်တၟိရ။ အဲဂှ် နကဵုဥက္ကဋ္ဌကွာန်မွဲ ဂွံတီကေတ်ပရူဏံရ။ ဆဂး ဟွံဆေၚ်ကဵုအဲတိုက်ရိုက်ပုဟ်” သာ်ဝွံ နာဲထောန်လေန် ဟီုရ။
အဃောကေါန်ကွာန်ဓမ္မသတံဇက်ဂၠောဲအာမံၚ် သွက်ဂွံထ္ၜးဆန္ဒ
အခိၚ်ညးကေတ်မံၚ်တာလျိုၚ် ဥက္ကဋ္ဌကွာန် ပ္ဍဲသၞာံ ၂၀၀၉၊ ဂိတုဂျာန္နဝါရဳဂှ် စပ်ကဵုကိစ္စ သွံဂအာၚ်တိဘာတုဲ ကိုပ်ကၠာအိုတ် ဒးဒုၚ်စၟဳစၟတ်ကၠုၚ်တုဲ ပ္ဍဲသၞာံ ၂၀၁၁၊ ဂိတုအံက်တဝ်ပါဂှ် ဒေံါဇူကၠုၚ် နူတာလျိုၚ်ဥက္ကဋ္ဌကွာန်ရ။
ပရေၚ်တေၚ်လဝ်အမှု ဥက္ကဋ္ဌတြေံ ကွာန်ဓမ္မသ သွံစဂအာၚ်တိဂှ် ဟိုတ်ဍေံဟွံခိုဟ်ကၠိုက်ရောၚ် ရုၚ်သၞောဝ်ဓဝ် ပွိုၚ်ဍုၚ်ကျာ်မြဟ် သ္ဂုတ်သွာတ်တုဲ ပ္ဍဲညးတေၚ် ၅ တၠဝွံ နာဲသဵုတိၚ်ဂှ် နကဵုအမှုပလီုပလာ်သိက္ခာ သၞောဝ်ဥပဒေပိုဒ်ဇၞော် ၅၀၀ ဒးဒုၚ်ဖျေံထံၚ် ၆ ဂိတု ပ္ဍဲစၟတ်တ္ၚဲ ၂ ဂိတုဏံရောၚ်ဂှ် ကောန်ကွာန်ဓမ္မသ နာဲသဵုမျေတ် ဟီုရ။
လၟုဟ် ဆက်ပတိုန်လဝ် အခေါၚ်ခၠေဝ်သှ် ပ္ဍဲရုၚ်သၞောဝ်ဓဝ် ခရိုၚ်မတ်မလီုတုဲ ပ္ဍဲဂိတုနဝ်ဝေမ်ပါ ၁ ဏံမ္ဂး ဖျေံသ္ဂုတ်သွာတ်အမှုရောၚ် ဂွံတီကေတ်ရ။
ဟိုတ်နူနာဲသဵုတိၚ် ဒးဒုၚ်ဖျေံထံၚ်ဂှ်တုဲ ကောန်ကွာန်ဓမ္မသတံ ဟွံပြေစိုတ်ဂှ်ရ သွက်ဂွံထ္ၜးဆန္ဒ ဂတမုက်ရုၚ်သၞောဝ်ဓဝ် ဍုၚ်ကျာ်မြဟ်ဂှ် လောန်ကၠုၚ်အကြာတ္ၚဲဏံ အာတ်လဝ်အခေါၚ်ကီုလေဝ် နူကဵုဗဒိုပ်ဗၠာဲသၟိၚ် ဟွံကဵုအခေါၚ်ရ။
“ဂွံပရေပရံၚ် ပြသၞာဒှ်မံၚ်ၜါလပါ်ဏံဂှ် ဂကောံပ္ညဳပ္ညပ်အကြာ မွဲဂကောံ ဘိက်ဒုၚ်တၠုၚ်လဝ်ပိုဲ။ ကာလသဳကၠဳမှ ထပ်ဟီုပၠန်” သာ်ဝွံ နာဲသဵုမျေတ် ညးမဍိုက်က္ဍိုပ် ပရေၚ်ထ္ၜးဆန္ဒဂှ် ဟီုရ။
ကြဴနူအလဵုအသဳတၟိ တိုန်ကၠုၚ်ဏံတုဲ ပရေၚ်တေၚ်ပတိုန်ထ္ၜး ပြသၞာတိဍာ်ဂှ် ဂၠိၚ်ကၠုၚ်မံၚ် ဗွဲမလောန်ရောၚ် ဂွံတီကေတ်ရ။
